¹ Mwezua idyo Yesu kamlawa mwenyumba kakwikala mnkanda mwe bahali. ² Isi inkulu ukusanyana na kumzunguluka kengila mndan mwe hondo niyo ekala mndan mwakwe isi yose yachimala mnkanda mwe bahali. ³ Niyo Yesu alonga mbuli zilozize kwa mligano agamba kaula mhandi kaita kwekuhanda. ⁴ Chipindi akahanda baazi ya mbeyu zigwela mnkanda mwesila niyo wadege weza kuzidondola. ⁵ Izimbeyu izintuhu zigwela mlanga mweluwe izo hazipatile ulongo mwinji mna niyo zahota mna kwaviya ulongo hauna utali. ⁶ Mna zuwa ezedyake niyo zahya kwaviya hazina maizi niyo zanyala. ⁷ Mbeyu izintuhu zigwela mgati mwemiwa. Miti yemiwa niyo yatenda mitali niyo ifinyika. ⁸ Izimbeyu izimwenga zigwela mweulongo mtana na kweleka mbeyu ntuhu mala mia imwenga zaidi zimwenga milongo sita na izimwenga milongo mitatu. ⁹ Mwenye magutwi na eve.

¹⁰ Wanampina naweze kumgambila Yesu kwamba na walonga na maduganyo kwa mfano?

¹¹ Yesu awajibu awagamba mwinkigwa upendeleo wakumanya fiso za ukulu wa kulanga mna wowo hawanati kwinkwa. ¹² Mna yoyose ananacho kwakwe yeye na aongezwe zaidi naho napate faida nkulu mna henanacho hata kiya ananacho na hokwe. ¹³ Ivyo nalonga nao kwa mifano kwasababu ingawa wasinya wasekusinya ikindedi. Naho ingawa weva wasekwiva wala kumanya ¹⁴ Uoni wa Isaya uchinta kwao udya ukugamba mkeva msekwiva mna kwa namna yoyose hamuelewi wakati mkasinya mna kwa namna yoyose idya msekumanya.

¹⁵ Na imihenyo ya wantu wano itenda chiza ni midala kwiva naho wagubika ameso yao ili wasekudaha kusinya kwa meso yawo au kwiva kwamagutwi yawo au kumanya kwa mihenyo yawo ivyo wanihitukile naho na siwahonya

¹⁶ Mna ameso yangu yajimbikwa kwaviya yawona na magutwi yenyu kwaviya yeva ¹⁷ Kindedi nawagambila waoni wengi na wantu wenye chindedi nandile nawanankwina ya kuyawona mabuli yadya mkuyaona mna hawadahile kuyawona watamani kwiva mabuli yadya mkuyeva hawayevile.

¹⁸ Haluse tegelezani mfano wa mhandi ¹⁹ Mna yoyose akwiva mbuli ya ukulu nahakumanya nivyo ehiye kwiza nakupakula chihezize kuhandwa mndani moluhenyo lwakwe ino ni mbeyu idya mnkanda mwe sila ²⁰ Yudyaahandigwe moluwe ni yudya akwiva mbuli na kuhokela halaka kwa kwelewa. ²¹ Mna hana maizi mndani mwakwe mna avumiliya kwa chipindi chijihi mna nkunto na masulumizo yakalaila kwa sababu ya mbuli akobadika gafula. ²² Ahandigwe hagati hemiti ye miwa yuno ni yudya akwiva mbuli na mna masumbuko ya ulimwingu na udantilizi wa chipato yafinyika idye imbuli inase kweleka matunda. ²³ Ahandigwe mwe ulongo mtana yuno ni yudya akwiva imbuli na kumanya yuno ni yudya akweleka matunda na kwendelea kweleka dimwenga zaidi mala milongo kumi zintuhu milongo sita zintuhu milongo mitatu.

²⁴ Yesu kawenka mfano mtuhu agamba ukulu wa kulanga ufananishwa na mntu ahandile mbeyu zedi mwenkonde yakwe. ²⁵ Wakati wantu wakasinka mwihi wakwe keza kuhanda magugu mdya mwe ngano yakwe niyo ahalawa. ²⁶ Baadaye ingano ihota na kukonga kweleka niyo magugu yalaila ivyo. ²⁷ Awandima wa mwenye nkonde weza kumgambila Zumbe huhandile mbeyu ntana mwenkonde yako? Vitenda vihi mna magugu?

²⁸ Awagamba mwihi mwihi kadamanya dino wandima wamgamba kwa iyo waunga chite chikayang'ole?

²⁹ Mwente nkonde awagamba bule wakati wo kuvuna haunati mnang'ola amagugu namng'ole hamwenga ne ngano. ³⁰ Yalekeni yakule hamwenga mpaka umuda wo kuvuna nanilonge na wavuni kwanza ng'olani amagugu naho yatalizeni mabundu mabundu niyo mwayoka mna kusanyani izingano mwe digulu dyangu.

³¹ Niyo Yesu awalaviza mfano mtuhu agamba ukulu wa kulanga uligana na mbeyu haladali kwaiyo mntu kaiguha kakwihanda mwe nkonde yakwe. ³² Imbeyu ino kwa chindedi ni ndodo kuliko mbeyu ntuhu zose mna ikasitawi yatenda nkulu kuliko miti yose imwe busitani yatenda mti ukajika naho wadege wa kulanga weza kuzenga masasa mwa matambi yakwe.

³³ Niyo awagambila mfano mtuhu naho ukulu wa kulanga ni kama hamila idya iguhigwe ni mvyele na kuihanganya mwe vipimo vitatu vya unga mpaka vyumuke.

³⁴ Yano yose Yesu kayalonga mwe idibunga kwa mifano na hahena mifano halongile dyodyose kwawo. ³⁵ Ino itenda kugamba chiya chihezize kulongwa kujingkila kwa muoni kidahe kuchinta hadya alongile nanigubule mnomo wangu kwa mfano nanilonge mbuli ziya zandile zifishwa tangu msingi wo ulimwingu.

³⁶ Niyo Yesu awasa idibunga niyo aita kunyumba wanampina wakwe wambasa niyo wagamba kitafasiliye umfano wa amagugu ya kwenkonde.

³⁷ Yesu awajibu awagamba akuhanda mbeyu zedi ni mwana wa adamu. ³⁸ Nkonde ni ulimwingu na mbeyu ntana wano ni wadya wana wa ukulu magugu ni wana wa yudya umwihi na umwihi azihandile ni shetani. ³⁹ Na akuvuna ni mwisho wo ulimwigu na wakunga wavune ni wandima. ⁴⁰ Saviya magugu ya kukusanywa na kokwa moto ivyo nivyo vikunga vitende mwisho wo ulimwingu. ⁴¹ Mwana wa Adamu na qatume wandima wakwe na kukusanya kulawa mwokulu wakwe mbuli zose zisababishe uhovyo na wana wakudamanya ubanasi. ⁴² Nawadulwe wose mwe tanuli dya moto umo namtende na ndilo na kugegeda meno. ⁴³ Nivyo wantu wenye ukindedi nawang'ale enga zuwa mwo ukulu wa tati yao yudya mwenye magutwi naeve.

⁴⁴ Ukulu wa kulanga enga hazina ifisigwe kwenkonde mntu niyo aiona na kuifisa kwa kwelelwa kwake kaita kukataga vyose nendile navyo niyo agula nkonde.

⁴⁵ Naho ukulu wa kulanga enga mntu akudamanya biashala akulonda lulu yenye samani. ⁴⁶ Mna eze aione idya yenya samani kaita kakutaga chila chintu nandile ananacho niyo aigula.

⁴⁷ Ukulu wa kulanga enga lwavu lwimndani mwe bahali naho lwakusanya viyumbe vya kila aina. ⁴⁸ Eze umeme wadya walowa wakuvuta kuse niyo wekala hasi wakusanya vintu vyedi mndani mwe vyombommna hevina samaki wavidula hale. ⁴⁹ Navitende namna ino mwisho weduniya wandima na weze kuwasenta wantu wabanasi kulawa mwa wenye kindedi. ⁵⁰ Nakuwadula mndani mwe ditanuli dya umoto uko na kutenda kuna kulalama na kugegeda meno.

⁵¹ Mmanya izimbuli zose zino wanampina wamjibu heiye.

⁵² Nivyo Yesu awagamba kila mdolonyi ambaye katenda mwanampina wa ukulu kafanana na mwenye nyumba akulavya mwe hazina yakwe vintu vihya na vya kale.

⁵³ Niyo Yesu eze abindilizwe imifano yose iyo kahalawa mwer sehemu iyo. ⁵⁴ Niyo yesu kabula mwe mzi wakwe na akawahinya wantu mwe vikilo ulailo wakwe wehelwa na kugamba nikuhi mntu tuno kapata hekima ino na miujiza ino. ⁵⁵ Mntu yuno siyo mwana wa selemala? Maliyamu siyo mami yakwe? Na walukolo wakwe siyo yakobo yusufu simoni na yuda? ⁵⁶ Nawambuze chinanawo ahano hetu? Basi mntu yuno kayapata kuhi yano yose?

⁵⁷ Kawehiza mna Yesu awagamba muoni hakuswesa kutenda na heshima isipokuwa kwawo na mwesi yawo. ⁵⁸ Hadahile kudamanya mpituko nyingi kwa kwa viya hawatendile na imani naye.