¹ Mwa zuwa dya Yohana mtakubatiza nakeza akalonga mbuli zedi mwe nyika akalonga. ² Kweileni kwaviya useuta wa kwembingu wihaguhi.” ³ Kwaviya yuno nuyo alongigwe na muwoni Isaya kulonga “Izwi dya mntu akwitangwa kulawa kwenyika ikeni vyedi sila ya Zumbe yanyoloseni majinkilo yenyu.”’

⁴ Haluse Yohana nakavala mazoya ya ngamiya na msipi wa mkota mwechigudi chakwe, nkande yakwe nayendile ni sije na uchi wa mbago. ⁵ Niyo Yelusalemu Yuda yose na ntendele zose zizunguluke mto Yolodani niyo waita kwakwe. ⁶ Nawendile wakawambula kubatizwa naye mwo mto Yolodani kuno wakeila masa yawo.

⁷ Mna eze awone walozize wa Mafalisayo na Masadukayo wakeza kwakwe kuwambula na kuwabatiza niyo awagambila, Nyuwe lweleko lwa nyoka yeye usungu ni yani awafundile kuzenega izinkuto zikwiza? ⁸ Elekani matunda ya kunga kweila. ⁹ Naho msekufanyanya na kulosana mgati mwenyu chani naye Bulahimu enga tate ywetu kwaivyo nawagambilani Chohile adaha kumwinuila Bulahimu wana naho kulawa mwa mayuwe yano. ¹⁰ Hoya imalanywa kale mwa maizi yo mti. Kwaivyo chila mti haukweleka matunda yedi wakantwa na kudulwa mo moto.

¹¹ Nawabatizani kwa mazi kwachausa cha kweila mna akwiza badala yangu ni mkulu kujinka miye naho miye sikudaha hata kwinula vilatu vyakwe, uyo nawabatize kwa Muye Ukukile na kwa moto. ¹² Naho hetelo dyakwe di mo mkono wakwe kuhagila kabisa hantu hakwe na kuvika hamwenga ingano yakwe mwe digulu mna namyoke mbumba kwa moto ambawo haukudahika kukomwa.

¹³ Niyo Yesu eza kulawa Galilaya kubula mto Yolodani kubatizwa ni Yohana. ¹⁴ Mna Yohana nakaunga kumchinda akagamba, miye naunga kubatizwa ni weye, weye weza kwangu? ¹⁵ Yesu kamhitula amgamba Zumila itende vino haluse kwaviya nivyo ikuchunga kuichintiza uwagilwa wose niyo Yohana amzumila.

¹⁶ Bada yakutenda kabatizwa niyo Yesu afosa mwa mazi naho kaula niyo mbingu zagubuka kwakwe, na kauwona muyw wa Chohile ukasela kwa chilagiso cha kasuwamanga na kwikala mlanga mwakwe. ¹⁷ Kaula izwi nadilawa kwembingu dikagamba Yuno nuyo mwanangu humunga nuyo huwagilwa naye.