¹ Aha kumana ezo kakwina mukiti wa Majuda, Jesu nayenda kwa Jerusarema. ² Kumbali ye chizyi che mberere mwa Jerusarema kaku kere echiziva choku shambira, mumushobo wechi Aramaic chikuiwa Betisaida, kachikwesi ezi shuka ze anjaa. ³ A vantu vangi vangi avo kavarwara, abofu, zihore, kapa kava kakatire o muvili kavarere kuko. ⁴ Kulindira a meni ye ayendeyende. Kakuli e Ngiroyi lyo Nfumu kali sukanga noka sukaura a menji mwi nako yimwinya. Yenshe vulyo kakavira mu menji shinga shea zukaurwa kahora kuzirwaro zonshe. ⁵ Kuko kakwina mukwame azyo narwara emyeka ya makumi otatwe niye anjaa niyo tatwe. ⁶ Jesu aho shamuvona narere aho, mi aku remuha ye ndikare nahura ho, aku amba kwakwe, ''Oshaka ye ohore?'' ⁷ O murwere wo mukwame akutava, Okutekeha, Ndaazya ozyo andivika mwichiziva choku shambira shinga sheya zukaurwa a menji. Shinga shendi kezya, zyumwinya ahita havuso bwangu.'' ⁸ Jesu aku muta, ''Zyimane, hinde ovuro bwako, mi oyende.'' ⁹ Haho vulyo nahozwa, mi nahinda ovuro bwakwe nakaya. Lilyo ezyuva kaili rwe Nsabata. ¹⁰ A Majuda voku amba kozyo nahozwa, ''Ndwa Nsabata, waazya ku zuminwa ku kulika eshasha lyako.'' ¹¹ Aku batava, ''Ozyo nandi hozi nandi sumwini ye, 'Nanune eshasha lyako oyende.''' ¹² Boku muvuza, ''Ndini zyuzyo mukwame nakuti vulyaho, 'Tore mi oyende'? ¹³ Aha kwina vulyaho, ozyo nahozwa kali kazyi ye ndini kakuli Jesu nazwaho kokuli hiba nakaya, kevaka lye xyandiya lya bantu mumo. ¹⁴ Kuzwaho, Jesu namuwana mwi tempere mi akumuta ye, ''Óbwene, niwa hora! Oreke kutenda ezibbi hape, okutiye echintu chibbi nachi reke ku tendahara kwako.'' ¹⁵ O mukwame okuzwaho nakaya noka sumwina a Majuda ye Jesu nandi hoza. ¹⁶ Kevaka lyezi zintu Majuda niva rwisa Jesu, Kakuli natenda ezi zintu rwe Nsabata. ¹⁷ Jesu aku vatava ye, ''Tata akwesi a tenda nanga hahanu, mi neme ndikwesi nditenda.'' ¹⁸ Kevaka lyezi, Majuda boku azyara kumuyaya kakuli kali nachola e Nsabata vulyo, kono nakuwa ye Nyambe Ndishi, nokuli vika haku yenderela ne Nyambe. ¹⁹ Jesu aku batava, ''Hawa, hawa, o Mwana kwaazya echo awora kutenda kakwe vulyo, mbita ezo avona Eshi nazitenda, kakuli ezo atenda Eshi, ne Mwane neye azitenda vulyaho. ²⁰ Kakuli Eshi ashaka mwane mi amusunda zonshe ezi atenda, mi nara musunda ezintu ezinene okutiye namu komokwa. ²¹ Vulyena Eshi avusa a vafu noku vaha vuharo, ne Mwane vulyaho aha vuharo kozyo ashaka. ²² Kakuli Eshi ka atuli muntu, kono naha ku atura kwa Mwane. ²³ Okutiye a vantu vonshe nava kuteke Mwane vulyaho va kuteka Eshi. Ozyo kaa kuteki Mwane kakuteki Eshi ozyo namutuma. ²⁴ Hawa, hawa, ozyo ashuwa ezywi lyangu noku zumina ozyo nandi tuma akwesi vuharo kavumani mi kali nanyansiwa, mi shana ku rufu kuya ku vuharo. ²⁵ Hawa, hawa, ndimi sumwina ye enako ikezya, mi njeyo inu, eyo a vafu navara shuwa ezywi lyo Mwana wa Nyambe, mi vavo vashuwa navara hara. ²⁶ Vulyena Eshi akwesi o vuharo, naha Mwane neye ave no vuharo bwakwe, ²⁷ mi Eshi naha Mwane a manta oku atura kakuli Mwane wo muntu. ²⁸ Mwasha komokwa kezi, kakuli ikezya nako eyo vonshe vena mu mabita navara shuwa ezywi lyakwe ²⁹ mi navara zwa mo: avo niva tenda o vurotu kuvukira o vuharo, mi avo niva tenda o vubbi kuvukira oku aturwa. ³⁰ Kwaazya echo ndiwora kulitendera ndemwini. Omo ndishuwira ndi atura, mi e nkaturo zangu zi chenete kakuli ndi tenda ezo ashaka ozyo nandi tuma. ³¹ Ati nandi toroka zangu, o vupaki bwangu kali vuve bwe niti. ³² Kwina ozyo aha o vupaki bwangu, mi ndizyi ye o vupaki ovo aha bwangu mbwe niti. ³³ Niwa tumiwa kwa Johani, mi na toroka ze niti. ³⁴ Kono vupaki ndiwani kavuzwi ku muntu. Ndi amba ezi zintu o kutiye namuhazwa. ³⁵ Johani kali rempe kali bbukuka noku venya, mi kamushaka oku voterwa mumuni kenako nini. ³⁶ Mi nanga kwakwina vulyaho o vupaki ovo ndikwesi vuhita bwa Johani, ke mitendo eyo nandiha Tata ye tende nenja, mitendo eyo nditenda, i amba zangu okutiye Tata nandi tuma. ³⁷ Tata ozyo nandi tuma eye yemwini na toroka zangu. Kali mwashuwa ezywi lyakwe kapa okuvona omo afwanina. ³⁸ Mwaazya ezywi lyakwe li siyara kwenu, kakuli mwaazya ku zumina kozyo natuma. ³⁹ Mushakashaka mumañolo kakuli muazyara ye mumo momo mwina o vuharo, mi mañoro awo amba zangu, ⁴⁰ mi mwaazya kushaka kukezya kwangu okutiye namuwane o vuharo. ⁴¹ Ndaazya kutambura entuwo ku vantu, ⁴² kono ndizyi ye mwaazya erato mukatikenu lya Nyambe. ⁴³ Ninda kezya mwi zina lya tata, kono mwaazya kundi tambura. Mi zyumwinya ati nakezya mwizina lyakwe, mbomu mumutambure. ⁴⁴ Mbuti muwora ku zumina, enwe mu tambura entuhu izwa kwenu kono mwaazya ku shakashaka entuhu izwa kwa Nyambe yenke? ⁴⁵ Mwaazya azyali eme ndemwini nandira minyansa havuso bwa Tata. Ozyo ami nyansa ndi Mushe, ozyo kamwina ensepo kwakwe. ⁴⁶ Ati nimwa zumina Mushe, neme namundi zumina, kakuli nañora zangu. ⁴⁷ Ati kamu zumini ezo nañora, mbuti muwora kuzumina mazywi angu?''