2 یمؠُک تؠمؠٕ گوڈٕہ پؠٹَھے پننؠن نبیَن ہندِ ذریعہ کتاب مقّدسَس منز۔
3 پننِس فرزندس سٲنِس خداوند عیسیٰ مسیح سٕندِ نِسبتٕہ وعدٕہ کوٚرمُت چُھ یُوس جسمکِہ اعتِبارٕہ داوٗد سٕندِہ نسلٕہ سٲتؠٕ پٲدٕہ سپُد۔ 4 ۔ مگر پاکیزگی ہٕندِ روحکِہ اعتِبار سٲتؠٕ موردَو منزٕہ زندٕہ وَتھنکِہ وجہ سٲتؠٕ آو قُدرتٕہ سان خدایہ سُند نؠچو گٔنزرنٕہ۔
5 ۔ یمسٕندِ ذریعہ اسِہ فضل تٕہ رسالت میجؠٕ یُوتھ زن تؠمسٕندِہ ناوٕہ خٲطرٕہ سپدن تمام قومٕکؠٕ لوکھ ایمانَس تابع۔
6 ۔ یِمو توہِہ تِہ اُوو عیسیٰ مسیح سندؠٕ سپدن خٲطرٕہ ناد دِنٕہ۔ 7 ۔ تِمن سٲلمن ہندؠٕ ناو یِم رُوماہَس منز خدایہ سٕندؠٕ ٹھٲٹھؠٕ چِھ تٕہ یِمن پاک گژھنٕہ خٲطرٕہ ناد دِنٕہ آمُت چُھ۔ سٲنِس خدابَب تٕہ خداوند عیسیٰ مسیح سٕندِ طرفٕہ رُوزنو توہِہ فضل تٕہ اطمنان حٲصل سپدان 8 ۔ گوٚڈٕہ چُھس بُو توہِہ سارنٔی ہندِس برَس منز عیسیٰ سٕندِ وسیلٕہ سٲتؠٕ پننِس خدایہ سُند شُکر کران زِ تمام دُنیاہَس منز چھے تُہُندِ ایمانٕچ شُہرَت سپدان۔
9 ۔ چنانچہ یمِس خدایہ سٕنز عبادت بُو پننِہ رُوح سٲتؠٕ تؠمسٕنز نؠچِی خوشخبری دِنَس منز کران چُھس سُوئی چُھ میُوٚن گواہ زِ بُو چُھسو ہمیشٕہ توہِہ یاد کران۔
10 ۔ تٕہ پننؠن دُعاہَن منز چُھس بُو ہمیشٕہ یِہ درخواست کران زِ ونؠٕ گژِھ آخٕر کار خدایہ سٕنزِہ مرضی سٲتؠٕ مے توہِہ نِش یِنس منز کُنِہ پٲٹھؠٕ سپدٕن۔ 11 ۔ تکیازِ بُو چُھس شوقِین تُہندِ مُلاقاتُک تاکِہ بُو دِمہا توہِہ کاہنٛہ روحٲنی نعمت یمہ سٲتؠٕ توہؠٕ مضبوط گژِھؠو۔
12 ۔ غرض بُوتِہ لبٕہ توہِہ درمیان ٲسِتھ توہِہ سٲتؠٕ امِہ ایمان سٲتؠٕ تسلّی یُوٚس توہِہ منز تٕہ مے منز، دوشوُنی منز چُھ۔ 13 ۔ بؠیِہ ہے بایُو! بُو چُھسنٕہ یژھان زِ امِہ نِشٕہ روزؠو توہؠٕ ناوٲقف زِ مے کوٚر بار بار توہِہ نِش ینُک ارادٕہ تاکِہ یِتھٕہ کنؠٕ مے باقی غٲر قومَن منز پھل میُول تِتُھی میلِن توہِہ منزٕہ تِہ مگر ازتام ٹھہریُوس بُو۔
14 ۔ بُو چُھس یُونٲنیَن منز تٕہ غٲر یُونٲنیَن، داناہَن تٕہ نادانَن ہُند قرضدار۔
15 ۔ ادٕہ بُو چُھس توہِہ تِہ یِمٕہ رومہَس منز چِھ خوشخبری بوزناونٕہ خٲطرٕہ حتیٰ المَقدور تیار۔ 16 ۔ تکیازِ بُو چُھسنٕہ انجیلِ نِشٕہ شرم کران امِہ موجوب زِ سُوٚ چھے پرؠتھ اکِس ایمان انَن وٲلؠٕ سٕندِ باپَتھ گوڈٕہ یہودی پتٕہ یونٲنی سٕندِ باپَتھ نجات خٲطرٕہ سٕنز قُدرت۔
17 ۔ امِہ واسطٕہ زِ تَس منز چُھ خدایہ سُند پزر ایمان سٲتؠٕ تٕہ ایمان خٲطرٕہ چُھ ظٲہر سپدان۔ یتٕھہ کنؠٕ لیکِتھ چُھ زِ راستباز روزِ ایمان سٲتؠٕ زندہ۔ 18 ۔ تکیازِ خدایہ سُند غضب چُھ تِمن تمام بے دین تٕہ اپُزیٲرؠٕ لوکَن پؠٹھ آسمانٕہ پٹٕھہ ظٲہر سپدان یِم پزر چِھ اپزِ سٲتؠٕ کھٹِتھم تھاوان۔
19 ۔ تکیازِ یِہ کینژھا خدایہ سٕندِ نسبتٕہ معلوم چُھ سپدان تِہ چُھ تہندِس بٲطنَس منز ظٲہر۔ امِہ موجُوب زِ خدایَن کوٚر سُہ تِمن پؠٹھ ظٲہر کیا۔ 20 ۔ تکیازِ تیمسٕندؠٕ نادِید صِفت یعنی تؠمسٕنٛز اَزلی قُدرت تٕہ اِلُوہیَت چِھ دُنیا پٲدٕہ سپدَنٕہ وقتٕہ پؠٹھٕہ بناونٕہ آمتؠو چیزن ہندِ ذریعہ معلوم سپدِتھ صاف اتِھہ یِوان، یوتانؠٕ زن تِمن کاہنٛہ عُزُر باقی چُھنٕہ۔
21 ۔ امِہ موجوب اگر زَن تِمو خداۓ زون تِہ، مگر تؠمسٕنزِخدٲئی لائق کرٕکھ نٕہ تؠمسٕنٛز عبادت تٕہ شُکر گزٲری کینٛہہ بلکِہ پے بٲطِل خیالاتَن منز تٕہ تِہندؠن ناسمجھ دِلن سپٕز انِہ گٹٕہ۔ 22 ۔ تِم بنے پنُن پان دانا زٲنِتھ بیقٕل۔
23 ۔ تٕہ لافٲنی خدایِہ سُند جلال بدلووُکھ فٲنِی انسان تٕہ جاناورن تٕہ چاروایَن تٕہ کؠمؠن کرٕیلَن ہٕنٛزِ شکلِ منز۔ 24 ۔ امِہ موجوب ترٲؠٕ تِم خدایَن تِہندؠو دِلچؠو خوٲہِشو مطٲبِق تِم ناپٲکی منز زِ تِہند بدن یِن پانٕہ ونؠٕ بے عزّت کرنٕہ۔
25 ۔ تکیازِ تِمو بدلو خدایہ سُند پزر اپزِسٲتؠٕ تٕہ کٔرٕکھ مخلُوقاتَن ہٕنٛز زیادٕہ پرِستِش تٕہ عبادَتھ بنسبتِ تؠمِس خالِق سٕنز یُوس تا ابد محمُود چُھ۔ آمین۔ 26 ۔ تؠمے وجہ کِنؠٕ ترٲؠٕ خدایَن تِم گندٕ عادتَن منز یوتانؠٕ زن تِہنزو زنؠو فطرتِی جِنسی تعلقات بجائے غیر فطرتِی جِنسی تعلقات اپنٲؠٕ۔
27 ۔ یتَھے پٲٹؠ گٔے مرد تِہ زنؠن سٲتؠ جِنسی تعلقات ترٲیِتھ پانٕہ وٲنؠٕ شہوژن منز مست۔ یعنی مردو کٔر مردَن سٲتؠ غلط کٲم تٕہ کرِکھ پننؠ پان گُمراہی ہنٛدِس سزاہس لائق۔ 28 ۔ تٕہ یِتھ پٲٹھؠ تِمو زانُن زنُن ناپسند کوٚر۔ تتَھے پٲٹھؠ دِژ خداین تِہ تِمن بیقٕل عقل زِ نالائق حرکتٕہ کرن۔ 29 ۔ اتی آئؠ تِم پرتھ رنگٕہ اپزِ، بدی یہ، لالچِہ تٕہ بدذٲتی سٲتؠ بھرنٕہ تٕہ سپدؠ قتل، لڑایہ، مکٲری سٲتؠ معمُور تٕہ بؠیہ غٲبت کرن وٲلؠ۔
30 ۔ تُہمت لگاوَن وٲلؠ، خدایس نِش نفرت کرن وٲلؠ، باقین بے عزت کرن وٲلؠ، مغرُور، ٹھٹٕھہ باز، بدی پٲدٕہ کرن وٲلؠ، مٲلِس ماجِہ ہنٛدؠ بافرمان۔
31 ۔ تٕہ ٲسؠ بیقٕل، فٕٹراون وٲلؠ۔ فطری محبتٕہ نِشٕہ خٲلؠ تٕہ بے رحم سپدمٕتؠ۔ 32 ۔ حالانکِہ تِم چِھ خدایہ سُند یِہ حکم زانان زِ یِژھ کٲم کرن وٲلؠ چِھ مۄتکِس سزہَس زانان، توتِہ چِھنٕہ تِم پانَے یوٚت یِژھ کٲم کران بلکہ چِھ باقیَن کرن والؠن ہندِہ سٲتؠ تِہ خۄش سپدان۔