¹ Paho ninda bona ye muanja lya malyo lyozyu ka kere mu rubona mwina ebuka yina o muñoro noku-noku ne yi ramikitwe ke ziramatera ze anja-ni-zobire. ² Mi ninda bona er ngiroyi lina a manta kali shumbura ke zywi li wongoza ye, ndini a botere o kucerura e ziramatera no kuarura e buka. ³ Kono ka kuazya muwiru kapa hanshi kapa kwinshi lye fasi ozyu kawora o kuvukura e buka tara kuyi tonda mukati. ⁴ Mi ninda lira no kulira kakuli kali ni kwa wanahara ozyu a botere o kuarura ebuka tara o kuyi tonda mukati. ⁵ Zyumwi wa bakuru paho shandita ye. Washa liri, tonde, ondavu wo rusika rwa Juda, Omwisi wa Davida, na a wora. Mi a wora o kuarura ebuka ne ziramatera zayo ze anja-ni-zobire. ⁶ Paho shendi bona enguana kayi bonahara shina sheyi yayiwa, kayi zyimene mukati ko rubona, karu zimburukitwa ku zibumbwa-Nyambe zone ezi zi hara na bakuru. Keena a manaka e anja-ni-obire na mensho e anja-ni-obire, eyo nje myuzya ya Nyambe ye anja-ni-yobire eyi ni ya tumiwa mwi fasi lyonshe. ⁷ Naa kezya no kuhinda e buka mu anja lya malyo lyo zyu ka kere mu rubona. ⁸ Mi aha sha hinda e zibumbwa-Nyambe zone e zi zinhara na bakuru ba makumi-obire-ni-bone ni ba wa hanshi habuso bwe nguana. Zyumwi no zyumwi ka kwesi e gitaya mimka ba kwatilire a mankwana e gauda a zywire insense, ezo nze ntapero za ba bacenete. ⁹ Mi kaba zyimba o ruzyimbo o ruya ye: O botere o kuhinda ebuka no ku ramutura ezi ramatera zayo, kakuli sho yayiwa, mi a bantu ni wa ba wulira Nyambe ka maroha ako, bazwa mu masika onshe ne ndimi ne mishobo na macaba. ¹⁰ Ni wa ba tenda o mubuso we cifumu na bapurisita aba ba sebezera Nymabe wetu, mi ni bara busa hanshi. ¹¹ Paho shendi tonda no kushuwa a mazywi a mangiroyi a mangi, emparo aha kaa kuma zikiti ze zikiti ze zikiti ze kumi zi kambisanywa. Kaa zimburukite o rubona ne zibumbwa-Nyambe zone ezi zihara na bakuru. ¹² Ni ba zyimba ko kuwongoza ye: Ozyu a botere ndi nguana, ozyu na yayiwa oku hewa o buyendesi no bufumu bo butali na manta ne kute ne tubo no kutembwa. ¹³ Paho shendi shuwa hangani cibumbwa-ntu muwiru na hanshi no kwinshi lye fasi no mu wate ni zonshe ezi zina mwazo, ne zizyimba ye: O kutembwa ne kute ne tubo no buyendesi zi be kozyu a kere mu rubona ni kwa nguana, ke nako ezi ka zimani nezi kazimani. ¹⁴ E zibumbwa-Nyambe zone ezi zi hara ni za ta ye: Ameni, na bakuru bo kutongama no kurapera.