¹ Chipindi cha nomtondo chize chibule wakulu wose wawalavyantambiko na wadalahala watatu wadya njama kumlanga Yesu wapate kumkoma. ² Wamtaliza wamlongoza na kumbuza kwa liwali Pilato.

³ Akaheza chipindi yudya nendile kamhituka nakaona kugamba Yesu kasila kusulumizwa niyo eila na kuvuza vipate milongo mitatu vya hela kwa mkulu ywa walavyantambiko na wadalahala.

⁴ Nakulonga sidamanya wavu kwa kuhituka isakame heina lema mna niyo wahitula yachunga mbwani suwe? Yasinyeni ayo nyuwe wenye. ⁵ Akaheza niyo wavidula hasi mwe vikilo na kuhalawa zakwe na kwenyulika yeye mwenye.

⁶ Mkulu ywa walavyantambiko niyo aviguha viya ivipande vye ihela na kulonga sina halali ya kuika ihela ino mwe kijaluba kwaviya ni galama ya sakame. ⁷ Nawakalosana kwa hamwenga ihela itumike kugwila nkonde ya chilongo kuhambila wajeni. ⁸ Kwachausa chino inkonde iyo yetangwa nkonde ya sakame hata dyelo vino.

⁹ Akaheza udya ulosi nandile bulongwa ni muoni Yelemiya chani uchinte kulonga nawaguha vipande milongo mitatu vya hela galama ipangwe ni wantu wa Izulaeli kwachausa chakwe. ¹⁰ Na watumiya kwa nkonde ya chilongo saviya Zumbe anigambile.

¹¹ Haluse Yesu kachimala kulongozi kwa liwali na liwali amuza Togola weye ni seuta wa Wayahudi? Yesu amhitula weye walonga ivyo.

¹² Mna chipindi walongelezwe ni walavyantambiko na wadalahala hawahitule chochose.

¹³ Akaheza Pilato awagambila hwivile ukulongelezwa kokose kukulanga weye. ¹⁴ Mna hamhitule hata ulosi umwenga ivyo liwali niyo kamemwa ni kwehela.

¹⁵ Haluse mwe sikunkulu nendile kuna mazwela ya liwali kumfungwila mtalizwa yumwenga akusagulwa ni bunga. ¹⁶ Chipindi icho nakuna mtalizwa sugu zina dyakwe Balaba.

¹⁷ Ivyo ichipindi nandile wadugana hamwenga Pilato niyo awauza ni yuhi mkunga chimfugwile kwachausa chenyu? Balaba hegu Yesu akwitangwa Kulisito? ¹⁸ Kwaviya nakawamanya kugamba waheza kumgwila kwachausa cha maya.

¹⁹ Chipindi nendile wekala mwe chiti chakwe che nkanto, mvyele ywakwe nakamtumila ulosi na kulonga, Usekutenda mbuli yoyose kwa mntu yuo hena lema kwaviya sisumbuliwa vidala hata dyelo mwe sozi kwachausa chakwe.

²⁰ Niyo wakulu wawalavyantambiko na wadalahala watigizwa mo mdugano wamlombeza Balaba na Yesu akomwe. ²¹ Liwali awauza ni yuhi hagati ha waidi mkunga miye nimlekele kwenyu? Niyo walonga Balaba.

²² Pilato niyo awagambila ni mtende mbwani Yesu akwitangwa Kulisito? Wose wakahitula msulumize. ²³ Naye niyo alonga kwani ni ubanasi wani atendile? Mna iyo wajendeleza kuguta kwa izwi kubula kulanga vitendese msulumize.

²⁴ Ivyo chipindi Pilato eze awone hakudaha kudamanya dyodyose mna badala yakwe vulugu nendile zikonga niyo aguha mazi niyo ahaka imikono yakwe kulongozi kwe dibunga na kulonga, miye sina lema kulawa kwe sakame ya mntu yuno hena lema yasinyeni ayo nyuwe wenye.

²⁵ Wantu wose niyo walonga sakame yakwe naitende kulanga kwetu na wana wetu. ²⁶ Akaheza niyo amfunguila Balaba kwawe mna niyo amtowa mijeledi Yesu na kumwinkiza kwawe kwita kumsulumiza.

²⁷ Akaheza wankondo wa liwali niyo wamguha Yesu kubula kwa Pilato na bunga kulu dya wankondo wose naho waduganyike. ²⁸ Niyo wamvula izisuche zakwe na kumvala nkazu ya langi inkundu. ²⁹ Akaheza wadamanya taji dya miwa na kumvika kulanga ko mtwi wakwe, nawamwikiya mti mo mkono wakwe wa kulume niyo wafika madi kulongozi kwakwe na kumbela wakalonga ndamsa seuta ywa Wayahudi? ³⁰ Naho wamtwela mate niyo waguha mti na kumtowa mo mtwi. ³¹ Chipindi nandile wakambela nawamvula idya inkazu na kumvala izisuche zakwe na kumlongoza kwita kumsulumiza.

³² Weze wafose kuse niyo wamuwona mntu kulawa Kilene zina dyakwe Simoni ambaye wamkunkusa kwita nawo chani apate kuwinula umsalaba wakwe. ³³ Weze wabule hantu hakwitangwa Goligota mana yakwe gobela dya mtwi. ³⁴ Wamwinka siki ihanganywe na nyongo anywe mna eze ailume kadunduga kuinywa. ³⁵ Chipindi weze watende wamsulumiza niyo wapangana izisuche zakwe kwa kutoa kula. ³⁶ Nawekala na kumsinya. ³⁷ Kulanga ko mtwi wakwe niyo waika malaho kumlanga yeye yakasomeka Yuno ni Yesu seuta ywa Wayahudi. ³⁸ Wakupolaganya waidi wasulumizwa hamwenga naye yumwenga ntendele ya kulume mntuhu ntendele ya kumoso. ³⁹ Wadya nendile wakajinka nawabela wakasingisa singisa imitwi yawo. ⁴⁰ Na kulonga weye nandile ukaunga kubalanga vikilo kulu na kudizenga kwa mazuwa matatu kwekombole weye wenye hegu wi mwana ywa Chphile sela hasi ufose mo msalaba.

⁴¹ Mwe hali idya idya wakulu wawalavyantambiko nendile wakamsimanga hamwenga na na watakudolonya na wadalahala na kulonga, ⁴² Nkakombola watuhu mna hakudaha kwekombola mwenye, yeye ni seuta ywa Wayahudi nasele hasi kulawa mo msalaba nivyo nachimzumile. ⁴³ Nakamwegamila Chohile leka Chohile amkombole haluse hegu aunga kwaviya nakalonga miye ni mwana ywa Chobile. ⁴⁴ Nawadya watakupolanya nendile wasulumizwa hamwenga naye akaheza walonga milosi ya kubela.

⁴⁵ Haluse kulawa saa mtandatu nendile kuna chiza mwe isi yose kubula saa chwnda. ⁴⁶ Ize ibule sasa chenda Yesu kaila kwa izwi kulu, eloi, eloi, lama sabakisani? Mana yakwe Chohile ywangu, Chohile ywangu kwambwani kunasa? ⁴⁷ Chipindi ichi wasiku wakwe nendile wachimala ahadya wetegeleza walonga amwitanga Eliya. ⁴⁸ Nkana imwenga yumwanga ywawe niyo aguluka akuguha sifongo na kuimemeza chakunywa chisungu kaika kulanga ko mti kubula apate kunywa.

⁴⁹ Niyo wadya wasigale niyo walonga, mwaseni ichedu, chikaule hegu Eliya naeze kumkombola. ⁵⁰ Akaheza Yesu aila naho kwa izwi kulu nakulavya umuye wakwe. ⁵¹ Kaula paziya dye ivikilo ditatuka hantu haidi kulawa kulanga kubula hasi na hasi hazingiza luwe utulika vihande. ⁵² Mbila zigubuka na mili ya wakukile ilozize nendile igona ntogo niyo wauyuswa. ⁵³ Nakulawa kwe zimbila bada ya uyuso wakwe, niyo wengila mo mzi ung'azigwe na kuwonekana waloza.

⁵⁴ Bule yuda akida na wadya ambawo nendile wakamsinya Yesu niyo waona zingizo dya mbuli za kale zikulaila nawamemwa ni woga vidala na kulonga chindedi yuno nendile ni mwana ywa Chohile.

⁵⁵ Wavyele walozize nendile wamtongela Yesu kulawa Galilaya chani kumsankanila nendile wehadya wakamsinya kulawa kwa hale. ⁵⁶ Mgati mwawo nendile Maliyamu Magidalena, Maliyamu nine dya Yakobo na Yusufu na nine dya wana wa Zebedayo.

⁵⁷ Ize ibule diswele nakeza mntu mgoli kulawa Alimsaya akwitangwa Yusufu ambaye yuno nendile ni mwana mpina ywa Yesu. ⁵⁸ Niyo kamwitila Pilato na kumlombeza umwili wa Yesu, akaheza Pilato niyo asigila apate kwinkwa. ⁵⁹ Yusufu niyo auguha umwili nakuuvunga suche ing'aile yedi. ⁶⁰ Niyo augoneza mwe mbila pya yakwe nendile isongolwa mwe luwe, akaheza niyo afingilisa yuwe kulu niyo dyagubika mo mlango we mbila na kwita zakwe. ⁶¹ Maliyamu Magidalena na Maliyamu mtuhu nendile wehadya wekala wakasinya kwe mbila.

⁶² Zuwa ditongele ambadyo nendile ni zuwa dya mawandaliyo wakulu wa walavyantambiko na Mafalisayo wadugana hamwenga kwa Pilato. ⁶³ Wamgambila zumbe chabunkula kugamba chipindi yudya umdanti endaga mjima nakalonga badala ya mazuwa matatu nauyuke naho. ⁶⁴ Ivyo sigila kugamba mbila yamilwe vyedi kubula zuwa dya katatu. Vituhu wanampina wakwe wadaha kwiza kuubawa na kulonga kwa wantu kauyuka kulawa kwa wabanike na udanti wa udumo nautende wihisa kujinka udya wa nkongo.

⁶⁵ Pilato amagambila mlavyantambiko mwamizi hitani mkadamanye hali ya wedi ivyo mkudaha. ⁶⁶ Ivyo niyo waita na kudamanya mbila kutenda vyedi yuwe digongigwe mhuli na kwika wamizi.