¹ Apano Yesu watalike ukusambilizga muvyili, watile ,''Umunthu wakomile ivikomwa vyakwe muchalo chakwe , waliwizizge ulungo mumbali , nukwimba ichiwina ichakupanjila uwengwa . Wazenzile ing'anda yakweyakalondela wawalemike yakalima apano wapisile kuwulendo. ² Pansita yakwe , watumile uwantchito wakwe kuwawonvi pakuti akasende ivikomwa vyamuchalo chilya. ³ Kweni yamusenzile , nukumuma , ngayamunzizile ukwawula nanthichimwi. ⁴ Wawatumile nupya kawomba muze , yamuchisile kumutwe nukumuyinvya ukwambula insonyi . ⁵ Watumile nupya muze, nga wi yamukomile. Yayinvyizge ayinji munzila yikwene , ukuma yamwi nukukoma yamwi. ⁶ Pasyazile umunthu wenga ukuti atumwe, umwana umukundwe. Walinji uwawumalilo ukumutuma kuliwoliwo. Ngawatile,'' yandi yamuchindike umwana wane . ⁷ ''Loli ayalimi yavwanzyananga , ''Wii impyana. Zanga, zanji tumukome, nimpya nayo yimaya iyitu.! ⁸ Yamulemile , nukumukoma , nukumusumbila kunzi kwa chalo . ⁹ Apano , angawomba chani umwenecho wa chalo? Aliza nukuzawonona ayalimi , nuwapela ichalo yawuze . ¹⁰ Mutawelenzile amazwi? 'Iwe lino yakazenga yalikanyile alino lya apazilwe. ¹¹ Chii chafumile kuli Leza , ichisuma paminso yakwe Leza .''' ¹² Ukufuma papokwene ayakoleli yaya Yuda yalonzile inzila yakumulemela Yesu pakuti yuvwile ukuti wavwanganga muvili kuli woliwo. Kweni yatinyile iwumba. Ngayafumile nukupita. ¹³ Lyeni yatumile yamwi ayafalisi naya Helodiya na kuli weliwe ukuti yamuteye weliwe mumazwi. ¹⁴ Yizile kuli weliwe, yatile, ';'Musambilizgi , twamanya ukuti ukavwanga umolimo ukwawula ukutina amelenganyo yawanthu . Ichumi ukasambilizga uyana nukulonda kwakwe Leza. Wuzge ichiyipe ichakulipila umusonkho kuli kayisala pamwi awe ? tungalipila pamwi haa. ¹⁵ Kweni Yesu wamanyile , ukuyipichizga kwawo nga watile, '' ichani chino mukunjezga? letini kuno ikopala ukuti indilole.'' ¹⁶ Yalesile lyonga(1) kuli Yesu . Watile kuliwoliwo, '' Imphumi yii iyakwe weni namalembo yaa ayakwe weni? '' Yatile, '' Iyakwe Kayisala.'' ¹⁷ Yesu watili,'' mupani Kayisala vyake Kayisala nakuli Leza vcyakwe Leza .'' Yamutinyile Yesu. ¹⁸ Kupya ayasaduki, yano yakananga ukti kusi ukuzguka , yizile kuli weliwe. Yamukolowozizge ayati,'' ¹⁹ Musambilizgi, Mose watulembile, '' ngumuto wako wafwa nukukusila umwanachi , uwambula umwana, umonsi asende umwanachi wa muto wakwe , nukukuzga imbezu ya muto wakwe.' ²⁰ Palinji ayalumendo yasano nayayili(7) ; katote watwazile umwanachi nda wafwile , atasile imbezu. ²¹ Ngawakwechili wamusenzile nukufwa, atasileb imbezu, nawakwe chitatu vivyokwe. ²² Yasano nayayili yatasile imbezu. Ichawumalilo umwanachi nawe wafwile. ²³ Kasita wakuzguka , lino yazguka nupya , umwanachi aliya uwakwe weni? Muno wonsi yayalumendo yasano nayayili walinji umuchi wawo.'' ²⁴ Yesu watili, '' sali mulandu wuno mukuponjela, muno mutamanya amazwi namaka yakwe leza ? ²⁵ Muno yazguka ukufuma kunfwa yasitwa nupya yasipyana , kweni ali ngati ayangeli ya kupela . ²⁶ Kweni ukuyana nayafwe yano yakazuswa , mutawazga mwi buku lyakwe mose, pa mulandu uwa chivwati, muno Leza wavwanjile kuli woliwo nukuti ,'' nene Leza wakwe Abulahamu na Leza wakwe wakwe Ayizeki na Leza wakwe Yakobe'? ²⁷ Saleza wayafwe, kweni uwawapuma .'' ²⁸ Kawalika wumwi wizile nukuvwa ukuvwanzyanya kwawo; waweni ukuti Yesu waswike ningo. Wamuwuzichisizge ,'' Isundechi lino ilyakulondeka pali wonsi?'' ²⁹ Yesu waswike,'' ililondwe sana ali, 'wuvwini, Izilayeli, Mwene Leza witu, Leza ali wenga . ³⁰ Mutemwe Leza winu numwenzo wonsi, numuzimu winu wonsi, namelengwi wonsi, namaka yako wonsi.' ³¹ Isunde lyakwe chili ali ,' utemwe ayapalamani yako ngati awewe wenga .' Pasi isunde ilikalamba ukuchila yaa.'' ³² Kawalika , ''Eya , musambilizgi ! Ichimi wavwanga ukuti Leza ali wenga , nukuti pasi muze pali weliwe. ³³ Ukuti tumutemwe numwenzo wonsi nukuvwichisya konsi namaka wonsi, kuwatemwa ayapalamani namuno twayitemwela swenga ichisuma ukulusya ichawupi ichisikise nivyakufwa. ³⁴ Lino Yesu walola ukuti waswike namano, watile kuli weliwe,'' Usi ukutali nuwene wakwe Leza.'' Ukufuma palya patalinji wumwi wino walondanga ukuwuzichisya amawuzgo. ³⁵ Lino Yesu akusambilizga mung'anda yamilandu, watili, '' Chili wuliwuli ukuti yakawalika yakuti Khilisiti umwana wakwe Devedi? ³⁶ Devedi weliwe , mumupasi uwutiswe watili,' Leza watili kuli Leza wane,'' Yikala kwikasa lyane lyakwe ndilo insuke mphange alwani yako apakulyatapenepo. ³⁷ Deveti weni akamwama, 'Leza' nomba khilisiti angaya wuli umwana wakwe Devedi?'' Iwumba ilikulu lyuvwichisyanga sana. ³⁸ Muwusambilizgi wakwe Yesu watili ,'' Muchenjele nawo yakawalika , yano yakunda ukupita muvimikanjo nukulamukwa mumasankhano , ³⁹ nukuti yaya nivwakwikalila ivichindame mumasinagogi namalo ayachindame muvisangulusyo. ⁴⁰ Yononanga namang'anda yawafwilwe, nukupepa amapepo ayatali ukuti ayanthu yawalole. Ayanthu ya yalapochelela uwulonzi uwukalamba. ⁴¹ Apano Yesu wikazile pansi apapipi pa chibokosi ichakusumbilamo ivyawupi pamalo ya mung'anda yamapepo ; walolanga ayanthu pani yasumbilanga amakopala muchibokosi. Ayakankhala ayinji yasumbilanga amakopala ayavule. ⁴² Apono umupina wumwi umufwile wizile nukusumbila utumakopala twili, tuno tungayana na pene. ⁴³ Wamile ayasambili yakwe ati kuli woliwo,''Umolimo nkuvwanga kuli mwemwe, umufwile wi umupina wayika ivivule ukulusya wonsi yano yayika ivyawupi muchibokosi. ⁴⁴ Pakuti wonsi yatwazile ivyawo ivivule. Kweni umufwile wii, ukufuma muwupina wakwe , wayika amakopalam wonsi yano wali nawo pawumi ,''