¹ Omu Purisita o mukuru aku ta ye, ''Ezi zintu nga ze niti?'' ² Sitefani aku ta ye, ''Bakwangu nenwe beshwetu, mundi teeze: Nyambe we kanya na libonahaza kweshwetu Abrahama aha kena mwa Masopotami, na shini oka hara mwa Harani; ³ aku muta ye, 'Oreke e naha yako naba kwako, mi o yende kwi naha eyo kandi ku sunde.' ⁴ Mpaho sha reka e naha ya Chaludenisi noka hara mwa Harani, oku zwaho, mu rushara rwefu lyeshi, Nyambe na mureta mwi naha yakwe, omu muhara hanu. ⁵ Kali na muha chimwi mwa teni ye a jobore, inga, nanga aka ka likene oku lyata e tende lyakwe. Kono na sepisa - nanga Abrahama ka shini oku ba na bana - ye nara ha e naha okuba echi bono chakwe na behwe abo niba mu chilire. ⁶ Nyambe ka amba neye bulyena, ye a behwe bara ka hara enako i likene mwi naha ya bangi, noku ta ye aba zyaki beyo e naha bara kaba bika mu bukana noka ba tenda o bubbi ke zilimo zi likana e kumi lya makumi o ne. ' ⁷ Mi ndira atura e mishobo omo niba kabe zikonbwa,' checho a amba Nyambe, ' mi mu mashara ezo bara zwa mo no kezya kundi rapera mwe chinu e chibaka.' ⁸ Mi naha Abrahama e ntumererano yo mupato, cware Abrahama akuba eshi wa Isaka noku mu twara ku mupato nena mazyuba a likana e anja niwo tatwe; Isaka a kuba eshi wa Jakobo, mi Jokobo a kuba eshi waba patiliyeke be kumi nibo bire. ⁹ Aba patiliyeke kaba susuezwa o muna kwa Josepha noku mu ulisa kuma Igepita, mi Nyambe kena neye, ¹⁰ noku mu zwaka mwi shando lyakwe lyonsho, noku muha oku shemubiwa no butali ha buso bwa Faro, o murena wa Igepita. Faro aku muha obu yendesi mwa Igepita nize rapa lyakwe. ¹¹ Mweyo e nako ko kezya e njara mwa Igepita ne Kanana, ne shando e nene mi a beshwetu kali ka bena cho kulya. ¹² Kono Jokobo aha sha shuwa ye kwine obweke mwa Igepita, aku tuma beshukurwetu ka tanzi, ¹³ lya bili Josefa aka li bonahaza kuba mukurwe; mi e sika lya Josefa lyoku zyibahara kwa Faro. ¹⁴ Jakobo aku tuma ba nkuruyakwe ye ba boore baka sukurwire Jakobo eshi ye akezye kwa Igepita, nibe sika lyakwe bulyaho, kaba likana a makumi a likana e anja na makumi obire nabo ba likana e anja oku ba shanganisa. ¹⁵ Jakobo naka ya mwa Igepita; mi aka fwa, eye ni beshukurwetu. ¹⁶ Niba hindiwa oku twaliwa kwa Shechema noka ba ralika mwi bita elyo na ura Abrahama ke nteko ya silivera ku bana ba Hama mwa Shechema. ¹⁷ Shina e nako ye nsepiso aha shika ishunine, e nsepiso ina naha Nyambe kwa Abrahama, a bantu shika ba kulite noku hingiha mwa Igepita, ¹⁸ ku reta aho kukezya kuba no murena ungi wa Igepita, o murena ozyo kali kazyi za Josefa. ¹⁹ Ozyu murena aswana ka homenena bantu bentu noku tenda beshukurwetu obubbi, kaba bikisa bana babo mu bukababu, koku azyara ye tema kali kaba hare. ²⁰ Ke nako eyo na retiwa Mushe, kali murotu ha buso bwa Nyambe mi na reliwa emyezi yo tatwe mwi njuo yeshi. ²¹ Aha shika ora oku zwisizwa hanje, mwana wa Faro wechi nketu aku mu añura noku mu kulisa mani shina ndi mwane hawa. ²² Mushe na rutiwa ke ntuto zonshe zechi Igepita; mi ka gorete mu mazywi akwe nomu misebezi. ²³ Kono aho shi kene e zilimo zilikana makumi wone, aku azwara mu mozyo ye aka potere aba bwakwe, abana ba Isiraere. ²⁴ Aha ka bona o mwina Isiraere nenaho a tendiwa obubbi, Mushe aka mu zyaka noku mu boozere obubbi koku shopa omu Igepita: ²⁵ ka hupura ye aba kwakwe mbuba shuwisise ye Nyambe ke anja lyakwe ku zyaka kaba zyaka, kono kali niba mu shuwisisa. ²⁶ Ezyuba lizwa akezya ku bamwi bena Isiraere abo ka benaho niba likananisa; aku lika ye arete nkozo ku zyumi no zyumwi; aku ta ye, 'Bantu, muli bantu bonke; chinji aho muli kubaza?' ²⁷ Kono ozyo na foseza mu yenza aku mu nyikikira kwina, noku ta ye, ' Ndini na kuha obu yendesi no buatuli hawiru lyetu? ²⁸ Sho shaka oku ndi yaya, bulyena niwa yaya zywina omu Igepita e zyona?' ²⁹ Mushe aku butuka oku zwa ho aha sha shuwa bulyaho; aka ba mwizyira mwi fasi lya Midiami, oko na baka eshi waba bashimani bo bire. ³⁰ Ezi limo zi likana a makumi o ne aha shezi mana, engiloi lyoka li bonahaza kwakwe mwi haraupa lye Rundu lya Sinai, mu malimi o mulilo mu mutemwa. ³¹ Mushe aho sha bona o mulilo, aku komokwa kecho ka bwene; shina ho kaka bu shunina ye a tondese, ko kezya ezywi lyo Nfumu, lita ye, ³² 'Ndime Nyambe ubesho, Nyambe wa Abrahama, niwa Isaka, niwa Jakobo.' Moshe ka tutuma mi kali ka ora oku tonda ko. ³³ Onfumu aku muta ye, 'Zwise e nshangu zako, e chibaka echo zyimene hacho chibaka chi chena. ³⁴ Za chaha ninda bona a mazeyazeya a bantu bangu abo bena mwa Egepita; Ninda shuwa echi tongo chabo, mi nda kezyi hanshi o kezya kuba zyakwira; cware hanu, mbondi ku tume kwa Igepita.' ³⁵ Mushe ozyo niba kana, aha niba ta ye, 'ndini na kutenda o muyendesi no muatuli?' - ndeye na tuma Nyame kuba o muyendesi no mupulusi. Nyambe na mutuma ke anja lye ngeloi elyo nilya ka bonahara kwa Mushe mu mutenya. ³⁶ Mushe naba hitira oku zwa mwa Igepita, mu rushara roku tenda e makazo ne zisupo mwa Igepita noku Wate lya menji a Subira, nomwi haraupa mwi nako ye zilimo zi likana a makumi o ne. ³⁷ Ndi Moshe ozyo aswana ozyo nata ku bantu ba Isiraere, 'Nyambe nara busa o muporofita mu kati kenu, omuporofita ozyo afwana neme.' ³⁸ Ozyu ndo mukwame ozyo kena mwi nkopano mwi haraupa ne ngeloi ezyo nilya amba kwakwe he Rundu lya Sinai. Ozyu ndo mukwame ozyo kena ni besukurwetu; ozyu ndo mukwame ozyo na amuhera ezywi li hara ye ali tuhe. ³⁹ Ozyu ndo mukwame ozyo niba kana oku kutika beshukurwetu; niba mu nyikikira kwina oku mu zwisa mu kati kabo, mi mu myozyo niba zoka oku boora mwa Igepita. ⁴⁰ Mweyo nako boku sumwina Aruni ye, 'Otu tendere e milimu eyo kai tu etelele. Haili kozyu Mushe, ozyo na katu etelela okuzwa mwi naha ya Igepita, katuzyi echo cha tendahali kwakwe.' ⁴¹ Boku tenda e namani mwawo mazyuba noka reta e zitabero ku chiswaniso, mi kaba tabite ke baka lye musebezi wa maanja abo. ⁴² Kono Nyambe aku zoka noku ba reka ye ba rapere e ntungwezi zaku wiru, shina omo ku ñorerwa mwi mbuka za ba porofita, ' Shemu ndi yayira e ñombe ne zitabero mu zilimo zi likana makumi wone mwi haraupa, enwe be njuo ya Isiraele? ⁴³ Nimwa amuhera e Tabanekere ya Moloke ne naleli ya mulimu Remufani, ne ziswaniso ezo nimwa tenda ye mwaku zi rapera; mi ndira mi twara o kure shilya ya Babilona.' ⁴⁴ Beshukurwetu ka bena e Tabenekire yo bupaki mwi haraupa, Shina bulyaho na raera Nyambe aha ka amba ne Mushe, ye a botere oku itenda ke chi swaniso echo na bona. ⁴⁵ Nje tente niba ka reta beshukurwetu, shiba ka zoka, oku ireta mwi naha ne Joshua. Ezi kazi tendahara shiba kabira mwi naha ya macaba abo na tanda Nyambe mu mensho a beshukurwetu. Mbo bulyaho ka kwina mani kutwara a mazyuba a Davida, ⁴⁶ ozyo na wana oku shemubiwa mu mensho a Nyambe; na kumbira ye a shakire Nyambe wa Jakobo e njuo. ⁴⁷ Kono Solomoni na zyakira Nyambe e njuo. ⁴⁸ Nanga ne kwina bulyaho, Ozyena ku Wiru ka hali mu njuo eyo niya zyakiwa nama anja; ku fwana necho na amba omuporofita nata ye, ⁴⁹ 'Ewiru ndo rubona rwangu, efasi chi lyatiro cha matende angu. Nji njuo yo buti eyo nondi zyakire? ku buza o Nfumu: kapa kwi china echi baka changu che mpumurero? ⁵⁰ Kali ma anja angu nia tenda zonshe zi zintu?' ⁵¹ Enwe mu bantu mu zyuminine e nsingo, noku sha zyeezwa mu mozyo na matwi, enako yonshe mu kana o Ruho ru Chenete; mutenda shina mbeshukurwenu buti kaba tenda. ⁵² Ndini waba porofita ozyo kali niba yaya sheshukurwenu? Niba yaya aba porofita abo niba kezya katanzi yo kezya kozyo Achenete; mi shemuli ba beteki na bayazi bakwe nenwe, ⁵³ enwe batu nimwa tambura o murao nia reta ama ngeloi, kono kali nimwa ubika.'' ⁵⁴ Bashi katengo ke nkuta aha shiba shuwa ezi zintu, niba shuwa oku kubaza ku mozyo, boku kwengera Sitefani a meno. ⁵⁵ Kono eye, na zyire o Ruho ru Chenete, aku tonderera ku wiru noku bona e nkanya ya Nyambe; mi aku bona Jesu na zyimene kwi anja lye chilyo lya Nyambe. ⁵⁶ Sitefani aku ta ye, ''Mubone, ndi bwene wiru li arukite, no Mwana wo muntu a zyimene kwi anja lye chilyo lya Nyambe.'' ⁵⁷ Kono bashi katengo nke nkuta boku lyongora hawa, noku zyimika matwi abo, noku mu hwerera bonshe, ⁵⁸ boka mu shohera hanje yo munzi noku mu pobaura na macwe: mi abo kaba tonderere zo niba ka bika ezi zyabaro zabo ha mauru o mukwame ozyo ka kuwiwa Saule. ⁵⁹ Aho ka benaho ba pobaura Sitefani, kenaho a kuwa Nfumu nata ye, ''Nfumu Jesu, o tambure o ruho rwangu.'' ⁶⁰ Aku tongama noku kuwa koku ongoza ezywi, ''Nfumu, oreke oku ba bika e chibbi.'' Aha sha mana oku amba bulyaho, aku pumura.