¹ Chipindi Yesu eze asele kulawa ko lugulu bunga kulu nadimtongela. ² Kaula mntu mta matana keza niyo amfikila madi kulongozi kwakwe, agamba Zumbe uneva kwemalanya kale wadaha kutenda nilenguke.

³ Yesu niyo anyolosa umkono wakwe amdonta, amgamba naunga ulenguke, aho aho niyo alenguka amatana yakwe. ⁴ Yesu amgamba usekulonga na mntu yoyose toza isila yako kwelagise mwenye mwa mlavyantambiko naho ulavye jeleko idyo alangise Musa. Kwachausa cha ukuzi wawo.

⁵ Umo Yesu eze abule Kapenaumu mkulu ywa wankondo niyo ambasa amuza, ⁶ agamba, Zumbe mndima wangu, kagona kukaya kaholomala naho alumiswa.

⁷ Yesu amgamba nanize nimhonye.

⁸ Mkulu ywa wankondo agamba, Zumbe miye sikuwagila hata wize wingile mndani mwe nyumba yangu longa ulosi du mndima ywangu ahone. ⁹ Kwaviya miye nami ni mntu mta udahi naho ni wankondo we hasi hangu. Ninalonga kwa yuno, hita naho aita, naho kwa mtuhu soo naye eza, naho kwa mndima ywangu Damanya vino naye adamanya ivyo”

¹⁰ Chipindi Yesu eze eve ivyo niyo ehelwa, awagamba wadya nandile wakamtongela Chindedi nawagambila sinati kuwona mntu mta utondowazi enga yuno mwe Izulaeli. ¹¹ Nawagambilani walozize naweze kulawa mashaliki na magalibi nawekale mwe imeza hamwenga na Ibulahimu, Isaka na Yakobo mo useuta wa ko ulanga. ¹² Mna wana wa useuta hawadulwe mwe chiza cha kuse, uko kuna kuguta na kusaga meno. ¹³ Yesu amgamba mkulu hita enga ivyo uzumile navitende ivyo kwako. Mndima naye niyo ahonywa mwe ichipindi icho.

¹⁴ Chipindi Yesu eze abule kwe inyumba ya Petulo niyo amuwona mkwewe Petulo kagona ana homa. ¹⁵ Yesu niyo amdonta umkono wakwe hooma yakwe niyo yamleka niyo enuka niyo akonga kuwasankanila.

¹⁶ Eze ibule chisingi wantu niyo wamletela Yesu walozize wata majini niyo awabalaza amajini wadya nawakalumwa wahona. ¹⁷ Kwaviya yachinta yadya yalongagwa ni Isaya muoni yeye mwenye nakaguha manyonje yetu kenula mapungufu yetu.

¹⁸ Akaheza Yesu eze awone bunga dimzumbuluka, niyo alagisa kwita ntendele ntuhu mwe bahali ya Galilaya. ¹⁹ Niyo mdolonyi eza kwakwe amgamba mhinyi nahutongele kokose na wite.

²⁰ Yesu amgamba mauzi ya malundu madege ya ko ulanga yana msasa, mna mwana ywa Adamu hana hakugoneza umtwi wakwe.”

²¹ Mwana mpina mtuhu amgamba, “Zumbe ndakunileka hamhambe tate.”

²² Mna Yesu amgamba nitongela waleke wabanike wahambe wabanike wawo.”

²³ Yesu eze engile mwe ingalawa, wanampina wakwe niyo wamtongela ko mtumbwi. ²⁴ Kaula niyo kwenuka mawimbi makulu mlanga mwe bahali mtumbwi niyo wagubikwa ni mawimbi, mna Yesu nendile kagona. ²⁵ Wanampina niyo weza kwakwe wamwinula wamgamba Zumbe chambule suwe, chonga chibanike!”

²⁶ Yesu awagamba, “kwambwani mogoha nyuwe utondowazi wenyu ni mdodo”? Niyo enuka niyo aikwahila impeho naho ibahali niyo yatongomala.

²⁷ Wagosi niyo wehelwa wagamba yuno mntu e zeze kugamba hata nkung'unto na bahali vya mwiva yeye?”

²⁸ Chipindi Yesu ezile ntendele intuhu ye isi ya Wagadala, wagosi waidiwata mpepo wadugana naye. Nandile wakalawa kwe zimbila nandile wakaleta vulugu vidala chiasi kugamba hakuna mtafi akudaha kugwila isila iyo. ²⁹ Kaula, niyo waguta wagamba, “china chibwani cha kudamanya kwako, mwana ywa Chohile? Kwiza hano kuchisulumiza kabula ya chipindi chetu kubula?” ³⁰ Haluse fyo kulu dya nguluwe nadikadimwa, nandile siyo hale sana na aho wendile.

³¹ Mpepo zajendeleza kufuzuma kwa Yesu zagamba, “Uneva nauchigambe chifose, chigale mwe idifyo dye izingulewe”

³² Yesu awagamba, “Hitani!” mpepo niyo zafosa niyo zaita zengila mwe zinguluwe. Naho wawona fyo dyose niyo dyafosa kulawa ko lugulu dyaseleza kwe ibahali dyose niyo dyafa mwa amazi. ³³ Wagosi nendile wakadima izinguluwe niyo wasumka eze waite kukaya niyo walonga mbuli zose, hasa chilaile kwa wadya wagosi nawana amajini. ³⁴ Kaula kaya yose niyo yafosa yeza kudugana na Yesu. Eze wamuwone wamgamba ahalawe mwe isi yawo.