¹ Bo twalaghana nabo, tukanyamuka nu bwato, tukaloboka mupaka piloboko lya konsi, ukufuma kula tukabuka mupala. ² kulanyenye tukabwagha ubwato bo bukayanga mu Fonike, po tukakwera tukubuka. ³ Bo twa kalinga akaya ka Sayipulasi, po tukakaleka, kumbali iya mongo ukwa bwato, tukabuka ku Siriya nukufika mu Tire, koka ubwato bukisizyanga ukatundu. ⁴ Bo twabagha abamanyili, po tukikala kula amasiku seveni. Pakulongoziwa nu muzimu bakadalinkhana ukuti Upaulo atayeko ku Yerusalemu. ⁵ Loli bo amasiku ghakwana, tukabaleka nukubukilira nubulendo bwiyu, bonsi poka, na bakazi na bana, bakongana nabo nukufumamo mu kaya kala. Tukafughamila pasi nukwiputa. ⁶ Po tukalaghana weka nu yunji. Po tukabuka pakukwera mu bwato, po abene bakanyokela kukwabo. ⁷ Bo twamala tukendelera nu bulendo ukufuma ku Tire, nukufika ku Putolema. Kulanye tukabalamuka aba wamwitu tukikala nabo isiku lyoka. ⁸ Ku ndabi yache tukabaleka nukubuka ku Kayisaleya. Tukinjira munyumba ya Filipu, yo mulimbilili, yo akaba uwabamo bala seveni, tukikala nawe. ⁹ Umunthu uyu akaba na balindu folo abasita kusendwa bo bakakubwanga. ¹⁰ Bo twikalapo pala ghamo amasiku, pala akisika yumo umukubwi izina yo we Agabasi. ¹¹ Akiza kukwitu nu kusenda ulamba wa Paulo. Akapinya ivinama vyache ni nyobe akanena, ''akati umuzimu ughu swepu akuti, 'po aba Yuda abamu Yerusalemu bakuzumupinya umunthu yo mwenecho wa lamba, po bakumubika munyobe zya ba kunzi.''' ¹² Bo twivwa ivi, twebonsi nabanthu bo bakikala pa malo ghala tukamulenga u Paulo ukuti atakayeko ku Yerusalemu. ¹³ Po u Paulo akamula, ''chochoni cho mukubomba, mukulira nukukomania umoyo wane? nthisenganizye, pakupinyiwa pene hagha, lori na pakufwa mu Yerusalemu pa chifukwa cha mwene u Yesu. ¹⁴ Bo u Paulo akana paku mupepeka, tutakanena nachimo nukunena ukuti, ''ubwighane bwa mwene bo bubombiwenge.'' ¹⁵ Bo amasiku ghenda, tukanyamula ivikwama vitu nukubuka ku Yerusalemu. ¹⁶ Bakabuka poka nuswe bamo abamanyiri bakafuma ku Kesaliya. Bakabuka nuswe ku munthu yo izina lyache Munasoni, umunthu uwa mu Sayipulasi, sons akaba mumanyiri, wakwanda weyo inthi twikale nawe. ¹⁷ Bo twafika mu Yerusalemu, abakamu bakatupokera nubuhobosu. ¹⁸ Indabi yache u Paulo akabuka nuswe kwa Yakobo, nabasongo bonsi bakabako. ¹⁹ Po akanda abalamuka bonsi, abalongoselera choka-choka pa vyo u Chala akabomba paba kunzi ukwendera mu butumwa. ²⁰ Bo bivwa ichi, bakamupala u Chala nukunena kukwache, wabalinga, abakamu, ghali ghalinga amsawuzani bo bitiki paba Yuda. Bonsi bipile pakukonkha indaghilo. ²¹ Bakanenanga ivya uwe, ukuti ukamanyisyanga aba Yuda bo bakwikala mu bakunzi ukuti bamukane u Mozesi nukuti batakabasilimulenge abana babo, sona ukuti batakakonkhe imyiko yabo. ²² Ka tubombe ichoni? naloli bakwiza pakwivwa ukuti wafika. ²³ Bomba cho tukukubuzya. tuli nabanthu folo bo balapite. ²⁴ Basende abanthu aba nukubomba imyiko iya kwiswefya, nuku balipilila, ukuti bamwenge isisi kumitu yabo. pa abanthu bonsi bakwiza ukumanya ukuti vyonsi vyo bakanena vikaba vya bumyasi. Bakwiza ukumanya ukuti numwe mukwikala akiza, nukusunga indaghilo. ²⁵ Loli abanthu aba kunzi bo bakaba bitiki, twabasimbila kwakuyana ninyinong'ono zyitu ukuti bipe bene ukufuma kuvinthu vyo vipeghiwe kuvifwani, ukufuma kwi daba, ukufuma ku chinyamana cho chanyongiwe bwaka, nukunyonywa pakughona nu mwanakazi. ²⁶ Po u Paulo akasenda abanthu, kundabi kwache akabomba nabo imyiko iyakwiswefya. Po bakabuka mu tempheli, nukubamanyisya abanthu amasiku aghakwiswefezya sona nivya kwipa vyo umunthu wensi abaghile pakubika. ²⁷ Bo amasiku seveni ghali papipi pakumala, aba Yuda bamo bakafuma ku Asia, bakamulinga u Paulo mu tempheli, akabungania ibumba lyosi nukubika inyobe papabo. ²⁸ Bakakolanga, ''mwe banthu ba mu Izilayeli, za mutwavwe. Uyu weyo munthu yo akamanyisyanga abanthu bonsi pakusamula uluko lwitu, indaghilo namalo agha. Pakongelezya, akiza sona naba Helena mu tempheli nukufisya amalo aghaswepu agha.'' ²⁹ Bakati bamulinga Trophimus uwaku Efeso numwene uwa kukaya akakulu, bakinong'ona ukuti akaba we Paulo weyo akamwinjizya. ³⁰ Akaya konsi kala kakizula ni vyongo, sona abanthu bonsi bakasamalila poka, nukumukola u Paulo. Bakamusumbila kunzi kwa tempheli, aponye na ponye imilyango yikighaliliwa. ³¹ Bo abanthu bakuyezya pakumukoma umwene, amazyu ghakatukiwa kwa songo wa basilikali ukuti akaya konsi aka Yerusalemu kizwile ni vyongo. ³² Aponye na ponye akasenda aba silikali na basongo bamo nukusamalila kwi bumba. Bo abanthu balinga umusilikali usongo naba silikali , bakaleka ukumuma u Paulo. ³³ Umu silikali usongo akafika nukumukola u Paulo akamulamula ukuti apinyiwe ni mphingwi zibili. Po akalalusya ka wewenu umunthu uyu sona navyo abomba. ³⁴ Bamo mwibumba bakakolanga ichinthu choka bamo abanji ichinji. Umwakuti usongo mwabasilikali akapotwa pakuchagha ichenecho cho chikabombiwa pachifukwa icha vyongo, akalamula ukuti bamusende u Paulo nukumubika mu jele. ³⁵ Bo bafika apakukwela pakuya mu nyumba, abasilikali bakumunyamulila mumwanya pakuti ibumba likakalala nkhani. ³⁶ Abanthu bonsi bo bakamukonkha mwisinda bakakola nkhani,''Fumapo nawe.'' ³⁷ Bo u Paulo bali papipi nukumwinjizya mu jele akanena kwa songo wa basilikali, ''ka kwitikiziwa ukuti une nene chimo kukwako?'' Usongo wabasilikali akati, ''ka ukunena ichihelena?'' ³⁸ Ka twewe munthu wa mu chisu cha mu Ijiputi yo akandizyanga ivyongo mukabatangilila abanthu folo saghuzani aba vyongo mu Assessins munkholongo?'' ³⁹ Upaulo akati, ''une ne muyuda, ukufumila kukaya akakulu aka Talisisi mu Silisha. Tene mu yeni nemwenecho wa mukaya akakulu kanonyene. Nkubalenga, munitikizye ukuti nene kubanthu.'' ⁴⁰ Bo usongo wa basilikali amwitikizya, u Paulo akimilila apakukwelela pakuya munyumba akanena ku banthu pakubovya inyobe. Bo baba myaa, akanena kukwabo muneno iya chihebele. umwene akanena,