¹ Nikinaigne ndre jesosy tamy reo mpianane roe ambine folo naho nameane aze reo voninahetse amy reo fanahy maloto, soa handroahane aze reo, naho nagnafake reo karaza arety naho karaza fahararia iaby. ² Vaho toagn'aby ty agnara reo apostoly roe ambine folo. Ty voalohane, Simona (zay kinaike avao kea tihoe Petera), vaho Andreo rahalahine; Jakoba zanadahy ndre Zebede, naho Jaona rahalahine; ³ Filipo, naho Barteleomy; Tomasy, naho Matio iaze mpitake haba; Jakoba zanadahy ndre Alfeosy, vaho Tadeosy; ⁴ Simona iaze Zelota, vaho Jodasy Iskariota, iaze hamadike aze.

⁵ Nirahe ndre Jesosy iareo folo roa amby. Nanoro aiereo Reke vaho nirehaky tihoe: “ko mandeha agne amy ty toerane zay hitoera ty Jentilisa nareo, vaho ko mizilike amy ty rovany reo Samaritana. ⁶ Te mandena kea agne amy reo aondry robake amy ty taranagn'Isiraely; ⁷ lafa mandeha nareo, le mitoria vaho antalilio tihoe: 'Fa mariny ty fiavia ty fanjaka ty lagnitse.' ⁸ Afaho ty marary, atsangano ty mate liovo reo angamay, vahoroaho reo demony. Arake ty nahazahoanareo maimaimpoa. ⁹ Ko manday volamena, volafoty, na saba ao amy ty kitapom-bolanreo. ¹⁰ Ko manday manday kitapom-batia amy ze andenanareo, na fisikina hafa, na kiraro, na fitogno, te ty mpiasa le maeva hahazo ty mahatanjakine. ¹¹ Na ino na ino tanàm-bey na tanà kele hizilihanreo, paiavo ze maeva ao, vaho mitoboha ao mandra-pialanareo. ¹² Laha vao miziliky ao amy iaze tragno nareo, le miarahabà ty ao. Laha maeva iaze tragno, le lonike ty fiadagnanareo ho avy ao. ¹³ Te laha tsy maeva kea zay, le loniky ty fiadagnanareo himpoly aminareo. ¹⁴ Hoahy reo zay tsy mandrambe anareo na tsy miheno ty rehagnareo, le apopoho ty lemboke amy ty tombognareo, lafa nandeha amy zane tragno na tanàm-bey zane nareo. ¹⁵ Taliliako marine aminareo, te ho moramora vatane ty ahy ty tana ndre Sodoma naho Gamora amy ty andro fitsara noho zay tanàm-bey zay.

¹⁶ Ingo, handefa anareo manahake ty aondry eo ampagnivoa ty amboaly Raho, kea hendre manahake ty menarana vaho tsy manan-tsikone manahake ty voro mahilala. ¹⁷ Mitao ty amy ty ndaty! Hagnomey anareo eo amy ty filan-kevetse iareo, vaho hamofoke anareo amy ty sinagoga iareo ¹⁸ Bak'eo le handese eomagnoloa ty governora naho ty mpanjaka nareo noho ty amiko, soa ho vavolombelo ho aiereo naho ho ahy ty Jentilisa. ¹⁹ Lafa magnomey anareo iareo, le ko mana fisalasala ty amy ty tihoe manao akore na ino ro ho talilianareo, fa homea anareo amio leraio zay tokone hovolagne. ²⁰ Te tsy nareo ro hitsara, te ty fagnahy iaze Babanareo ro hitsara ao aminareo. ²¹ Ty rahalahy le hagnomey ty rahalahy ho amy ty fahafatesa, vaho ty baba le ty anagne. Ty anake le mitsanga hanohitse ty rae aman-drenene ka hahatonga ty fahafatesa iareo. ²² Ho hejene on-daty nareo naho amy ty agnarako. Te naia naia maharitse amy ty farane, Le ho voavonje zane ndaty zane. ²³ Lafa magnenjeke anareo ao amy io Tana-bey io iareo, le milaisa agne amy ty magnarake, te talilieko marine aminareo, te tsy hanapitse reo tanagn'Israely miaolo ty hiavia ty anagn'Ondaty nareo.

²⁴ Ty mpianatse le tsy bey noho ty mpampianatse, na ty mpiasa ho ambone noho ty tompone. ²⁵ Ampe ho ahy ty mpianatse laha avy manahake ty mpampianane reke, vaho ty mpiasa avy ty tompone. Laha kinaign'iareo tihoe Belzeboba ty tompo ty tragno, le ho raty lavitse manahake ty manao akory reo agnara fikaiha iareo ty saky ty mpilongo

²⁶ Noho zay ko matahotse aze reo, te tsy hisy hatsioke ze tsy himboake, vaho zaka-mitsioke ze tsy ho hay. ²⁷ Ze ataliliko anareo ao amy ty maieke, le talilio amy ty andro mazava, vaho ze bisibisike janjinareo amy ty sofignareo, le ambarao egne ambone tafon-tragno. ²⁸ Ko matahotse ahy reo ze mamono ty vata feie tsy afake mamono ty fagnahy. Te kea, matahora ahy ze afake mamotike ty fagnahy naho ty vata agne amy helo. ²⁹ Nao tsy vola malinike kele vao ro hamarota foly roe? Te tsy mboe nisy na raiky amy iareo milavo amy ty tane laha tsy misy ty fahaiza ty Babanareo. ³⁰ Ty na ty volon-dohanareo kea le voaisake iaby. ³¹ Ko matahotsy. Misy dikane vatane noho ty foly maro nareo. ³² Noho zay ze iaby magneke Ahike eo agnatreha ty ndaty, le ho ekegniko avao kea eo agnatreha ty Babako ze agne an-dagnitse. ³³ Te ze mandà Ahike eo agnatreha ty ndaty kea, le ho laviko avao kea eo agnatreha ty Babako ze agne an-dagnitse.

³⁴ Ko mieritseritse te raho le ho avy handay fiadagna eto an-tane. Tsy avy handay fiadagna Raho, te meso bey. ³⁵ Te avy raho hagnaraky ty anandahy amy babane, vaho ty anak'ampela amy ty renine, vaho ty vinanto ampela amy ty rafoza ampelane. ³⁶ Reo ze ao an-tokan-tragnone avao ro ho lasa fahavalo ty ndaty ³⁷ Ze tea vatane ty rae na rene mihoatse Ahike le tsy maeva Ahike; vaho ze tea vatane ty anandahy na ty anak'ampela mihoatsy Ahike le tsy maeva Ahike. ³⁸ Ze tsy mandrambe ty hazofijaleane le magnarake Ahike le tsy maeva Ahike. ³⁹ Ze manarobake ty fiaigne le haharobake say. Te ze mahavere ty fiaigne noho ty amiko le hahisake zane.

⁴⁰ Ze mandrambe anareo le mandray Ahike, vaho ze mandray Ahike le mandray iaze nagnirake Ahike avao kea. ⁴¹ Ze mandrambe ty mpitoky lefa mpitoky re le hahazo ty valesoa ty mpitoky, vaho ze mandrambe ty ndaty mahity satria ndaty mahity re hahazo ty valesoa ty ndaty marine. ⁴² Na ia na magnomey ty raiky amy regny malinikeloatse regny, na le ramo manitsy kapoake raeke hinome avao, satria re mpianatsy, le talilieko marine aminareo te, tsy ho rombaky ty valesoane.”