¹ Bo anda sona pakumanyisya mumbali mu nyanja, abanthu abinji bakamubunganila. Po akiza akwera mubwato bo bukaba mu nyanja nukwikala mumo. Abanthu abinji bakikala mu lubazu lwa nyanja. ² Akabamanyisizganga ivintu ivinji mu vyili, na muvimanyisyo vyabo vyovino vyo akababuzga. ³ "Ivwa! umulimi akabuka pakupesa imbeyu. ⁴ Bo akupesa, imbeyu yimo yikawira mumusewo, iviyuni vikiza nukuseba. ⁵ Imbeyu iyinji yikawa mu mabwemabwe, mo mutakaba ilyongo iliza. lubilolubilo yikamela chifukwa chakuti ilyongo litakaba lyinji. ⁶ Bo izuba lyafuma, imbeyu zila zikababuka papo yitakaba papo yitakaba po zikumila. ⁷ Imbeyu zimo zikawa mu minga.Imbeyu yila yikafyululuka chifukwa cha minga sona yitakapapa. ⁸ Imbeyu iyinji yikawila palyongo iliza yiyikamela nukongelezga ukugobola, sate, sikisite, nakahandiledi bwaka. ⁹ Po akati, " yo ali namakutu aghakwivwa ivwa! ¹⁰ Bo u Yesu alimwene, bobakaba papipi nawe na twelovu bala bakamulalusya ivya vili. ¹¹ Akanena nabo akati, " u Chala abavumbulile vyo vifisiwe ivyabumwene bwache. Loli abanthu abakunzi vyonsi vili mu vyili. ¹² Pakuti pala bakulinga, naloli bakulinga, loli batakulinga, nukuti pala bakwivwa, naloli bakwivwa loli batakwivwisya, pala bangang'anamuka uchala angabahobokela. ¹³ Akanena nabo akati, " mutakwivwisya ichili ichi? po inthi mwivwisye bulibuli ivili vyonsi?" ¹⁴ u mupesa mbeyu akapesa amazyu. ¹⁵ Aba bayanite bwaka nimbeyu zgo zikawa munzila, mo amazgu ghakapesiwa. Pala bivwa, lubilolubilo u satana akwiza nukusenda amazgu ghoghalumbiliwe kukwabo. ¹⁶ Aba bayanite nimbeyu zga mumabwe,bo pala bivwa amazgu lubilolubilo bakughapokela nulusekelo. ¹⁷ Loli ghate nimigululuzi, loli ghatakwikalamo akabalilo akatali. Pala inthamyo pamo ukuvwimiwa kwafika pachifukwa cha mazgu, bakuwa lubilolubilo. ¹⁸ Bope bamo bayanite nazgo zikawa muminga, aba bobo bakwivwa amazgu, ¹⁹ Loli bakusanzya nivya chisu nukudokela, ukuchighana ichuma nivinyenywa vyonsi ivyakulekanalekana vikwinjila nukufyululusya, ukuti batapenge imbeyu. ²⁰ Yila yoyikabyaliwa mu lyongo iliza bobala bobakwivwa amazyu, bakughitikizya nukupapa imbeyu sate, sikisite naka handiledi bwaka. ²¹ U Yesu akanena nabo, " mukwizanga ninyale munyumba nukuyibika mu chidudunga pamo pansi pabedi? mukwizanga nayo nukuyibika pabwelu. ²² Pakuti nachimo chochifisiwe chochitakwiza pakuvumbuliwa, sona nachimo chochakufisiwa chochitaliza pabwelu. ²³ Pala yumo ali namakutu aghakwivwila ivwe. ²⁴ Akababuzya akati, " teghelezya kuvyo ukwivwa, lyo ichipimo cho ukupimila cho inthi bakakupimile nuwe sona inthi bakakongezye ivyinji. ²⁵ Ichifukwa chakuti wensi yo ali navyo, kukwache inthi bakamupe ivyinji, sona yo ate navyo, na vyo ali navyo inthi bakamupoke." ²⁶ Akanena sona, akati ichinamwene chachala chili ngati wemunthu yo akupesa imbeyu pansi. ²⁷ Akuwona nu busiku akunyamuka pandabindabi, sona imbeyu zikupantha nukukula napo atakumanya namo zikukulila. ²⁸ Ichisu chikupapa chene imbeyu yikwanda ukupantha nukukula. ²⁹ Nanthi ichibyalwa chatona, po nalubilo akusenda ichigwagwa ichifukwa ukugobola kwafika." ³⁰ Sona aknena akati, " tungafwanikizya nichoni ichinamwene chakumwanya pamo chili buli cho tungabombela pakulingania? ³¹ chili ngati yombeyu ya masitadi yiyo, pala mwapesa, kakuba kanandi hee pakulusya imbeyu yonsi iya pachisu chapansi. ³² Napapo nanthi bapesa yikukula sona yikukula ukulusya imbeyu yonsi muchalo; sona yikupanga insamba inkhulu mumo niviyuni vyakumwanya vikuzengamo ivivulumbo mukazunda kache." ³³ Nivyili ivyinji akanena kukwabo, ukuti pamo bangivwisya. ³⁴ Sona atakanenangapo ukuleka ukubikamo ivili loli lyo aba mwene, akanena vyonsi kubakonkhelezi bache. ³⁵ Pisiku lila bo ichamabwila chafika, akababuzya akati, " zatuye kwisila ilinji," ³⁶ Bakaleka abanthu abinji, bakabuka poka nu Yesongati mo akabela mu bwato. Pakaba ama bwato aghanji ghoghakabukanga poka nako akayanga. ³⁷ Umwakowofya imphepo yikanda pakubala panyanja sona amayigha ghakanda pakwinjila mu bwato, bukizula amizi. ³⁸ U Yesu akaba munthende, akasipulanga pa mpando. bakamunyamusya bakati, " mumanyisi, utakupasya pakuti tuli pakufwa?" ³⁹ Akanyamuka, akayikalipila imphepo, sona akanena kunyanja akati " umutende wubepo" imphepo yikaleka sona kukaba umutende kukaba myaa. ⁴⁰ Po akababuzya akati, " chonicho mukowopa? ka muchili nilelo mute nulusubilo?" ⁴¹ Bakizula nubogha sona bakanena uyu kumunyanche uyu kumunyanche, " ka wewenu uyu, yuyo imphepo ninyanja vikumwivwila?"