¹ Cware mburotu nji akwesi Mujuda? Mi nchinji chi boozekeza mu kuya ku mukanda? ² Mburotu munjira yonshe. Che ntanzi, a Bajuda kaba lisepete ke nsunuro yizwa kwa Nyambe. ³ Kebaka lyenji heba Bajuda bamwi kali kabena e ntumero? Okusha zumina kwabo kana kuora kureta o kusepahara kwa Nyambe kuba kwa bulyo? ⁴ Ne kusiye kuba bulyaho. Kunje ya bulyaho, mureke Nyambe a waniwa kuba ne niti, nanga kube ye yenshe o muntu a homa. Shina bulyaho ku ñoretwa, " ⁵ Kono haiba okusha chena kwenu ku sunda o kuchena kwa Nyambe, nzinji tuora kupanga? Nyambe aazya mafosisa hashi tuha o murandu heba nabengi, kapa akwesi? Ndi amba kokuya ko mukwa wa bantu. ⁶ Ne kusiye kuba bulyaho! Heba kali mbulyaho cware he mbuti nana atura Nyambe e fasi? ⁷ Kono heba e niti ya Nyambe mu kuhoma kwangu kureta oku mutemba kuzywire, nchinjaho ndishi aturwa mbwee mutendi we zibbi? ⁸ Nchinjaho katu ambi ye, shina bulyaho ba tuhambiliza kuti ye, mi shina bamwi ba goresa kute tuamba ye, ''Tu pange e zibbi, okutiye e zirotu nezi kezye''? E nkaturo hawiru lyabo iba botere. ⁹ Mbuti hape? Shetu linyansa tubeni? Kali bulyaho. Kakuli nitwa nyansa kare a Bajuda na Bagerike, bonshe bonshe, o kuba mu zibbi. ¹⁰ Eyi yina shina bulyaho ku ñoretwa: ''Ne kubure ozyo a rukite, nanga yenke. ¹¹ Ne kubure ozyo a shuwisisa. Ne kubure ozyo a shakashaka Nyambe. ¹² Bonshe niba zoka kuya kungi. Bonshe hantu honke bashi azya e ntuso. Ne kubure ozyo atenda e zirotu, aa, nanga yenke. ¹³ E milibu yabo nji bita li yarukite. E ndimi zabo zi homa. E chifo cha rukungwe china kwinshi ye ndimi zabo. ¹⁴ E miromo yabo i zywire o ku kuta ne ziambo zibbi. ¹⁵ A matende abo a hwera ku kutira maroha. ¹⁶ O bushinyi ne seheko zina mwi njira zabo. ¹⁷ Aba bantu bashini kuzyiba e njira ye mpore. ¹⁸ E ntiya ya Nyambe ya haazya ha mensho abo." ¹⁹ Hanu she tuzyi ye zonshe zo wu amba o murao, wu amba kwabo bena mwinshi wo murao. Eyi nkutiye o muromo no muromo wu tontore, mi no kute ye e fasi lyonshe ne libe noku litabilira kwa Nyambe. ²⁰ Eyi nkute ye kakuli no kubure o mubili newu cheneswe ke mitendo yo murao mu mensho akwe. Kakuli mwi njira yo murao mukezya o kuzyiba kwe zibbi. ²¹ Cware hanu kuzwisa ko o murao o kuchena kwa Nyambe nikwa zyibahazwa. Niya bonwa ku murao na Baporofita, ²² o kutiye, o kucheneswa Nyambe mu ntumero kwa Jeso Kiresite kwabo bonshe ba zumina. Kakuli kwaazya e nchinchano. ²³ Kakuli bonshe niba tenda e zibbi mi niba kangwa o kuba mbwee ndi nyambe. ²⁴ Baha mabaka niba rukuruhite ke chishemo chakwe mu kuhazwa ku zibbi kwina kwa Kiresite Jeso. ²⁵ Nyambe na ha Kiresite Jeso ye nchitabero mwi ntumero mu maroha akwe. Naa ha Kiresite ye mbo bupaki bo kuatura kwakwe, ke baka lyo kusha tonda e zibbi ²⁶ za mu kulindira kwakwe. Ezi zonshe niza tendahara o kusunda kuchena kwakwe mwa yinu nako. Ezi kaili kute ye a lisunde o kuruka yemwini, no kusunda ye atura neni neni kebaka lye ntumero kwa Jeso. ²⁷ Oku litunta nkokwi? Ku zwisitwe ho. Ke baka lyenji? Ke mitendo? Aa, kono ke baka lye ntumero. ²⁸ Tu manikiza kute ye o muntu a aturwa ke ntumero ni kwaazya e mitendo y murao. ²⁹ Kapa Nyambe ndi Nyambe wa Bajuda bulyo? Kali nde Nyambe we Zishi hape? Ee, Ngu bashi Zishi hape. ³⁰ Nali, njiniti, Nyambe yenke, nara atura o mukanda ke ntumero, mi no kusha ya ku mukanda mwi ntumero. ³¹ Haha tu wora kumanisa o murawo ke ntumero? Naku reke kuba bulyaho! Kunje ya bulyaho, tu kuteka o murawo.