¹ Lafa vita ndre Jesosy zay tsara iaby zay, le nitsara tamy reo mpianane Re tihoe: ² “Hainareo te afake roe andro le ho avy ty Paska, vaho hagnaomey hamatsiha amy ty hazofijalea ty Anagn'Ondaty.”

³ Bak'eo ty bey ty mpisoro naho ty ndaty bey niarake nivore tao amy ty lapa ty mpisoro-bey, ze kinaike tihoe Kaiafa. ⁴ Niarake nanao tetike iareo soa hisambora mangiky ahy ndre Jesosy vaho hamono Aze. ⁵ Te nanao tihoe iareo: “Tsy amy ty fete, soa tsy hisia ty koronta eo amy ty ndaty.”

⁶ Vaho Jesosy lafa tao Betania tao an-tragno ndre Simona angamay, ⁷ laha nitoboke nitava teo amy ty latabatse, le nisy ampela raeke nana tavoara alabastara feno menake lafo vily namonje Aze, le nangnily zane tamy ty lohane. ⁸ Te lafa hisa reo mpianane zay, le nasiake iareo le nanao tihoe: “Ino ro antony zao fandania zao? ⁹ Afake namile lafo vaho nomene reo mijale io.”

¹⁰ Te Jesosy, nahazay zay, nitsara aiereo tihoe: “Nanao akore nareo ro manahiran-tsay amin'ampela? Te raraha soa ro nataone tamiko. ¹¹ Eo aminareo zisikam-parane ty mijale te Iraho le tsy ho eo aminareo zisikam-parane. ¹² Te laha nagnily zay menake magnitse zay tamy ty vatako re, le nataone ho ahy ty fandevegna Ahike zay. ¹³ Ataliliko marene aminareo, na aia na aia hitoria ty filazantsara eto amy zao tontolo iaby zao, ze natao toy ampela toy le hatalily avao kea ho fahatiarova aze.”

¹⁴ Bakeo raike tamy reo folo roe amby ze kinake tihoe Jodasy Iskariota, nandeha agne amy ty bey ty mpisoro, ¹⁵ vaho nanao tihoe: “Omeanareo otrino raho hagnomezako Azew aminareo?” Nandanja volafoty malinike telopolo iareo ho aze. ¹⁶ Tamy zay fotoa zay le nipay fahafaha re soa hagnomea Aze amy iareo.

¹⁷ Tamy ty andro voalohane ty mofo tsy lalivay le namonje andre Jesosy reo mpianatse le nitsara tihoe: “Aia ro teanao hagnomanay ho anay hitava ty mahatanjake ty paske?”

¹⁸ Namale Re tihoe: “Miziliha ao an-tanà misy lehilahy raeke vaho talilio re tihoe: 'Nanao tihoe ty mpampianatse tihoe: “Fa marinike ty fotoako. Ato an-tagnonao Raho ro hanao ty paske miarake amy reo mpianatsiko.” ¹⁹ Natao reo mpianatse arake ze nandilia ndre Jesosy zay, vaho nagnoma ty mahatanja ty paska iareo.

²⁰ lafa avy ty hariva, le nitoboke nitava niarake tamy ty mpianatse folo roa ambe Reke. ²¹ Lafa nihina iareo, le nanao tihoe Re: “Ataliliko marene aminareo te hisy raeke aminareo hivadike ahike.”

²² Nalahelo iareo vaho nanomboke nagnontane Aze ty tsikiraikiraike tihoe: “Tsy ho raho avao, Tompo?”

²³ Namale Re tihoe: “Ze niara-mampijo ty tagnane tamiko tao ampo ty finga ro iaze hamadike Ahike. ²⁴ Handeha ty Anagn'Ondaty, arake ze fa voasoratse mikasike Aze. Nefa loza ty ndaty ze hamadike ty Anagn'Ondaty! Soa loatse ho ahy zay ndaty zay ro tsy terake.” ²⁵ Jodasy, ze hamadike Aze nitsara tihoe: “Iraho vao zane, Tompo o?” Nanao tihoe Reke tamine: “Hainao soa.”

²⁶ laha mboe nitava iareo, le nangalake ty mofo Jesosy, nisaotse, vaho nanapake zay, Nomeine reo mpianatse zay vaho nitsar tihoe: “Rambeso, hano. Toy ro vatako.” ²⁷ Nandrambe ty kapoake Re vaho nisaotse, vaho nagnome zay aireo le nitsara tihoe: “Nareo iaby, inomo toy. ²⁸ Te toy ty lio ty fagnekem-pilongoa alatsake ho ahy ty maro famelan-keloke. ²⁹ Te talilieko aminareo, te tsy hino ty vokatse ty voaloboke sase Raho, zisikim-piavia ty finoma vaoavao hiarahoko aminareo agne amy ty fanjaka ty Babako.”

³⁰ Lafa niantsa hiantsa fiantsa iareo, le nandeha tagne amy ty vohitse ndre Oliva.

³¹ Bak'eo nanao tihoe Jesosy tamy iareo: “Nareo iaby le hagnenga Ahike noho ty amiko haliky zao, te voasoratse tihoe: 'Hamofoke ty mpiandre aondry Raho le hioaritake ty aondre.' ³² Te afara ty fitsanganako amy ty mate, le hiaolo lala anareo agne Galilia.

³³ Te Petera nanao tamine tihoe: “Na hagnenga noho ty aminao kea ty iaby, raho tsy hagnenga anao zao.”

³⁴ Nanao tihoe Jesosy tamine: “Ambarako marene aminao, te anio halike laha mbo tsy magneno akoho, le handà Ahike intelo riha.”

³⁵ Petea nitsara tamine tihoe: “Na le tsy maintse ho mate miarake aminao raho, le tsy handà anao.”

³⁶ Vaho Jesosy nandeha nirake tamy iareo nandeha amy ty toera kaihe tihoe Getsemane vaho nitalily tamy ty mpianane tihoe: “Mitoboha eto laha mbo handeha eroy hivavake Raho.” ³⁷ Nanday ahy ndre Peteraa miarake amy ty andre Zebedio roe lahy Re vaho nanomboke nalahelo naho mijale. ³⁸ Bak'eo nanao tihoe Re tamy iareo: “Mijake ty fagnahiko, manahake ty fa ho mate. Mitoboha etoa vaho miambane miarake amiko.” ³⁹ Niale kele Reke, nihohoke vaho nivavake. Nanao tihoe: “Babako, laha azo anoe, le lonike afaha amiko toy kapoake toy. Feie lonike tsy arake ty teako, te ty teanao.” ⁴⁰ Namonje reo mpianatse Re vaho nahisake aiereo ny azo tore, le nanao tihoe Re tamy ndre Petera tihoe: “Ino, tsy mahavita miambe miarake amiko na le lera raike vao nareo? ⁴¹ Miambe vaho mivavah soa tsy ho azo ty fagalam-pgnahy nareo. Mete avao ty fagnahy, te ty nofotse ro maleme.”

⁴² Mboe nandeha fagnindroane reke vaho nivavake. nanao thoe: “Babako, laha ohatse tsy azo afaha amiko toy raha tsy mino raho, le ho atao vatane ty teanao.”

⁴³ Nimpole ndraeke Reke vaho mboe nahisake aiereo natory, te navesatse ty maso iareo. ⁴⁴ Le nagnenga aiereo ndreke Re, lasa vaho nivavake fagnintelone, nitalily reo tsara reo avao. ⁴⁵ Bak'eo Jesosy namonje reo mpianatse le nanao tihoe tamy iareo: “Mboe matory naho mitofa vao nareo? Vambao famarine ty lera, vaho ty Angn'Ondaty le homea eo an-tagna reo mpanao rate. ⁴⁶ Mitsangà, ndao tika. Vambao, fa marinike iaze hamadike Ahike.”

⁴⁷ Laha mboe nitsara Re, le avy Jodasy, raek amy reo folo roa ambe. Nisy vahoake maro avy niarake tamine bak'amy ty bey ty mpisoro naho reo ndaty bey. Avy niarake tamy ty mesa bey naho langilangy iareo. ⁴⁸ Vaho nagnome famantara aiereo iaze lehilahy hamadike ahy ndre Jesosy, manao tihoe: “Ze horofako, ro Reke. Samboro Reke.” ⁴⁹ Teo ho eoavao le namonje ahy ndre Jesosy re vaho nitsara tihoe: “Salame, Raby!” Vaho nagnoroke AZe re.

⁵⁰ Nanao tihoe Jesosy tamine: “Ragnitse, ataovo ze lianao etoa.” bak'eo avy iareo, nagnenja tagna tamy ndre Jesosy, vaho nisambotse AZe. ⁵¹ Ingo, raeke tamy rei niarake tamy ndre Jesosy nagnenja ty tagnane, nampitsoake ty masane, nanapake ty mpiasa ty mpisoro be, vaho nahafake ty sofine. ⁵² Bak'eo nanao tihoe Jesosy tamine: “Ampolio amy ty toerane ty mesonao, te reo ze mandrambe meso le ho vonoa amy mesa. ⁵³ Mieritseritse vao nareo te tsy afake mikake ty Babako Raho, vaho Reke le afake mandefa ho Ahike maramila anjele mihoatse noho ty folo roe ambe? ⁵⁴ Te atao akore zay ro hahatanterake ty Soratse Masy, ze mitalily te tsy maintse hiseho zay?”

⁵⁵ Tamy zay andro zay Jesosy nitsara tamy ty vahoake tihoe: “Avy miarake amy ty meso bey naho langilangy hisambotse Ahike manahake ty malaso vao nareo? San'andro le nitoboke nampianatse teo amy ty tempoly Raho, te tsy nisamborinareo. ⁵⁶ Te zay iaby zay le niseho soa hahatanterake ze voasatsy reo mpitoke.” Bakeo nagnenga Aze reo mpianatse iaby le nilay.

⁵⁷ Nandesy reo nisambotse Aze tagne amy ndre Kaiafa mpisorobey Jesosy, ze nivoria reo mpanora-dalàgna naho ndaty bey. ⁵⁸ Te Petea nagnarake Aze bak'egne lavitse nandeha agne amy ty kianja ty mpisorobey. Nizileke tao ampone re vaho nitoboke niarake tamy reo mpiandre raraha soa hahisake ze hiafarane.

⁵⁹ Vaho reo bey ty mpisoro naho reo Synedriona iaby nipay fitana tsy to manohitse ahy ndre Jesosy, soa mete ahafaha iareo mamono Aze. ⁶⁰ Tsy nahisake na ino na ino iareo, na le nisy mitsanga vavolombelo maro tsy to avy teo. Vaho kelekele bak'eo le nisy roe avy namonje teo ⁶¹ vaho nitsara tihoe: “Io lehilahy io le nisara tihoe: 'Afake mandrava ty Tempoly ty Andragnahare Raho vaho mananga zay ndraeke afake telo andro.'”

⁶² Nitsanga iaze mpisorobey le nanao tihoe tamine: “tsy manan-kavale vao Riha? Ino zay hitanjaha iareo Anao zay? ⁶³ Te nitsy Jesosy. Nanao tihoe ty mpisorobey tamine: “Mandily Anao amy ty alala ty Andragnahare velo raho, talilio aminay laha Riha ro Kristy, Anak'Andragnahare.”

⁶⁴ Jesosy namale aze tihoe: “hainao soa. Te talilieko aminareo, manomboke zao le ho hisanareo ty Anagn'Ondaty hitoboke eo an-tagna ankavana ty Here, vaho avy eo amy ty hiboke ty lagnitse.”

⁶⁵ Bak'eo ty mpisorobey nanantake ty ankajone vaho nitalily tihoe: “Nitsara rate Re! Nanao akore tika ro mboe mipay mpijoro vavolombelo? Ingo, henonareo ty tsara rate zao. ⁶⁶ Ino ro hevinareo?” Namale iareo vaho nanao tihoe: “Maeva ty ho mate Re.” ⁶⁷ Bak'eo iareo nandora ty vatane naho namofoke Aze, vaho namofoko tampifemaeke Aze, ⁶⁸ vaho nanao tihoe: “Mitokia aminay Kristy. Ia ro namofoke Anao?”

⁶⁹ Vaho Petera nitoboke ambalike ty kainja, vaho nnisy mpiasa ampela avy namonje aze nitsara tihoe: “Riha avao kea le niarake tamy ndre Jesosy ty Galilia.”

⁷⁰ Te nagnina zay teo agnoloa iareo re, manao tihoe: “Tsy hainao ze resahinareo.”

⁷¹ Lafa niboake ty vavahade re, le nisy mpiasa ampela hafa nahisake aze vaho nitsara tamy reo ze teo tihoe: “Toy lehilahy toy avao kea le nirake tamy ndre Jesosy bak'agne Nazareta,"

⁷² Mboe nandà ndraeke re niarake tamy ty fifanta tihoe: “Tsy hainao zay lehilahy zay!”

⁷³ Lafa afake kelekele le namonje ze nitsanga teo vaho nitsara tamy ndre Petera tihoe: “Riha avao kea le vatane raeke amy iareo, te ty fomba fitsaranao le fitanjaha anao.”

⁷⁴ Bak'eo re nanomboke nagnozo naho nifanta le tihoe: “Tsy haiko zay lehilahy zay.” Vaho teo ro eo le nagneno ty akoho.

⁷⁵ Tiaro ndre Petera ty tsara nambara ndre Jesosy tihoe: “Mboe tsy magneno akoho le handà Ahike intelo riha.” Bak'eo re niboake vaho nitomagny mafe.