¹ Yesu wawamie ponga ayalondezi yakwe nu kuwapa insambu pa mipasi iyiyipe, ukuyifumya, nukupozya indwala zyakulekanalekana na mawulwale aya kulekanalekana. ² Nomba amazina yamapositoli yalya ikumi lyonga nayayili yalinji. Uwakutandika , Simon( wino walinji kapya a Peteli), nga na Andileya umuto wakwe ; James umwana wakwe Zebedee, nga Yohan umuto wakwe; ³ Filipu, Bartholomew; Tomasi, nga na Mateyo kasontchezga wamisinkho; James umwana wakwe Alphaes, nga na Thaddaes; ⁴ Simon nga na Yudas isikaliyiti, wino alimukana. ⁵ Yakwene ikumi na yayili(12) Yesu wawatumile wawalanjilile nu kuti, ''Mutaya ukunethende yonsi kuno kukayikala Ayakandi, nu kuti mutinjila umumusumba wonsi uwa ma Samalitani. ⁶ Kwene muye uku ng'onzi iziponge izya ng'anda ya Izilayeli; ⁷ Napano mukuya, tandini izwi nukuti, 'Uwumwene wa kwiyulu wa palama. ⁸ Mupozye ayalwale, muzyusye ayafwe, swefyini aya mambombo, nukufumya imipasi iyiyipe. Mwapochela pa wila mupele pa wila. ⁹ Mutanyamula golide nanthi wumwi, siliva, pamwi kopa umutuvyola twinu. ¹⁰ Mutatola ichola chakupita nacho icha pa wulendo, pamwi ichizwalo ichakuchinja, pamwi indyato, pamwi insonzo, amuno kawomba wayanila ichakulya chakwe. ¹¹ Lyene umusumba nanthi umuzi wuno mukwinjila, mulonde wuno vimupazi, nu kwikwala kukokwene mphaka pano mulawelela. ¹² Ndipano mwinjila umung'anda, lamukini. ¹³ Nanthi ing'anda yayanana lekini umutende winu wuye pali yoliyo. Kwene nanthi itayanine, lekini umutende wu welele kuli mwemwe. ¹⁴ Kuli yano yatawapochelela pamwi ukuvwa ku mazwi yinu, pano mukufuma umung'anda yiyo nanthi umumusumba, kunthini ulukungu ulwa mumatamba yinu. ¹⁵ Ichumi inkhuvwanga kuli mwemwe chilayako filyako ku muzi wakwe Sodomu na Gomola mu wanda wa wupinguzi ukuchila umusumba wuwo. ¹⁶ ''Lolini, inkhuwatuma ngati ing'onzi pakasi pa mphumphi, achino muchenjele ngati inzoka na kuya mwe yatele ngati inkhunda. ¹⁷ Muchenjela na yanthu! yaliwatwala ku tuwangwe twa milandu, nukuti yalamichapula umumasinagogi yawo. ¹⁸ Apano yalawatwala apa manso ya nkhombe na ya mwene pa musango wakwe nene , ngati uwumboni ku woliwo na ku yakandi. ¹⁹ Nanthi yiza yawatwala, mutasakamala kuli vino muliya muvwange, amuno ivyakuvwanga vilapelwa kuli mwemwe pali kasita wiyo. ²⁰ Amuno ansamwemwe mweyano mulavwanga, kwene Umupasi wakwe Tata winu awuno wulavwanga muli mwemwe. ²¹ Umwina alamutwala umwina kumfwa, na tata umwanakwe. Ayana yalakatuchila ayakwasi yawo nu kuwapanjisya ukuti yafwe. ²² Mulapatwa ukumunthu wensi umulandu wizina lyane. Kwene wuno alajimba mphaka kunsilo, umunthu wiyo alapusuka. ²³ Nanthi yiza yawachuzya umu musumba wu, mutuchile kuli wuze, ichumi inkhavwanga kuli mwemwe, mutalayipita imisumbi yonsi ya Izilayeli pano umwana wa munthu atani ayize. ²⁴ ''Umulondezi asipota umusambilizi wakwe, nukuti umuzya asichila uwakumutungululula. ²⁵ Chimuyine umulondezi ukuti aye ngati umusambilizi wakwe, nu muwomvi ngati uwakumutungulula. Nanthi yamwamwa katungulula wa ng'anda ukuti Belizebu, wuli vino chingachilamo amazina yano yangama aya mung'anda yiyo! ²⁶ Achino mutawatina, amuno pasi chino chatupikwa chino chitalalolechela, nukuti pasi chino chifisama chino chitalamanyikwa. ²⁷ Chino inkhuwanena umufinzi, chivwangini apatiswe, na chino mukuvwa panono umumatwi yinu, chitandini papela pa mang'anda. ²⁸ Mutatina yalya yano yakakoma umwili kwene yatanga yakome uwumi. Kwene, mumutine wino afwile afwile ukonona uwumi ponga nu mwili mu gehena. ²⁹ Wuzye amakoza yayili yasikazwa pa kalikopala akanono? Papokwene pasi nanthi lyonga lino lingapona pansi ukwawula Tata ukumwanya. ³⁰ Kwene ninyele zyamumutwe winu zya pendwa zyonsi. ³¹ Mutatina. Mweyapapela sana ukuchila amakoza ayavule. ³² Achino wensi wino alazumila nene pamanso ya yanthu, nani kwene indazumila pa manso yakwe Tata wuno ali umwiyulu. ³³ Kwene wuno akunkhana nene apamanso ya yanthu, nani kwene indamukana pa manso ya yakwe Tata wuno ali umwiyulu. ³⁴ ''Mutayelenganya ukuti niiza pakuleta umutende pansi ya pansi. Inthiza pakuletaumutende, kwene uwulwani. ³⁵ Lelo niza pakulekanya umunthu ukupusana na yisi, nu mwana umwanachi alapusana na nyinavyala. ³⁶ Ayalwani ya munthu yalaya ayalyakwene aya ng'anda yonga nawe. ³⁷ Wino wakunda yisi pamwi nyina ukuchila nene atalingine nene; wino wakunda umwanakwe umonsi pamwi umwana umwanachi ukuchila nene atalingine nene. ³⁸ Wino atanyamula ulapanda lwakwe nukukonkha pansizi pane atalingine nene ³⁹ Wino akuzana uwumi wakwe alawusumba. Kwene wino akusumba uwumi wakwe pa mulandu wakwe nenen alawuzana. ⁴⁰ ''Wino akuwapochelela mwemwe akupochelela nene akupochelela akepochelela na weliwewuno wanthuma. ⁴¹ Wino akupochelela kasesema umwizina lyakwe kasesema alapochela, ichilambu chakwe kasesema, na wino akupochelela umunthu umulungamane umwizina lya mulungamane alapochela ichilambu cha munthu umulungame. ⁴² Wensi wino akupela kweneko pali wenga wa yanono ya napano ichikombe cha manzi ayazuke yakumwa umwizina lya mulondezi, ichumi inkhuvwanga kuli mwemwe, weni atalasumbapo ichaupi chakwe.''