1
Ninda vona muwiru chimwi chisupo echinene noku komokisa: Kakwina a mangiroyi e anja niwo ovire kaakwesi enkozi ze anja niwo ovire zama maninikizo, kakuli kazo nevu manikizwe o vuhali bwa Nyambe.
2
Hape ninda vona echi chivonahara shina ndi wate lye votera nilya shanganiswa no mulilo mi kuwezera ha wate kaku zyimene vena niva wora echivatana nechi swaniso chacho choku vumba ne mparo ye zina lyacho. Kava kwesi a magitaya aa niva hewa kwa Nyambe.
3
Kava zyimba o ruzyimbo rwa Mushe, o mukana wa Nyambe, no ruzyimbo rwa Nguana: '' Ye Ezitendantu zako nzinene no komokisa, Nfumu Nyambe, wa Mantawonshe. Okuruka ne niti nze njira zako, O Nfumu wa machava.
4
Ndini kali kakutiye, Nfumu, noku temba ezina lyako? Kakuli wenke vulyo o chena. Machava onshe naara kezya noku tongama havuso bwako kakuli ezi tendantu zako zi chenete niza vonahara.
5
Aha she kumana ezi ninda tonda, mi e tempere eyo yina o vupaki niya arurwa muwiru.
6
Mu tempere nimwazwa a mangiroyi e anja niwo vire kaa kwesi e nkozi ze anja nizo vire. Kaa zyavere mu lineni yi chena, yi kevera niya zwesi e minsunga ye gauda kuzimburuka e zizuva zavo.
7
Cware chimwi che zivumbwantu zone ezi zihara nicha tambika a mangiroyi e anja niwo vire enkwana ze gauda ze anja - nizo - vire ezi kazi zywire o vuhali bwa Nyambe, ozyu ahara vuharo kavumani.
8
Ne tempere niya zyura echusi kachizwa ku tuvo na manta a Nyambe mika kuazya ozywa wora ku kavira mu tempere mbwita enkozi ze anja nizo vire za mangiroyi e anja niwo vire shiza manikizwa.