¹ Niyo Mafalisayo wadolonyi weza kwa Yesu kulawa na kugamba, ² Kwabwani wanampina wako wayabalanga mahokelo ya wadalahala kwaviya hawakuhaka mazi chipindi cho kudya nkande

³ Yesu awalandula awagamba nyuwe kwambwani mwabalanga lagizo dya Zumbe kwachausa cha mahokelo yenyu? ⁴ Kwaviya Chohile kagamba ktunye tatiyako na mami yako na kulonga akulonga vihiye kwa tati yako na mami yako chindedi nafe.

⁵ Mna nyuwe mwagamba chila akuwagambila ambaye akupata kulawa kwa miye haluse ni ntunyo kulawa kwa Chohile. ⁶ Mntu uyo hana haja ya kumtunya tate yakwe kwenamna ino mwipagula mbuli ya Chohile kwachausa cha mahokelo yenyu. ⁷ Nyuwe wafitini ni vyedi saviya Isaya ivyo aone mwe ivyo alongile. ⁸ Wantu wano wamtunya miye kwa milomo yawo mna imyuye yewo ihale na miye. ⁹ Mwanivikila bule kwaviya nawahinya mahinyo yana malagizo ya wantu.

¹⁰ Niyo wawetanga madugano na kuwagamba tegelezani naho mmanye. ¹¹ Hamna chintu chikugwila mo mlomo wa wantu kumtenda najisi bali chiya chikumlawa mo mlomo chino nicho chikumtenda mntu kutenda najisi

¹² Niyo wanampina wamwitila na kulonga na Yesu Togola wamanya Mafalisayo eze weve diya ulongile wakwazika. ¹³ Yesu awalandula kuwagamba chila mti ambawo tate wangu wa kulanga hauhandile na ung'olwe. ¹⁴ Walekeni ichedu awo ni vilongozi wa wawekuona saviya mntu hekuwaona b na mlongoze hewekuona mnyawe wose waidi na wagwele mwe bome.

¹⁵ Petulo alandula na kumgamba Yesu chigambile umligano uno kwetu.

¹⁶ Yesu niyo alandula nyuwe naho bado hamkubunkula. ¹⁷ Nyuwe hamkuwona kugamba chila chikwingila mo mlomo chajinkila kundani na na kwita kwe choo? ¹⁸ Mna vintu vyose vikulawa mo mlomo vyalawa mo muye nivyo vikumjela mntu unajisi. ¹⁹ Kwaviya mo muye mwalawa fanyanyi ya yehiye ukomi uchilanga, uchafu, ubavi, chindedi cha lulimi na mahuluto. ²⁰ Yano nayo ambayo yamjela mntu unajisi mna kudya bila kuhaka mwe mikono hakukutenda atende najisi.

²¹ Niyo Yesu ahalawa ahantu hadya na kwenega ajendeleza ntendela za mizi ya Tilo na Sidoni. ²² Kaula keza mvyele Mkanani kulawa ntendele izo kaguta lukunga agamba, niolela mbazi Zumbe mwana ywa Daudi mndele ywangu asulumizwa mno ni mpepo.

²³ Mna Yesu halongile mbuli wanampina wakwe weza wamunga wamgamba muse aite zakwe kwaviya achitula ulwasu.

²⁴ Yesu awalandula kuwagamba situmigwe kwe mntu yoyose ukaleka kwe ngoto zagile mwe nyumba ya Izulaeli.

²⁵ Niyo afunama kulongozi kwakwe agamba, Zumbe nambiza.

²⁶ Amlandula kugamba, siyo vyedi kuguha nkande ya wana niyo waduila makuli.

²⁷ Amgamba Zumbe hata ivyo wakulima wadodo wadya nkande ikugwa mwe meza ya zumbe ywawo.

²⁸ Nivyo Yesu amlandula na kugamba we mvyele utondowazi wako ni mkulu navitendeke ivyo ukunga naho mndele ywake niyo ahonywa mwe ichipindi icho.

²⁹ Yesu niyo ahalawa ahantu hadya niyo aita hajihi ne bahali ya Galilaya niyo aita kulanga ko lugulu na kwikala uko. ³⁰ Bunga kulu diza kwakwe na kumletela waholomale, matuntu, hewekulonga vimumu wakufena na watuhu walozize nendile wanyonje wawaika mwe viga vya Yesu na kuwahonya. ³¹ Niyo isi yehelwa ize iwone hewekulonga wakasimwila na hewekujenda waholomale, watendwa wajima hewekujenda watalamka hewekuona wasinya Wamtongela Chohile ywa Izulaeli.

³² Yesu kawetanga wanampina wakwe na kugamba, siionela mbazi isi kwaviya watenda na miye kwa mazuwa matatu bila kudya chintu chochose, saniwalage waite kwawo bila kudya wanase kuzimiya mwe sila.

³³ Wanampina wakwe wamgamba, ni kuhi chikudaha kuapata nkande ikuchinta hano he inyika kwigusa isi nkulu vino? ³⁴ Yesu awagamba mna migate mingahi? Mfungate na samaki wadodo wajeche.

³⁵ Yesu niyo alonga ne dibunga dikale hasi. ³⁶ Aiguha idya imigate mfungate na wadya samaki bada ya kutunya kamega na kuwenka wanampina wakwe wawenka idibunga. ³⁷ Wantu wose wadya na kuchinta niyo wakusanya viya visigale vihande vya nkade visigale ni vihande vimema ntangulu mfungate. ³⁸ Wose wendile ni wagosi elufu nne ukaleka wavyele na wana.

³⁹ Niyo Yesu adilaga idibunga waita kwawo niyo engila mndani mwe dihondo na kwita hantu ha mangalibi.