¹ Bovyachitika ivi Upaulo akafumamo mu Athens nukuya ku Corinte. ² Kula akakumana nu muyuda izina lyache Aquila, mumutundu wa Pontus, yo akafumila bwile ku Italy numukazi wache u Priscilla, chifukwa u kolodiyasi akalamura abayuda bonsi ukuti bafumemo mu Romu. Upaulo akabuka nabo, ³ Chifukwa akikara nabo akabomba nabo poka imbombo ya kusona imikanjo ya kughuzya. ⁴ Upaulo akabamanyisya isiku lyosi musinsgogi umwa kubakopa abayuda naba Giliki. ⁵ Bo u Silasi nu Timoti biza ukufuma ku Masedoniya, Upaulo akakoleka na mazyu, nukuyapapeleka ubukamboni kubayuda ukuti Uyesu weyo we Kilisiyu. ⁶ Bo abayuda bamususya nukumutuka, Upaulo akabatayila umukanjo akanena nabo, ''udaba winu abe pamitu yinu; une nemwiza bwaka. Ukufuma ilero nkuya kuba mitundu.'' ⁷ Akabaleka nukuya munyumba ya Titius Justus, umunthu yo akumwiputa Uchala. Inyumba yache yikaba kupipi ni Sinagogi. ⁸ Crispus, usongo wa sinagogi, akasubila mwachala, poka nu luko lwache losi; abinji aba Colinte bobakivwa bakasubila sona bakoziwa. ⁹ Uchala akanena nu Paulo pa busiku mumaloto, ''utakoghope, nena nukubomba utakatebe bwaka. ¹⁰ Pakuti ndinuwe, nayumo yo anakupinya uwe, pakuti ndina banthu abinji mukaya muno.'' ¹¹ Upaulo akikala kula umwaka ghoka ni myezi 6, nuku manyisya amazyu gha Chala pakasi pabo ¹² Bo Ugalio yaba yo mfumu mukaya ka Achaia, abayuda bakaba nu mutu ghoka ukulimbana nu Paulo bakamusendela kumalo gha nongwa; ¹³ Bakanena, umunthu uyu abuzya abanthu ukuti bamwipute Uchala umwakususyana namalamulo. ¹⁴ Bo Upaulo inthi alonde ukunena, u Galio akanena, ku bayuda, mwe bayuda, nanthi naloli yikaba fundo ya bumyasi pamo nongwa imbibi, chali chakwenelela ukuti ndimbane numwe. ¹⁵ Loli pakuti ghomalalusyo pa mazyu na mazina mu malamulo ghinu, mulinge mwebene movingabela. Nthakulonda ukuti ninga lamula une pankhani zino ¹⁶ Ugaliyo akabafumiapo pa mpando wakulongela inongwa. ¹⁷ Po wakamukola Usositeni, usongo wa sinagogi, bakanda ukumuma kokunthazi kwa mpando wakulongela inongwa. Lori Ugaliyo atakaba navyo nombombo vyo bakabomba. ¹⁸ Upaulo, boikalako amasiku aminji, akabaleka abamwabo nukuya kusiliya nu Pulisila nu Aquila. Bobatafumitepo pa malo ghakukwelelapo, Cenchrea, akenela ukufumya isisi lyache chifukwa cha moba kivwanila. ¹⁹ Bobafika kuba Efeso, Upaulo akamuleka u Pulisila nu Aquila kulanye, lori umwene akaya musinagogi nukwanda ususyana na bayuda. ²⁰ Bo bakumubuzya Upaulo ukuti ikale akabaliro akatali, akakana. ²¹ Akababuzya, kwa umwe nthuzye tasi, nkuzukwiza kukwinu nanthi Uchala itikizya.'' Akafumako ku Efeso mungalawa ²² Bo Upaulo endela pa Caesaleya, akabuka nukulamuka ichalichi lya Yelusalemu akaghulumuka ukuya ku Antiyoki. ²³ Bo ikalako akabalilo panandi kula, Upaulo akanyamuka ubulendo ukuya mu vikaya vya Galatiya, Piligiya akanda ukubaghomya bosi abamanyili. ²⁴ Umuyuda yumo izina lyache Apolosi, mumphapwa ya alekezandiliya, akaya ku Efeso. Akaba munthu wa mahala mukanenele sona na mumasimbo. ²⁵ U Apolosi, akamanyisiwa hee nivimanyisyo vya Chala. Pakuba numuzimu uwalubilo, akanena nukubabuzya umwakolobela hee kwakuya ni nkhani zya Yesu, lori akamanya ulozyo lwa Yohani. ²⁶ U Apolosi akanda ukunena umwakujimba umoyo musinagogi. Loli bo Upulisila nu Akila bo bamwivwa, bakamusendela ku mbali nukunena nawe ivya Chala umwakolobela. ²⁷ Bo akwinong'ona ukuya muchikaya cha Achayi, abawamwabo bakamunyamusya lubilo nukumusimbila ukalata kubamanyili ba ku Achayi ukuti bamupokele. Bo afika, akabatula bosi bobakasubalila umwa chisa. ²⁸ Namaka ghosi u Apolosi akabasusya abayuda pa gulu lya banthu, umwakubalangizya amasimbo ukuti u Yesu weyo we Kilisiti.