¹ Yesua tala bara min haikal wa ruwa. Talamiz tou ja le huwo ashan bi wori le huwo mabna ta haikal. ² Lakin huwo juwabu wa kelimu le umon, "Intum ma aiynu hajat de kulu? Ana bi kelimu le intum hagiga, mafi hajer hata wahid bi sibu fi ras tani al ma bi talau bara."

³ Ze huwo bi geni fi jebel zetun, talamiz ja le huwo be siri wa gal, "Wori le nina, hajat del bi hasil miten? Alama ta ruju taki bikun sunu wa ta akir zaman?"

⁴ Yesua juwabu wa kelimu le umon, "Keli intum kun harisin ashan mafi zol bi woduru intum. ⁵ Nas kutar bi ja fi isim tai. Umon bi kelimu, Ana al Mesih.' Wa bi woduru nas kutar. ⁶ Intum bi asuma hurubad wa taharir ta hurubad. Aiynu ashan intum ma bi kun fi muskila, hajat del lazim bi hasil; lakin akir zaman lisa, ⁷ Doula bikun did doula tani, momlaka did momlaka. Maja wa zalzal bikun fi mahalat kutar. ⁸ Lakin hajat del kulu bikun bes bidaya ta waja ta welada. ⁹ Baad dak umon estelimu intum le azab wa bi katulu intum. Nas kulu fi dual bi karahu intum be sabab ta isim tai. ¹⁰ Baad dak nas kutar bi waga, wa bi amulu kiyana fi baad tomon wa akra baad tomon. ¹¹ Anbiya kadabin ketir bi zahir wa bi woduru nas. ¹² Le-anu adam hafisu ganun bi zid, nas kutar ma bi hibu nas tanin. ¹³ Lakin le zol bi ithamal le akir bi kalisu. ¹⁴ Kabar al kwes ta molokut de bi besihru le Duniya kulu ze shuhuda le kulu nas Baad dak akir zaman bi ja.

¹⁵ Ashan kida, fi zaman intum aiynu nas al bi karubu hajat ta Allah: Ali nebi Daniel wonusu, bi wogif fi mahal kudus" (keli zol al bi agra afham), ¹⁶ "Keli nas al fi Yahudiya jere le jubal, ¹⁷ Keli zol al fi ras al bet ma nezil tehet ashan bi shilu ai haja min bet tou, ¹⁸ wa keli zol al fi mazra ma raja ashan bi shilu gumas tou. ¹⁹ Lakin woe le del al indum jena wa le del al bi radau iyal suhar fi ayam dak! ²⁰ Seli ashan zaman ta jere takum ma bi hasil fi kharif wele yom al ahat. ²¹ Azab bikun fi, ali ma hasal fi bidaya ta duniya lahadi hasa, la, wele bi hasil tanimara. ²² Ile kan ayam dak kan gasiru, ma bi kalisu ai zol. Lakin be sabab ta nas ali azil Ayam dak bi gasiru. ²³ Baad dak iza kan ai zol kelimu le intum, 'Aiynu, Mesih yau hina' wele, Mesih yau hinak!' ma takum amin. ²⁴ Mesih al kuzuba wa anbiya al kuzuba bi ja wa bi amulu hajaib wa alamat azim, ashan bi woduru intum, iza kan mumkin hata nas al azilu. ²⁵ Aiynu, Ana wori le intum gubal zaman. ²⁶ Ashan kida, iza kan umon kelimu le intum, 'Aiynu, huwo fi beriya,' mata kum ruwa fi beriya. Au, 'aiynu, huwo fi juwa bet,' matukum amin. ²⁷ Fa ze nur bi wala zahir fi sherik wa bi wala sika fi gharib, de yau meji ta Ibin al Insan. ²⁸ Fi mahal al fi ayuwan meit, nusur bi limu hinak.

²⁹ Lakin baad azaab ta ayam dak tawali shemis bikun duluma, gamar ma bi wala, nujum bi waga min fok, wa guwa al fi samah bi hizu. ³⁰ Baad dak alama ta Ibin al Insan bi zahir fi jou, wa kulu gabail fi ardi bikun fi huzun. Umon bi aiynu Ibin al Insan fi sihaf be guwa wa mejid azim. ³¹ Huwo bi rasulu malaikat tou be sot azim ta turumbeta, wa umon bi limu nas al zilu min kulu arba arkan ta duniya fi mahal wahid, min kulu tija ila tija tani.

³² Akudu dirasa min shejer al tin. Zema fere tala gowi wa bi jada ursal, Intum bi arufu be inu kharif biga gerib. ³³ Wa kaman fi zaman intum sufu hajat del, keli intum arufu be inu huwo biga gerib, fi bab hoz. ³⁴ Ana bi kelimu le intum hagiga, jil de ma mutu lahadi hajat del kulu hasal. ³⁵ Samah wa al ard bi futu, lakin kalam tai ma bi futu. ³⁶ Lakin yom wa sah dak mafi zol bi arufu, hata malaikat ta samah, wele al Ibin, lakin ile abu. ³⁷ Ruju ta Ibin al Insan, bikun ze fi ayam ta Noah. ³⁸ Fi ayam dak gubal toufan nas kan bi akulu wa bi asrubu, bi zowuju wa bi wodi banat le zuwaj lahadi fi ayam Noah dakal babur, ³⁹ wa umon ma arufu haja lahadi toufan ja wa katulu umon kulu- ruju ta Ibin al Insan bi kun zede. ⁴⁰ Baad dak itnin rujal bikun fi zira- bi shilu wahid, wa bi sibu wahid. ⁴¹ Itnin nusuwan bi atanu fi murkaka- bi shilu wahid, wa bi sibu wahid. ⁴² Ashan kida keli intum kun harisin, le-anu intum ma arufu yom al Rabana takum bi rija. ⁴³ Lakin keli intum arufu kalam de, lo kan sidi bet arufu yatu zaman fi lel ali harami bi ja, huwo kan bi gafiru wa ma bi sibu harami ashan bi dakalu fi bet tou ashan seregu hajat. ⁴⁴ Ashan kida keli intum kun jahizin, Ibin al Insan bija fi zaman ali intum ma arufu.

⁴⁵ Ashan kida munu yau amin wa khadam al indu hikma ali seid tou jahizu usra tou ashan bi wodi le umon akil tomon fi zaman al sah? ⁴⁶ Baraka le khadam ali seid tou bi ligo bi amulu hajat del fi wokit huwo rija. ⁴⁷ Ana bi kelim le intum hagiga be inu seid bi kutu huwo fi ras kulu hajat tou. ⁴⁸ Lakin izakan khadam al sherir kelimu fi geliba tou, 'seid ta akir,' ⁴⁹ wa bada dugu khudam tanin al ma huwo, wa bi akulu wa bi asrubu ma sukurujin, ⁵⁰ baad dak seid ta khadam dak bi rija fi yom al khadam de ma bi itwaka wa sah al huwo ma arufu. ⁵¹ Seid tou bi gata huwo heta heta wa bi wodi mahal le huwo ma nas al mumesilin, fi mahal al fi kore wa adi sunun.