¹ Yesua dakal fi murkab, gata bahar, wa ja le medina tou. ² Nas jabu le huwo zol moslul naim fi biris. Huwo aiynu iman tomon, Yesua kelimu le zol al moshulul de, "Ibni, keli inta kun farhan. Afi katiya taki."

³ Kataba tanin wonusu fi nefsa tomon, "Zol de bi mesil." ⁴ Yesua arufu al fi fii fikra tomon wa kelimu, "Le intum bi fekir kalam sherir fi gulub takum? ⁵ Kalam yatu al sahil ashan bi gulu, 'Katiya takum afi.' Wele bi kelimu, 'Gum fok wa douru'? ⁶ Ashan intum bi arufu be-inu Ibin al insan indu sulta fi ard ashan bi afi katiya, ... "Huwo bi gul le zol moshul, "Gum fok, shilu feris taki, wa ruwa bet." ⁷ Bad dak zol de gam fok wa ruwa le bet tou. ⁸ Zaman nas al limu aiynu zede, umon istagrab wa bada sabihu Allah, al wodi sikil sulta de le nas. ⁹ Zema Yesua ruwa be hinak, huwo aiynu zol ismu Mateyo, al kan gaid fi keima ta limu daraib. Huwo kelimu le huwo, "Taal warai." Huwo gam fok wa ruwa warau.

¹⁰ Zema Yesua geni tehet fi jua wa bi akulu, nas ta daraib kutar wa nas katiyin ja wa akulu ma Yesua wa talamiz tou. ¹¹ Zaman pharisiyn aiynu, Umon kelimu le talamiz tou, "Le mualim takum bi akulu ma nas ta daraib wa nas al katiyin?

¹² Zaman Yesua asuma kalam de, huwo gal, "Nas al kwesin fi jisim ma muhtajin le dictor, ile del al ayanin. ¹³ Ruwa wa fekiru kalam de gasit sunu, 'indi niya le rahma wa ma zebiha.' Fa Ana ja ma ashan bi nadi nas al kwesin ashan bi tub, lakin al katiyin.

¹⁴ Baad dak talamiz ta Yuhana ja le huwo wa gal, "Le nina wa pharisiyn kulu zaman bi sum, lakin talamiz taki ma bi sum?"

¹⁵ Yesua kelim le umon, "Hal keli nas al ja shahidu iris yekun haznanin wa aris lisa gaid ma umon? Lakin yom bija al aris bi shilu min umon, wa baad dak umon bi sum. ¹⁶ Mafi zol bi kutu gita ta gumas jedid fi jalabia al gedim, gita de bi sheretu bara min jalabia de, wa mahal al sheretu de bikun batal kalis. ¹⁷ Wele nas bi kutu Khamur jedid fi buksa gedim. Umon kan kutu, buksa de bi faga, khamur de bi kubu, wa buksa de bi karabu. Lakin, keli umon kutu khamur jedid fi buksa jedid, wa kulu itnin bikun kwes."

¹⁸ Zaman Yesua bi kelim kalam del le umon, wahid min muozif ja wa dengir gidam tou. Huwo gal, "Biniya tai gabul suya mat, lakin taali wa kutu iden taki le hiya, wa hiya bi ish." ¹⁹ Baad dak Yesua gam wa ruwa warau, wa talamiz tou ruwa warau.

²⁰ Mara al kan indu nezif le fetra ta itnasar sena, ja be wara ta Yesua wa lemesu gumas tou. ²¹ Fa hiya gal le nefsu, "kan ana bes lemesu gumas tou, Ana biligo ilaj."

²² Lakin Yesua galab wa aiynu hiya, wa gal, "Ya biti, shid helak; iman taki aliju inta." Wa mara de ligo ilaj fi nefsu sah. ²³ Zaman Yesua ja fi bet ta muozif de, Huwo aiynu muazifin wa jamahir bi kore shedid. ²⁴ Huwo gal, "ruwa beid, Biniya de ma mutu, lakin hiya naim." Lakin umon ataku le huwo be hagara. ²⁵ Zaman nas al limu de ruwa beid, huwo dakalu fi oda wa shalu hiya be yedu, wa biniya de gam fok. ²⁶ Kabar an kalam de waza fi kulu akalim.

²⁷ Zema Yesua masha min hinak, itnin rujal amiyanin ruwa wara tou. Umon bi kore be shot fok wa gal. "Arhamna, Ibin Daud!"

²⁸ Zaman Yesua ja fi dakil al bet, Rujal amiyanin del ja le huwo. Yesua kelim le umon, "Hal intum amin be-inu ana bi amul kalam de?" Umon kelimu le huwo, "Nam, Rabi.'

²⁹ Baad dak Yesua lemesu uyun tomon wa gal, "Keli kalam de hasil le intum hasab iman takum," ³⁰ wa uyun tomon fata. Baad dak Yesua amiru umon wa gal, "kede mafi zol arufu kalam de." ³¹ Lakin rujal al itnin del ruwa wa wazau kabar de le kulu akalim.

³² Zema itnin rujal del ruwa, zol tamtam moskun be roho sherir jabu le Yesua. ³³ Zaman roho sherir de talau bara, Zol al tamtam de bada wonusu. Nas al limu de bada istagrab wa gal. "Kalam de ma aiynu gabul kida fi Israel!"

³⁴ Lakin al pharisyin del galu, "Be sulta ta aruwah sherir, huwo turudu al arua sherir."

³⁵ Yesua ruwa fi kulu mudun wa bilad. Huwo istemir derisu fi mahalat ta salawat, bi besiru injil ta molokut, wa aliju kulu sikil ta ayanat wa kulu shikil ta amrad. ³⁶ Zaman huwo aiynu nas al limu, huwo indu hinia le umon, leanu umon indum mashakil wa niya tomon gofulu. Umon biga ze korufan al ma indum zol al bi aiynu wara umon. ³⁷ Huwo kelimu le talamiz tou, "Al hasat ketir, lakin nas ta sokol besitin. ³⁸ Ashan kida seli le Rabuna ta hasat, ashan huwo bi rasulu nas ta sokol le hasat tou."