¹ Cware mu nkereke ya Antiaki, ka mwina ba porofita na bazyiizi. kakwina Baranabas, Simiyoni, (ka kuwiwa Nigeri), Lusiyasi wa Sireni, Manayeni (ozyo na reliwa kwa Heroda), ni Saule. ² Aho ka benaho ba rapera Nyambe noku linyima e zilyo, o Ruho ru Chenete roku ta ye, ''Mundi bikire kumbali Baranabasi ne Saure, oku tenda o musebezi owo ninda ba kuwira.'' ³ Aha ba mana oku linyima ezilyo, noku rapera, boku bika ama anja ha wiru lya bo bakwame, boku ba fundura. ⁴ Baranabasi ne Saure niba chilira o Ruho ru Chenete mi boku yenda kwa Selusia; aha baka fwiika mu chioli kwa Sipera. ⁵ Aha ka bena mu munzi wa Salamisi, niba amba ezywi lya Nyambe muma Sinagoge a Majuda. Hape kaba kwesi Joani Mareka o mutusi wabo. ⁶ Aha shiba mana oku yenda mu kati ke chioli chonse mani mbita kwa Pafosi, boka wana ko shi mabibo, o muporofita o buhata wechi Juda, E zina lyakwe kali Bare Jesu, ⁷ Ozyu shi mabibo kene chiyango no mubusisi, Seregiyasi Paulusi, ozyo kali mukwame a talifite. Ozyu mukwame aku kuwa Baranabasi ne Saure, kakuli ka shaka oku shuwa ezywi lya Nyambe. ⁸ Kono Elimasi '' shi mabibo'' (mbo bulyaho li toroka ezina lya kwe) kali na zuminizana nabo. Boku lika oku zora O mubusisi kumu zwisa mwi ntumero. ⁹ Kona Saure, ozyo ka kuwiwa hape ka Paurusi, ka zywire o Ruho ru Chenete, kamu tonderere hawa. noku ta ye, '' ¹⁰ Ewe we mwana Dyaburusi, ozwyire mifuta yonshe yo kuhoma no bubbi. Oli chira che mikwa yonshe eyo i chenete. Kali no reke oku zora enjira ezo zi ororokete za Nyambe, nora tenda? ¹¹ Hanu tonde, e anja lya Nyambe lina ha wiru lyako, mbo be chibofu. Mbo himuke ko boni zyuba. '' Haho bulyo aka bundu na kansinkwe zoku wira Elimasi; aku tatika oku yendaura naka bu buza bantu ye bamu hitire koku mu kwatilira kwi anya. ¹² Omubusisi aha sha bona ezo za tendahali, aku rumera, kakuli na komokwa ke ntuto zi amana no Nfumu. ¹³ Paulusi na bayenze bokuzwa mwa Paposi no kezya kwa Peraga mwa Pafilia. Kono Johani aku ba reka noku boora kwa Jerusalema. ¹⁴ Paulusi na bayenze boku yenda okuzwa mwa Peraga ko kezya kwa Antioki yakwa Pisidia. Oku boka yenda kuma sinagoge ezyuba lya rwe Nsabata noka kara hanshi. ¹⁵ Aho shiba mana oku bara e mirao neba porofita, aba etereli bama sinagoge boku ba tumina e ñusa ye, ''Bayawe, ati mukwesi e ñusa lye nsusuezo ku amana na bantu hanu, mu liambe.'' ¹⁶ Paulusi mpaho sha zyimana noku amba ke anja lyakwe; noku taye, ''Bantu ba Isiraere, nenwe mu kutika Nyambe, muteeze. ¹⁷ Nyambe wa bantu ba Isiraere na keta beshukurwetu no kutenda bantu ye ba hingihe aho ka bena mwi naha ya Igepita, mi ke anja kali nanukite na ba eterera oku zwa mo. ¹⁸ Ke zilimo ze likana a makumi o ne nena nabo mwi haraupa. ¹⁹ Aha sha mana oku sinya ama macaba e anja nio bire mwi naha ya kanana, akuha bantu betu e naha yabo ye bajobore. ²⁰ Ezi zitendo zonshe niza tendahara mu zilimo zi hitilira a makumi a makumi o ne na makumi alikana e anja. Aha shezi mana ezi zonshe, Nyambe aku baha aba atuli aku reta aha kezya kuhura Samwele omu porofita. ²¹ Mi bantu boku kumbira ye babe no murena, mi Nyambe aku baha Saule mwana wa Kisha, o mukwame ozyo kazwa mwi mushobo wa Benjamini, ye abe murena ke zilimo zi likana makumi o ne. ²² Nyambe aha sha muzwisa ha burena, aku busa Davida okezya kuba murena wabo. Kaili ku amana ne Davida Nyambe aho kata ye, 'Nda wani Davida mwana wa Jese aku ba o mukwame u tabera omozyo wangu, ozyo atenda zonshe ezi ndi shaka ye a tende.'' ²³ Ku behwe bozyu mukwame Nyambe na reta o mupurusi kwa Isiraere, Jesu, shina ho na sepisa oku tenda bulyaho. ²⁴ Ezi niza tatika oku tendahara tango, nashini okezya Jesu, Johani na tatika oku zyibisa ze nkorobezo yo kubaka ku bantu bonshe ba Isiraere. ²⁵ Johani aha shika ya kuku mana omu sebezi wakwe, aku ta ye, 'Ndini mu azyara ye ndime? Kali ndimo zyo. Kono muteeze, ozyo akezya mu rushara rwangu, enshangu zaku matende akwe ndaazya e nswanero yoku zi shumununa.' ²⁶ Bayawe, mu bana be sika lya Abrahama, ni bamwi mukati kenu abo ba rapera Nyambe, kwetu nibwa ka tumwa obu rumiwa bwe mpuruso. ²⁷ Kakuli abo ba hara mwa Jerusalema, naba busi babo, kali niba mu amuhera, mi niba bumbiliza omu ambiro wa baporofita eyo ina ku baliwanga e Nsabata zonshe ku amana noku munyansa. ²⁸ Nanga kali niba wana a mafosisa ao aora oku retefu, niba kumbira Pilato ye amu yaye. ²⁹ Aha shiba mana ezintu zonshe ezo zi ñoretwa oku amana neye, niba muzwisa ha chishamu noka mu ralika mwi bita. ³⁰ Kono Nyambe na mubusa ku bafu. ³¹ Na bonwa mazyuba mangi kwabo na kazwa nabo kwa Galileya oku ya kwa Jerusalema. Aba bantu she mpanki hanu ku bantu. ³² Tumi retera a mazywi marotu ku amana ne nsepiso ezo niza tendwa ku beshukurweto: ³³ ezi nsepiso na zitu mamerera Nyame, tu bana babo, koku busa Jesu hape. Echi hape checho nicha ñoliwa mwi mbuka wa Lisamu ya bili; 'Oli Mwanangu we chikwame, Eme shunu ndabi Shoo.' ³⁴ Noku ta ye na mu busa ku bafu oku tendera ye o mubili wakwe neu reke oku boora muku bora, na amba ye: 'Ndira miha ozyo a chenete ne nfuyauzi ya Davida.' ³⁵ Mpaho ata mwa Lisamu imwi ye, 'Kali ne mu zuminine wenu Ozyo a Chenete ye abone zo zibora.' ³⁶ Davida mwi sika lyakwe aho a mana oku tenda e ntato ya Nyambe, aku pumura, na ralikiwa ni beshi, mi niba bora, ³⁷ kono ozyo na busa Nyambe kali na bora. ³⁸ Cware i zyibahare kwenu, bakwanu, ye kozyu muntu enswarero ye zibi i ambiwa kwenu. ³⁹ Ka ye yenshe ozyo a zumina a shemubitwa kwi zintu zonshe ezo kali kau ora oku shemuba o murao wa Mushe. ⁴⁰ Cware hanu mu mamere ezintu zo na amba o muporofita ye nezi reke oku tendahara kwenu: ⁴¹ 'Mubone, enwe ba shwahuli, mu swabe mi hape mu sinyehe; Nditenda o musebezi mu mazyuba enu, O musebezi owo kali nemu zumine, nanga nazi mi zyibise o muntu.'' ⁴² Paulusi ne Baranabasi aho shiba nanuka, a bantu boku ba kumbira ye niba kezye ba ambe a mazywi aswana hape e Nsabata yi kenzya. ⁴³ O mukopano wa sinagoge aha sheu mana, obungi bwa Majuda nabo niba amuhera e ntumero ye chi Juda boku chilira Paurusi ne Baranabasi, abo niba amba kwabo noku ba sumwina ye ba zwire ha buso mu chishemo cha Nyambe. ⁴⁴ E Nsabata ye chilira, o munzi onswe kau shangene okezya ku shuwa enzywi lya Nyambe. ⁴⁵ A Majuda aha shiba bona e chinalyanga, boku fwa omuna noku amba e zintu zibbi kwezi ka amba Paurusi noku mutuka. ⁴⁶ Kono Paurusi ne Baranabasi boku amba niba gorete noku ta ye, ''kwa kuli ku butokwa ye ezywi lya Nyambe li ambiwe kwenu tanzi. Koku bona ye mwali timbili kure nenwe noku lihinda ye kamu swaneli o buharo ka bumani, mubone, mbotu zokere ku Machaba. ⁴⁷ Mbo bulyaho natu raeli Nyambe, nata ye, 'Ninda mi bika okuba omu muni ku Machaba, ye murete mpuruso kwi fasi lyo lina hanje.''' ⁴⁸ Ba Machaba aha shiba shuwe zi, niba ba mwi mboterwa noku rumbeka ezywi lya Nyambe. Shina obungi bwabo niba keterwa ku buharo ka bumani niba zumina. ⁴⁹ Ezywi lya Nyambe nilya hasanywa mwi zibaka zonshe. ⁵⁰ Kono Majuda boku shonga aba kentu ba kutekeha, naba kwame abo kabali ba kuru mu munzi. Boku susueza ye Paulusi ne Baranabasi ba shandiswe boka ba shohera shilya yo munzi wabo. ⁵¹ Kono Paulusi ne Baranabsi boku ba zukutwira e mbundu yaku matende abo. Niba kaya ku munzi wa Ikone. ⁵² Mi aba rutiwa ka bena mwi mboterwa mi kaba zwire o Ruho ru Chenete.