¹ Iwumba lyonsi lyakatwike nga nukumuleta Yesu kuli Pilate. ² Yizile yatalika ukumulonga , nukuvwanga ukuti , '' Tumuzanyile umunthu wino akonona insi yitu, ukukanya ayanthu ukuti yamupa Cayesala, nga nukuvwanga ukuti weliwe ali Khilisitu, mwene.'' ³ Pilate wamukolowozizge, watile ; ''Wugze we mwene wawa Yuda ?'' Yesu wamwaswike nukuvwanga ukuti , '' Amuno vwavwanjila .'' ⁴ Pilate watili kumukalamba wamapepo nakwiwumba ,'' Nthakuzana uwonoyi nawumwi umumunthu wino .'' ⁵ Kweni ayanthu yatuvwichisye , nga yatile ,'' Akuvulunganya ayanthu , ukusambilizga mu Yudeya , ukutalichila ukufuma ku Galileya mphaka ukumalo yano.'' ⁶ Nomba lino Pilate wuvwa chino , wizile wawuzichisya nantyhi umunthu wino wali umu Galileya . ⁷ Lino wamanya ukuti wali umumaka yakwe Herod, wizile wamutuma Yesu kuli Herod, wino umunsita yilya kwene wali umu Yelusalem mumanda yalya kwene. ⁸ Lino Herod wamulola Yesu , wizile wakunda sana, umulandu walondanga ukuti amulole. Wuvwanga vyakwe weliwe nga walondanga ukuti angalola ivizungusyo vino vikachitwa naweliwe. ⁹ Herod wamukolowozizge Yesu umumazwi ayinji, Kweni Yesu ataswike nachimwi. ¹⁰ umukalamba wamapepo nayakawalika yimilile , nukumukalipila . ¹¹ Herod nayakeya yakwe yamukalipile Yesu nukumusoweka . Apano yamuzwisile inkhanzu nukumutuma kapya kuli Pilate. ¹² Muno Herod na Pilate yizile yaya ayamanyani uwanda wuwo kwene, muno kali yali ayalwani. ^{13 14} Pilate wamile wonsi ayakalamba yamapepo nga nayakoleleli nga niwumba lyonsi ilyawanthu nga watili kuli woliwo, '' Mwizile nawe umunthu wino kuli nene ngati umunthu wino akukolelela ayanthu ukuti yachita iviyipe , nga lolini, Nene, lino namukolowozya paminsi yinu,nthazanyile uwononyi nawumwi umunthu wino uwakukwafyanya navino mukumulonga . ¹⁵ Awe, na Herod nawe, muno wamuleta kapya kuli sweswe, nga lolini, nachimwi chino awonvile ichakuti mphaka tungamukoma. ¹⁶ Nimamupanika sile nga nukumulechezga.'' ¹⁷ Nomba Pilate wawalayile ukuti amawasapwila aya Yuda umunyepwe wenga pa wanda waluzango. ¹⁸ Kweni yalizile wonsi ponga , nukuti, '' Wino pole umunthu wino , tusapwilini Barabbas!'' ¹⁹ Barabbas walinji umonsi wino wanyefilwe umunyanda yaminyololo wawukani wumwi mumusumba nga nukuti yalinji ayakuti yamukome. ²⁰ Pilate wawawuzizge nupya, walondanga ukuti amusapule Yesu . ²¹ Kweni yapunzile , nukuti, '' musamikini, musamikini.'' ²² Wavwanzile nupya kwakwe chitatu,'' Ichani, awonvile chani ichiyipe umunthu wino? Nthazanyile nachimwi ichiyipe mumunthu wino ichakuti tungamukomela . Achino nanthi namupanika , nimamusapula .'' ²³ Kweni ayanthu yalya yatuvwile yapunzile sana, ukulonda ukuti yamupamanthile . Amazwi yawo yizile yamutonsya Pilate. ²⁴ Nomba lino Pilate walonzile ukuti awombe chino yakulonda . ²⁵ Wamusapwile wino yamulondanga wino wali mung'anda yaminyololo umulandu wakonona nukukoma. Apano wamusapwile Yesu kukulonda kwawo. ²⁶ Lino yakupita nawe, yalemile Simon wumwi uwa ku Cyrene, akufuma mumusumba , nga yamuzwisile ichichingane ukuti anyamule , ukumukonkha Yesu. ²⁷ Iwumba lya wanthu, nayanachi yano ali nuluse nukumulosya weliwe, yamukonkhanga. ²⁸ Kweni pakuwalolechesya , Yesu watili,'' Mweyana yakwe Yelusalemu, mutandilila nene, kweni muyililile mwenga nga nayaninu. ²⁹ Lolini, amanda yakwiza pano yalati, ' Ayalotwe ayalya yano yasipapa pakuti ivipapilo vyawo visipapa, nga namayele yano yatonsyapo.' ³⁰ Apano yalitalika ukuvwanga kumyamba ,' Pona pali sweswe,' nga nakumawe,' tukupichilini.' ³¹ Muno nanthi yawomba ivinthu chino pano umuti yuchili uwisi, chiliwombwa ichani nanthi wiza wuma?'' ³² Ayanthu yawuze, ayononyi yayili, yasenzilwe ponga nawe ukuti yakawakome ponga . ³³ Lino yiza pamasyo yano yamwanga '' Ipanga '' palya yizile yamusamika nga nawononyi- wenga kuli ndilo na wenga kuli kamani. ³⁴ Yesu watili , '' Tata, yatetelini, muno yatamanyile vino yakuwomba .'' Yizile yapanga amayere, ukugawana ivizwalo. ³⁵ Ayanthu yimilile yakulolechesya pano ayakoleleli nawo yamusowekanga , nukuti,'' Wapususyanga ayawuze. Mulekini, nanthi a Khirisitu wakwe Leza, umusolwa.'' ³⁶ Ayakeya nawo yamusowike , ukumupalamila , yamupile ichakumwa , ³⁷ nukuti,'' Nanthi we mwene wawa Yuda , yipisusye wenga .'' ³⁸ Palinji nichilanjizgo pali weliwe,'' Wi ali mwene wawayuda .'' ^{39 40} Wenga wakwe yano yononyile wino walelembanga wamusowike pakukuvwanga uwuyi nukuti ,'' Siwe Khilisitu? Yupususye wenga nasweswe.'' Kweni umuze wamukanizge , pakuvwanga ukuti ,'' Utakutina Leza, pano nawe uli muwupingulo wonga ? ⁴¹ Swemo tulingine tuye nadi pano, muno tukupochelera chino chitulingine muvyakuwomba vitu. Kweni umonsi wino atawomba nachimwi ichiyipe.'' ⁴² Apano watili,'' Yesu , nkhumbukini nanthi wiza muwumwene wako .'' ⁴³ Yesu watili kuli weliwe,'' Ichendi nkhuti kuli wewe , ilelo umaya nanene mu Paradizi.'' ⁴⁴ Insita yapalamilanga kwi ola lyakwe lisano na lyonga , apano ifwinzi yaponyile pansi yonsi paka pansita yali ola lyakwe lisano nayanayi ⁴⁵ pano ukuwala kwilanzi kwaposilwe. Apano ichimwenda chamung'anda yamapepo chalepwike payili. ⁴⁶ Ukulosya namazwi yapapela , Yesu watili , '' Tata , umumakasa yinu nkhuyika umupasi wane .'' Lino wavyanga chino , wafwile . ⁴⁷ Lino umukeya walola chino chawonvilwe , wamulumbula Leza , watile ,'' Ichendi wino walinji umunthu umulungamane.'' ⁴⁸ Lino iwumba lyonsi lino lyizile ukuti lyize liyichile uwukamboni pali chino chalolike yaweni chino chawovwilwe , yaweliwe kuno yakuma ivifuwa vyawo . ⁴⁹ Kweni wonsi yano yamumanyile , nayanachi yano yamukonsile ukufuma ku Galileya , yimilile apatali, ukulolechesya ivinthu vino . ⁵⁰ Lemasyini, pali umonsi wino wali a Joseph, wino wali wenga uwa yawonvwi. Wali umunthu umuzima nupya umulungamane. ⁵¹ Umunthu wino atazumile nukuputula kwakwe yakawomba navino yawonvwile . Wafumanga kumusumba wa Yudeya wuno wukazanwa mu Arimathea, nga walondanga umwene wakwe Leza. ⁵² Umunthu wino , lino waya kuli Pilate, wamukolowozizge ivya mwili wakwe Yesu. ⁵³ Wawusenzile , nukuwuvunga umwisanda, nukuwuyika umwilalo lino lyimvilwe piwe, kuno kuzikwe nanthi wumwi. ⁵⁴ Walinji uwanda wakusenganya , nga sabata wali pakutalika . ⁵⁵ Ayanachi yano yizile ponga na Yesu ukufuma ku Galileya yamukonsile nukulola ilalo namuno umwili wakwe wazichilwe. ⁵⁶ Yawelile nukusenganya utusalule nga namafuta . Apano pa Sabata yapuzile ukulingana nuwupinguzi.