2 ۔ تٕہ اسؠ چِھ زانان زِ یِژھ کٲم کرن والؠن ہٕنٛز عدالت چھے خدایہ سٕندِ طرفٕہ حقٕہ مطٲبِق سپدان۔ 3 ۔ ہؠو بایا، شٕہ یُوس یِژھ کٲم کرن والؠن پؠٹھ الزام چُکھ لگاوان تٕہ پانٕہ چُکھ سُوۓ کؠم کران۔ کیا ژٕہ چُکھنا یِہ سمجھان زِ خدایِہ سٕندِ عدالتٕہ نِشٕہ بچکھ ژٕہ؟۔
4 ۔ یا تِہ چُکھ ژٕہ تؠمسٕنٛز مٲربٲنی تٕہ برداش تٕہ صبرٕچ دولت حقیر زانان تٕہ یِہ چُکھنٕہ زانان زِ خدایہ سٕنٛز چھے ژے توبس کُن مائل کران۔ 5 ۔ بلکِہ چُکھ ژٕہ پننِہ سخت دِلہ تٕہ بِنا توبہ کرن والِہ دِلہ مطٲبِق تؠمِہ قہرکِہ دوہ باپَتھ پننِہ خٲطرٕہ غضبٕچ کٲم کران یَتھ منٛز خدایہ سٕنٛز پٔز عدالَت ظٲہر سپدِ۔
6 ۔ سُہ دِیِہ پرتھ کٲنسِہ پننؠن کامؠن مطٲبِق بدلٕہ۔
7 ۔ یِم اصلؠن کامؠن منٛز ثٲبت قدم رُوزِتھ جلال تٕہ عزّت تٕہ بقا ژھاران آسن، تِمن بؠییہ ابدی زندگی دِنٕہ۔ 8 ۔ مگر یِمٕہ نااِتافی اندازٕہ تٕہ حقَّس اِنکار کرن وٲلؠ بلکہ اپُز مزنَن وٲلؠچِھ، تِمن پؠٹھ سپدِ غضب تٕہ قہر۔
9 ۔ تٕہ مصیبت تٕہ تنگی ییِہ ہراکِس بدکار سٕنٛدِس زُوَس پؠٹھ گوڈٕہ یہودی سٕنٛدِس پتٕہ یُونٲنی سٕنٛدِس۔ 10 ۔ مگر جلال تٕہ عزّت تٕہ سلامتی میلِہ ہر اکِس نیک کٲم کرن وٲلِس، گوڈٕہ یہودِس پتٕہ یُونٲنِس۔
11 ۔ تکیازِ خدایہ سٕنٛزِ بارگاہِ منٛز چھؠنٕہ کٲنسِہ ہٕنٛز طرفددٲری یِوان کرنٕہ۔
12 ۔ امِہ موجوب زِ یِموٚ شریعت حٲصل کرنٕہ ورٲۓ گُناہ کوٚر سُہ سپدِ شریعتٕہ ورٲۓ ہلاک تِہ، تٕہ یِمو شریعتَس ماتحت ٲسِتھ گناہ تِہُنٛد سزا تِہ سپدِ شریعت مطٲبِق۔ 13 ۔ تکیازِ شریعت بُوزن وٲلؠ چِھنٕہ خدایَس نزدیک پزؠ زیٲرؠ کینٛہہ آسان بلکہ یِن شریعتَس پؠٹھ عمل کرن وٲلؠ پزؠ زیٲرؠ گنزرنٕہ۔
14 ۔ امِہ موجُوب زِ تِم قوم یِم شریعت چِھنٕہ تھاوان، چِھ پننِہ مِزازٕہ کنؠ شریعتٕچ کٲم کران تٕہ شریعت نَہ تھاونٕہ باوجود چِھ تِم پننِہ باپَتھ پانَے اکھ شریعت۔ 15 ۔ حالانکِہ تِم چِھ پننؠن دِلن پؠٹھ شریعتٕچ کتٕھہ لؠچھمژٕہ ظٲہر کران تٕہ تہُند دِل تِہ چُھ تِمن کتَھن ہٕنٛز گوٲہی دِوان تٕہ تِہندؠ أندرِم خیالات یا تِہ چِھ تِمن پؠٹھ الزام لگاوان یا چُھ الزام دِنٕہ نِشٕہ پَتھ ہؠوان۔
16 ۔ یمِہ دوہ خداۓ میانِہ خوشخبری مطٲبِق عیسیٰ مسیح سٕندِ ذریعہ انسانَن ہٕنٛزن پوشیدٕہ کتَھن ہُند انصاف کرِ۔ 17 ۔ ادٕہ اگر ژٕہ یہودؠ چُکھ وننٕہ یِوان تٕہ سریعتَس پؠٹھ تکیِہ تٕہ خدایَس پؠٹھ فخر کران چُکھ ۔
18 ۔ تٕہ تِہنٛز مرضی زانان تٕہ شریعتٕچ تعلیم حٲصل کرِتھ چُکھ زٕژٕہ کتٕھہ سپدان کران۔
19 ۔ تٕہ اگر ژے اَتھ کتِھہ پؠٹھ تِہ چِھی بھروسٕہ زِ بُو چُھس انؠن ہُند رہنُما تٕہ انِہ گٹِہم منز پؠمتؠن ہٕنٛدِ خٲطرٕہ چُھس گاش۔
20 ۔ تٕہ نادانَن چُھس ہؠچھناوَن وۄل تٕہ شُرؠن ہُند چُھس وۄستاد تٕہ علمُک تٕہ حقُّک یُوٚس نمونٕہ شریعتَس منٛز منز چُھ، سُہ چُھ مے نِش۔ 21 ۔ ادٕہ ژٕہ یُوٚس باقیَن چُکھ ہؠچھناوان تٕہ پننِس پانَس کیازِ چُکھنٕہ ہؠچھناوان؟۔ ژٕہ یُوٚس واعظ چُکھ پران زِ ژوٗر گژِھنٕہ کرنؠ، پانٕہ کیازِ چُکھ شٕہ ژوٗر کران؟۔
22 ۔ ژٕہ یِہ ونان چُکھ زِ زناہ گژھنٕہ کرُن۔ پانٕہ کیازِ چُکھ ژٕہ زِنا کران؟ ژٕہ یُوٚس پوتلؠن سٲتؠ چُُکھ نفرت تھاوان، پانٕہ کیازِ چُکھ ژٕہ مندر لُوٹان؟۔ 23 ۔ ژٕہ یُوٚس شریعتَس پؠٹھ فخر چُکھ کران تٕہ شریعتٕچ عدولی سٲتؠ کیازِ چُکھ خدایِہ سٕنٛز بے عزّتی کران؟۔
24 ۔ تکیازِ چانِہ وجہ سٲتؠ چُھ غٲر قومن منز خدایِہ سٕندِس ناوس پؠٹھ کُفر یِوان بکنٕہ۔ حالانکِہ یِہ چُھ لؠکِتھ تِہ۔ 25 ۔ ختنٕہ سٲتؠ چُھ فٲئیدٕہ تِہ بشرطیکِہ ژٕہ کرَکھ شریعتَس پؠٹھ عمل مگر ییلِہ ژے شریعتُک انکار کوٚرُتھ تٕہ چوٗن ختنٕہ چُھ نامختُون گنزرنٕہ یِوان۔
26 ۔ ادٕہ اگر نا مختُون شخص شریعتکؠن حُکمن پؠٹھ عمل کرِ کیا تیلِہ یِینا تؠمسٕنز نا مختونی ختنس برار گنزراونٕہ؟۔
27 ۔ تٕہ یُوس شخص قومیتکِہ وجہ سٲتؠ نامختون رُود اگر سُہ شریعتَس مکمل کرِ، تیلِہ کیا ژٕہ یُوس کلامکِہ باوجود تٕہ ختنکِہ شریعتٕہ سٲتؠ عدولی چُکھ کران۔ 28 ۔ تکیازِ سُہ چُھنٕہ یہودؠ یُوس ظاہرِی چُھ، تٕہ نَہ چُھ سُہ ختنٕہ یُوس ظاہرِی تٕہ جِسمٲنی چُھ۔
29 ۔ بلکِہ چُھ سوُی یہودؠ یُوس باطنی چُھ تٕہ ختنٕہ چُھ سوُی یُوس دِلٕہ سٲتؠ تٕہ روحٲنی چُھ نَہ کِہ لفظی طورٕہ۔ یِتھؠن ہٕنٛدؠ تعریف چِھنٕہ انسانَن ہنٛدِ طرفٕہ کینٛہہ سپدان بلکِہ چِھ خدایہ سٕندؠ طرفٕہ سپدان۔