¹ Mugero jojyio Batubegeri vbakeja kwa Yesu bakabuga, “Nino ale mukolo kwa Bwegeri bwa Mugwe wa Kwegolo?”

² Yesu akabugela mwana omwe, akamujetela gategate kobo, ³ na akabuga, “Edekelai nib abielate, mwalega erigoka mukaba bobana baghera, mutune shala rari hari kwa bwegeri bwa Mugwe. ⁴ Olya woonse akenyihya weeaweme boo Mwana oyyo ale mkolo kwa bwegeri bwa Kwegolo. ⁵ Na olya woonse akedekela Mwana anga oyyo kwebina lyawa ajendekere nie.

⁶ Ale olya akeghaya Mwana oyo anjendekere ahombye, ahikire aboherwe, ndoghorai eghjoti eneni Yesela neesharigwa gategate ka mai janeni. ⁷ Ema wee kwa bulya aghayate bantu bahombyie? Mamuna jatune elegeja jalya ugharatye bantu mahombie? Ale ema wee olya aghayatyie monto ahombyie. ⁸ Kola kuboko kwayo anga kugolo kwayyo kukuhopmberatye, kukebe ukakute halehu nawe; eng'onio eshala kwa seryie na kono utii kuboko anga kugolo, natebwa moki ndane jya kala na kala ekaba na miboko jyionse anga magolo jyionse. ⁹ Na riso lyayyo lyakuhomberya, likole ukalite halehu nawe; eng'oni eshala kwa Bwegeri bwa seryie bwa kwegolo na utimeso anga kugolo ale ahabetebwa moki ndane jwa jehanamu.

¹⁰ Dooghorai habe mena umwe wa bana baba; kwa mamuna Malaika jobo kwegolo nkya jyionse Mwana wa Adamu ajire ehonokya balya bobire. ¹¹ Mamuna Mwana wa Adamu ajire ehonokya kilya kyiobire. ¹² Mubone boo? Monto akolwa na ng'ondi engana, ale omwe ekoba, atihabaga milonge kendane kenda, na akeesora kwa taregolo eyyo emwe yyobire. ¹³ Na rari aemibana, edekela, nibabielate, aghamela kwa bulya na bamibana, najitumune angana na jilya milonge kenda nekenda jilya jityobire. ¹⁴ Na byio bobyo, nitighameragia bushone bwa Mugwe wenyu wa Kwegolo omwe wa bariragi benyu bee.

¹⁵ Na Mwondogo wayyo ahombya, gera ukakalage nene, wee nene anyika, akutegerya noba bana mwondogo wayyo. ¹⁶ Kola na balega ekutegeria, tola monto omwe nawe anga babele. Ebuga kwa bejibe babele makalaga jamanekane no muhombia. ¹⁷ Na alege bategerya bobene, bela kanisa, na alege tegerrya nalyo, na nabe bo monto wa matongo nan mudosa ushuru. ¹⁸ Edekelai nibabielate, jalya jonse bukebuga kwa jaboha nseeno, nakekolwa jababohwa kwegolo, na jalya mukehinghola nseeno jahingwalwa kwegolo. ¹⁹ Lenge nibabielate, lee babele bedekerania benyu oho nseeno kwa kinto kyionse kilya babehela, bakegharigwa Mugwe wawa wa Kwegolo. ²⁰ Na halya babele anga badatu bamogane kwebina lyawa nanie nuikekolwa hoohene gategate kobo.”

²¹ Lenge Petro akamutuba akamubiela, “Mwegeri mwondogo wawa ang'omberye kalenga nani ghuyye jyihe? Rari muhungati?”

²² Yesu akamubiela, “Tumunekubiela rari muhungati, losera milonge muhungati. ²³ Kwa bobyo Bwegeri bwa kwegolo bwangari gagwa na mwekorani omwe akondate eghayya bujurusi na bamilemo beehe. ²⁴ Bulya arunerere eghayya, akaletelwa monto omwe aborigatwe talanta malung'u ekomi. ²⁵ Na bulya aborire kyeliba, Mwegeri wehe akabuga agoranigwe, woo wene na mukehe na benihe na binto byiehe byonse sire eyyo ekalibwe. ²⁶ Byio Mutomwa oyyo akasega birugunyi akamughumela akabuga, ‘Mkolo wawa ninjehelate ombetele, nanie nikekuleha sire yayyo yonse.’ ²⁷ Mkolo wa mutomwa oyyo akamurera, akamuhingola, akaghuyya sire yehe. ²⁸ Ale mumilemo oyyo akahuma na akabana omwe wabalugu behe, alena sire ya dinari egana, akamudaba akamunying'a ngorogoro, akabuga, ndeha kilya abogagwa.

²⁹ Mulugu wehe akasega birugunyi magolo egolo jyehe, akamusansama, akabuga, betela, nanie nikekuleha sire yayyo yonse. ³⁰ Ale atyati ekonda byio, akagera akaemuhingela, ebuga ang'ore muleha sire yyahe yonse. ³¹ Bulya balugu behe babande jalya jabaghaeka, bakadeka muno, bakagera nakayye bela mwegeri wobo byonse bilya bibaghaeka.

³² Ndyo mwegeri wehe akamubugela, akamubiela alewee lee mutomwa mubeju tii nie nibaghairye sire yyayyo yyonse bulya ub asansamire. ³³ Nawe lee litibakondagwa urere mulugu wayyo, bobulya bakurerere wee. ³⁴ Mwegeri wehe akaregya akamuhira kwetirirwa, ang'ore eleha sire oyyo yonse. ³⁵ Mbyio Baba yawa wa kwegolo akebagharya enyie, mwalegeghuyya kwa Nkolo jyienyu monto mulugu wehe.”