¹ Ndyo Mafarisayo na baandishi bakeja kwa Yesu eboka Yerusalemu bakamutuba Yesu bakamubiela, ² “Kwa nji batubegeri bayyo ali tii babaragaragia makala ja balakolo, mamuna babalege ojyia miboko batyati elagela.”

³ Akabajokerya akababiela, “Ale nenyi tii mubaragaragagya Amuri jya Mugwe kwerohya ngendelu jyienyu? ⁴ Bobulya Mugqwe abugire, ‘Soka ghonio na mwusho,’ na ‘Waruma ghonio anga mwusho ekya nuke nkya.’

⁵ Ale enyie mubugaga- olya akabiela ense anga nng'ina, kila kyionse okondate egharigwa nie ninje humire ekugharya. ⁶ Na alege soka ense anga Ng'ina nikahaba ekalagalya Mugwe kwa erohya makala jienyu. ⁷ Enyie baghamba kubele, Isaya na bugire bujaregu ne segera kusikelo kwenyu akabuga, ⁸ ‘Bantu baba basokire kwebuga kwa maromo jobo ale kolo jyiobo jile halehu nanie. ⁹ Eghora lyiobo hati gantu, ebanyererya lyiobo ni ngendelu jyabantu.’”

¹⁰ Akabugela kimuhyo akababiela. “Tegeryai mumanye- ¹¹ kilya monto alejate kigharagaragia monto: Ale kilya uhumatyie kwe egamba kyio kighara gharagia monto.”

¹² Ndyio batubegeri behe baka mutuba, baka mubiela, nubamanye buga mabarisayo bulya babojirye ebuga ekala lelyio bakasola. ¹³ Akajokya akabuga, “Olya atihurerwe baaba wa kwegolo, nakekolwa. ¹⁴ Bahabei boo, mbekorani ba balya batibanaga bobene, na ng'akuri yuahetela ng'akuri enge baetya kisimi ndane boo babele.”

¹⁵ Petro akajokya akabuga, “Tubele ng'ine anga ngania lele.”

¹⁶ Yesu akabuga, “Rari ryolo bobyio Nenyie mutyati ghaya bughara? ¹⁷ Mutyati emanya ebuga kilya kiomanungia kania kibayya kwa kiburi, kyaetebwa kwa Kisimiri ndane? ¹⁸ Bilya binungangia kania bibokaga Nkolo ndane, na byio byio bigharaghia monto. ¹⁹ Mamuna nkolo ndane ng'ohahumaga kidemi kiobeju kibeju, ebolaga, busari ehenjwa, buebi, ekaba bwerehi, nerumana. ²⁰ Jajyio njoo jajiletelaga monto bubeju, ale elegela otyati ogya meboko kutumune eghaya monto ebamubeju.”

²¹ Yesu akaboka gokyio, akagera mubale jwa hara ya Tiro na Sidoni. ²² Doghora wabaka Mkananayo abokate hareyyo akaghubuka, akabugelana akabuga, “Derera Mwana wa Daudi! Mwana baka wawa abeshalwa ni nkolo babejagu.”

²³ Anga woo atyati emujokerya ngantu, nabo batubageri behe bakamutuba, akamwehela, bakabuga, “Muhabe agere mamuna egerate kulilana suha Yyeto.”

²⁴ Yesu Akajyokya akabuga, “Tyatomirwe kwa ng'ondi jyiobire jya Israeli.”

²⁵ Nene akeja akamurugumela, akabuga, “Mwegeri ndaserya.”

²⁶ Akajokya, akabuga, “Tii lijaregu etola dyiela bya bana nebitela nguyya.”

²⁷ Akabuga, “Ndyo, mwegeri, ale rari nguyya etolotolaga bilya bitotonyire halya Mwegeri wehe alegelate.”

²⁸ Ndyo Yesu akajokya, Akamubiela, mugharisha edekela lyayyo ndineni muno, na ndibe bulya okondate; akahola mwanabaka wehe mugero jojyio.

²⁹ Yesu akaboka kokyio, akahika mubale jwa maiegolo lya Galalilaya; akalanjela taregolo akamutya kyioo. ³⁰ Kimuhyo kineni kikamutuba kikamuletela balya baghobyekire, na balya batibanaga, na batigambaga, nabalya baghobyiekire, bange baneni, bakabadaghara halya ale akabahorya. ³¹ Na kimuhyo kikadeka, bulya babadebalya batigambaga babagamba, na bulya bughobyikire babahola, na balya bati magolo babagera, na balya batibanaga bababana, bakaghora muge wa Israeli.

³² Yesu akabugela bastubageri behe, akabiela, “Barerera kimuhyo geke, bobulya jibahika kwa nkya besatu bale nanie, anga batii kyielya, anga tikonde bagere batiragere, engera bale nkondo bakamise.”

³³ Batubageri behe bakamubiela, “Tubane ko higate nyineni oho bweleegolo, heghejisha bantu bang'ana bobyio.” ³⁴ Yesu akababiela, “Mulena migate jinga boo?” Bakabuga, “Muhungati na bisingiri biriri.”

³⁵ Akababiela, kimuhyo bamutyie nsee. ³⁶ Akatola mikate jijyio muhungati na bisingiri, akabyiehela akaha batubageri behe na boo batubageri behe bakaha kimuhyio. ³⁷ Bakalya bantu bonse bakashaa; bakatolotola bilya bibuniekire bikojola bimubogo muhungati. ³⁸ Na balya bonse barere migate bale malome malughu anna, ehaba makana na bana.

³⁹ Mbyo Yesu Akasegera kimuhyio, akalenjela mashua akagera hara ya erobe shala.