¹ Ekaba Yesu bulya asubire makalaga jajyio akaboka Galilaya, akahika mibale jya Yudea harya ya Yordani. ² Kimuhyo kineni kamurohya akabahorya gokyio.

³ Ale mafarisayo bakamutuba, bakamusuma, bakamubiela ale ndijaregu monto ehaba mkehe kwa bubeju?

⁴ Yesu akajokya akabuga, “Mtyati esoma ebuga olya abegegire ayyo murunereru egegire wabalome na wabaka? ⁵ Na lenge akabuga, ‘kwa Bobyio, monto akehaba ensena ng'ina, akegerana na mukehe, na bo babele bakekolwa mubele jumwe?’ ⁶ Na rari bakekolwa tii babele lenge, ale mubele jumwe. Na balya Mugwe, monto nahabe bekerania.”

⁷ Bakamubiela, “Bo bobyo Musa ahumirye mborwa yehabana.”

⁸ Akababiela, “Musa kwa bubibo bwa Nkolo jyiobo, akabaha ehabana na baka benyu ale eboka muruneleru lityale bobyio. ⁹ Nanie nibalelate enyie, monto wonse olya akehaba mukehe, ale tii kwa bumale, akakwa onge, ni musari; Nene olya akekwa olya ahabirwe na basara. Na wabalome olya akekwa wabaka olya akehebwa ale musari.”

¹⁰ Batubageri behe bakamubiela, makalaga jababobyo, eteghasete monto ekwa.”

¹¹ Ale woo akababiela, “Tii bonse bakedekela ekalaga lele, ale balya baghwaserigwe. ¹² Mamuna halenture jibyarirwe oboka biburi ndane bya bang'ina, na hale baturirwe bantu bakaba Nture. Lenge hale Nture beghairie Nture kwa bwegeri bwa Kwegolo; olya akehikya enyigha ekala lele nalinyighe.”

¹³ Ndyo akaletelwa bana bariragi akabajitela miboko egolo lyobo ne behela, batubageri behe bakabanegenia.” ¹⁴ Ale Yesu akabuga, “Habai bana kulya ndee, rari muhabe bagirya; kwa mamuna balya bangane naboo bwegeri bwa Kwegolo bwuobo.” ¹⁵ Akajitela moboko jyehe egolo lyiobo, neekera kyio.

¹⁶ Na Doghora monto omwe akamutuiba akamubiela, “Mwalimu, ghayye kitoke kijaregu, abuga bane bwegeri bwakwegolo?”

¹⁷ Yesu Akamubiela, “Tii ninji nubaborya kusikelo kwa bujaregu? Olya ale mujaregu nomwe. Ale wakonda eshala bwegeri bwa Kwegolo nyigha sharia jya Mugwe.”

¹⁸ Monto oyyo akamubiela, “Nisheria jihii?” Yasu akabuga jiji, “Habe bolaga, habe sara, haba bwebi, habe eba mwejibe wa Bwerehi. ¹⁹ Soka ghonio na mwoho, na konda muhaya wayyo bo nkolo yyayyo.”

²⁰ Mutana oyyo akamubiela, “Bibi jonse nijanyighire kehee tii nyighire?”

²¹ Yyesu akamubiela, “Wakonda obe mute manu, gera kagoranie byonse bilya ole nabyo ohe balya batii, naoje ondohyie nawe nokekolwa na kibondo gokyo kwego.” ²² Mutana oyo bulya ojirye ekala lelyo, akagera aregirye, bobulya nale na binto bineni.

²³ Yesu akababiela Batubageri behe, “Edekelai nibabielate, ndikekolwa ndibibo musabi eshala bwegeri bwa kwegolo. ²⁴ Lenge nibabielate, ndikeba ndibosoboso ngamia eshala kitolwa kya sindano, ale musabi ahabe shala Mwegeri bwa Kwegolo.”

²⁵ Batubageri bulya babojire bakadeka muno bakabuga, “Nino ngo kola bobyio akehikya ehonoka?”

²⁶ Yesu akabaghunderya kwa meso akababiela, “Kwa bantu lelyo litumune ghaika, ale kwa Mugwe byionse bikighaeka.”

²⁷ Ndyo Petro akajokya, akamubiela, “Doghorai eshe tubahaba byionse tubakurohya; tukebana njii ngoo?”

²⁸ Yesu akababiela, “Edekelai, nimbebielate enyie balya mundohatye nie lilya nie kemunterya nsee yambya nie Mwana wa Adamu kwa Kiti kyawa kikolo, nenyie mukenyuterya horiga ekomi neembe njooko jaa Israeli. ²⁹ Na monto wonse ahabire nyumba anga mwondogo wa balome anga wabaka, anga ese anga ng'ina, anga bana, anga migonda, kweebina lyawa, akeroselwa ahebwa egana, nehebwa seryie ya kala na kala.

³⁰ Ale baneni balya babushone bakekolwa ba mudubugheru, na bamudubughelu bakekolwa babushone.