¹ Hasa biga mutahakir fi yom Sebit, zema, biga saba bediri ta yom al awel fi usbu, ² Mariam Magdalene wa Mariam tani de jaa aiynu turuba. Umon kala, hinak kan zalzal shedid, Malaika ta Rabuna nazil min samah ja wa lizu hajir bara wa geni fogo. ³ Huwo zahir ze nur ta sakga, wa gumas tou abiyat ze telij. ⁴ Gufara kafu wa tala ze rujal al mutu. ⁵ Malaika khatibu nusuwan wa kelimu le umon, ⁶ "Matakum kafu, ana aruf intum bi fetisu Yesua, al kan selibu. Huwo mafi hini, lakin huwo gam, ze ma huwo kelimu. Taalu sufu mahal al kan Rabuna naim fogo. ⁷ Ruwa takun seri wa worii le talamiz tou, Huwo gam min mutu. Aiynu, huwo masi fi gidam takun le Galileya. Intum bi sufu huwo hinak, Aiynu, Ana wori le intum."

⁸ Nusuwan del kafu wa umon sibu turuba be sura wa maliyan mafara kebir. ⁹ Yesua gabilu umon wa gal "Salam ta kum" Nusuwan de ja, gobudu kurayin "tou wa abidu huwo. ¹⁰ Baad dak Yesua kelimu le umon, "Ma takun kafu, ruwa wori le akwana tai keli umon ruwa le Galileya. Hinak umon be aiynu ana."

¹¹ Zema Nusuwan sel bi ruwa, gufara tanin futu le medina wa kelimu le reis ta khahana kulu hajat dak al kan hasal. ¹² Zaman khahana del amulu ijtima ma shiyuk wa nakis moudu de ma umon, umon wodi gurus ketir le asakir ¹³ wa kelimu le umon, "Gulu le nas tanin, 'Talamiz ta Yesua' jaa hini be bilel wa seregu gesim tou zaman nina kan naimin. ¹⁴ Iza kabara de wosulu le waali, nina bi agnna huwo ashan bi shilu ai kafu bara min intum." ¹⁵ Asakir de shilu gurus wa umon amulu ze ma wori le umon. Kabara de bada waza beina Yehudiin wa istemir le yom ta alela.

¹⁶ Lakin talamiz hedasar de ruwa le Galileya, le jebel al kan Yesua wasifu le umon. ¹⁷ Zaman umon aiynu huwo, umon abidu huwo, lakin tanin de indum shukuk. ¹⁸ Yesua jaa le umon wa wonusu le umon wa gal, "Kulu sulta fi samawat wa fi ardi wodi le ana. ¹⁹ Ashan kida Ruwa takun wa amulu takum talamiz ta kulu dual. Amidu umon be isim al Ab, wa al Ibin, wa Roho Al Kudus. ²⁰ Derisu umon keli asuma kalam kulu ta awamir tai. Aiynu, Ana daiman maakum, hata le akir ta sinin.