¹ Kwaviya useuta wo kulanga wikala saviya nkonde. Enuke mtondo wa mavukuvuku chani kwika wandima mwenkonde yakwe ya mizabibu. ² Eze evane na wandima mazwela ya zuwa dimwenga awasigila kwita mwe nkonde yakwe ye mizabibu. ³ Nakaita naho eze yezeyabule masa matatu vino niyo awona wandima watuhu wakatenda wachimala hawana ndima mwe hantu he gwilo. ⁴ Awagamba nyuwe nanywi hitani mwe nkonde ye mizabibu naho chochose chitendile chedi naniwenke ivyo waita kudamanya ndima. ⁵ Aita naho yezeyabule masa mtandatu niyo mwe sa chenda niyo adamanya ivyo ivyo. ⁶ Nkanana ntuhu naho mwe sa mlongo na imwenga nakaita na kuwabwila wantu watuhu wachimala hawana ndima, niyo awagamba ni mbwani mchimala hano mmna ndima yoyose mwe dizuwa jima?

⁷ Wagamba kwaviya hachina mntu yoyose achinkile ndima, awagamba nyuwe nanywi hitani mwe nkonde ye mizabibu.

⁸ Ichipindi cha chisingi chize chibule umwenye inkonde ye mizabibu nakamgambila mchimaila wakwe, wetange wandima chani uwalihe kukongela na waudumo kubula wa nkongo. ⁹ Weze weve wadya wenkigwe ndima saa mlongo na imwenga wowo wahokela mazwela. ¹⁰ Weze weve wandima wa nkogo nawafanyanya kuhokela vitendese. Mna wahokela nawo chila yumwenga zwela imwenga chila mntu. ¹¹ Weze wahokele maliho yawo wamng'ung'zikila mwenye inkonde.

¹² Wagamba wano wandima wa udumo wadamanya sa dimwenga du mo kudamanya indima mna kuwaliganyiza na suwe, suwe chinula mizigo mwe zuwa jima na kokwa na moto.

¹³ Mna mwenye inkonde awahitula na kuwagamba mwe yumwenga wawo mbuyangu sikutendele mbuli ihiye, vino hwivane na miye mwe dinali imwenga? ¹⁴ Hokela chiya chili chiwagile kwako niyo wite zako, ni kwelelwa kwangu kuwenka wano wandima wenkigwe mo udumo vikuligana na weye.

¹⁵ Vino viha kwangu kudamanya chiya hunga mwe ugoli wangu? Hegu meso yako ni finju kwaviya miye ni ywedi? ¹⁶ Ivyo wa udumo natende ywa nkongo na wankongo ywa udumo.

¹⁷ Yesu eze atende kakwela kwita Yelusalemu nakawaguha wanampina wakwe mlongo na waidi hankanda na mwe sila awagamba, ¹⁸ Kaulani chajendeleza Yelusalemu na mwana ywa Adamu najelwe mwe mikono ya wakulu wa walavyantambiko na wakudolonya nawamkantile kubanika. ¹⁹ Naho nawamlavye mwe wantu wa si chani wambele kumtoa, kumsulumiza mna mwe mazuwa matatu nauyuke,

²⁰ Niyo mami yawo wana wa Zebedayo nakeza kwa Yesu na wavyele, nakafika madi kulongozi kwakwe na kumlombeza chintu kulawa kwakwe. ²¹ Yesu niyo amgamba, wonga mbwani? Amgamba ulonge kugamba wano wanangu waidi uwaleke yumwenga mkono wako wa kulume na uyumwenga mkono wako wa kumoso mwe useuta wako.

²² Mna Yesu ahitula na kumgamba, humanyize chiya ukulombeza vino wadaha kunywela chikombe hukinywela? Wamgamba chadaha.

²³ Awagamba chikombe changu chindedi namkinywele mna kwikala umkono wangu wa kulume na umkono wangu wa kumoso siyo mbuli yangu kuwenka mna ni kwe wadya ambawo wajika kusagulwa ni tate ywangu.

²⁴ Wanampina watuhu mlongo weze weve ivo, wehiwa vitendese na wadya walukolo waidi. ²⁵ Mna Yesu nakewetanga yeye mwenye na kuwagamba mmanya ya kugamba waseuta we isi wawatisa na wakulu wawo wadamanya udahi mlanga mwawo. ²⁶ Mna isekutenda ivyo, kwenyu badala yakwe yoyose akunga kutenda mkulu mgati mwenyu vyonga atende mndima ywenyu. ²⁷ Na akunga kutenda ywa nkongo mgati mwenyu vyonga atende mndima ywenyu. ²⁸ Enga viya mwana ywa mntu hezile kusankanilwa, na kulavya ujima wakwe kutenda wambulwa mwa walozize.

²⁹ Ichipindi wakalwawa Yeliko bunga kulu dyambasa. ³⁰ Niyo wawaona watuhu waidi wekala mnkanda mwe sila weze weve kugamba Yesu nendile akajinka waguta izwi na kugamba Zumbe mwana ywa Daudi uchifile mbazi. ³¹ Mna bunga dyawakwahila na kuwagamba nyamalani mna ivyo wowo waguta izwi vitendese na kugamba Zumbe mwana ywa Daudi chifile mbazi.

³² Niyo Yesu achimala na kuwetanga na kuwauza, mwaunga niwatendele mbwani? ³³ Niyo wamgamba Zumbe meso yetu yagubulwe. ³⁴ Niyo Yesu atenda kengilwa ni mbazi niyo awadonta ameso yawo aho aho wahokela udahi wa kusinya niyo wamtongela.