¹ Obukama bwamwiiguru bukwiisana nkumuuntu ayina enyubba yaamwe, eyakeire emaambya napaangisya abalumi balume olusuku lwaamwe olwa mizabbibbu. ² Niyamaare okwikiriziganya nabalumi edinaali talunaku nabasiindika omulusuku lwa mizabbibbu. ³ Nawuluka nga ziri saawa isatu, nabona abaandi nga bemereire omuka tale nga tibaina kye bakola. ⁴ Bona nabakoba nti nyweena mwaabe omulusuku lwa mizabbibu, naanje nabawerya ekyaika, boona nibaaba. ⁵ Era nawuluka esaawa mukaaga era nomweenda nakola atyo, ⁶ nawuluka esaawa nga ziri ikumi neemwe, nasaanga abaandi nga beemereire, nabakoba nti kiki ekibeemereirye anii nga timuluku kyemukola obwiire okusweeka?

⁷ Nibamukoba nti ndoowo muuntu eyatupaangisirye nabakuba nyweena mwaabe omulusuku lwa mizabbibbu.

⁸ Obwiire nibwaasweekere, omwaami walusuku lwa mizabbibbu, nabakoba omukozi waamwe nti beete abalumi, obawe empeera, osooke okubaseemberyaayo okwiika okkubaasokere. ⁹ N0musaawa eikumi neemwe niba izire buli muuntu naweebwa edinaali emwe. ¹⁰ Naabo abasookere nibaizire nibalooza nti baaweebwa okusiingawo, na ye boona nibaweebwa edinaali emwe. ¹¹ NIbabawaire nibeemulu gunyizza omwaami,

¹² Nga bakoba nti banaani abaizire oluvanyuma abakoleire esaawa emwe, nobeekanisya naiswe abagadire emaambya neisana nga ritwookya.

¹³ Yeena nairamu nabakoba omwe okwaabo nti mwiraange titukoore kubbi: tiwaikirizigainye dinaali emwe? ¹⁴ Twaala eyaamu nkweendya okuwa esembereyo nkaawe.

¹⁵ Tinyiiza kukola byaange nkaniinkwendya? oba eriiso ryaamu ribbi, olwakubba eryaange risai. ¹⁶ Nimwo batyo abamabega balibba bakusooka nabakusooka balibba bamabega.

¹⁷ OYeesu niyaali nga akuniina okwaaba eye Rusaalemi natwaala abeegesya eikumi nababiri kyama nabakobera omwaanda nti; ¹⁸ Bona tukuniina tukwaaba eYerusaalemi' nomwaana wamuuntu aliweebwayo omubakabona abakulu, nabawaandiiki, boona bali musaara omusaango okumwiita, ¹⁹ Era balimuwaayo edi abamaanga okuduura, nokumukubba nokumukomeera: nalyooka naimbooka okulunaku olwakasatu.

²⁰ Awoo omaamwe wabaana ba Zebidaayo naiza waali abaana baamwe, namuramya ekigaambo. ²¹ Namukoba nti okeeendya kii? namukoba nti lagira abaana boona baikale amwe okumukono gwaamu ogulyo, nokumukono gwaabe ogumokole omubukama bwaamu.

²² Yeena oYeesu namukoba nti timukumanya byemu kusaba mukusobola okunywa okukikopo nje kyeenkunyweeraku? nibamukoba nti tukusobola

²³ Nakoba nti okukikopo kyaange mwaanyweeraku ddala: naye okwiikala okumukono gwaange ogulyo nomukono gwamokole tiniinje nkubba wabula otaata bye yakubikiire.

²⁴ Nabaddi eikumi nibawuliire nibagoongera abagaande ababiri. ²⁵ OYeesu nabeeta gyaali nga okoba nti; mumaite nga abamaanga babafuga nabakulu baabwe babatwaala namaani. ²⁶ Tikyaabbeenge kityo omunywe: naye buli ayeendya okubba omukulu omunywe yabbaanga muweereza waanywe. ²⁷ Nabuli akweendya okubba owakusooka omunywe yabbanga mwiiru omunywe: ²⁸ Nkomwaana wamuuntu nataakwiiza kuwerezebwa wabula okuweereza nokuwaayo obwoomi bwamwe omukinunulo ekyabaigi.

²⁹ Nibaali bakuuluka oMuyeriko, ekibiina ekikooto nikiseengerya. ³⁰ Boona abaigali bamaiso babiri abaali baikaire okumabbali ga luguudo nibaawuliire nti oYeesu akwaakala wo, nibabazira aiguru: nga bakoba nti mukama waiswe tuganyire omwaana wa Dawudi ³¹ Ekibiina nikibaboigoora, okusirika: naye bo nibeeyongera okubazira aiguru nga bakoba nti mukama waiswe tuganyire omwaana wa Dawudi.

³² OYeesu nayemeera nabeeta nabakoba nti mukweendya mbakooore ki? ³³ Nibamukoba nti mukama waiswe amaiso gaiswe gaiguke. ³⁴ OYeesu nakwatibwa ekisa nakwaata okumaiso gaabwe: awoo nibabonnyya nibamuseengeerya.