¹ Baad sita ayam Yesua shilu ma huwo Butrus, Yakub, wa aku Yuhana, wa jabu umon fi jebel fok be nufusum. ² Wusa tou geiru gidam umon. Wusa tou bi lama ze shemis, wa gumas tou abiyat ze nur. ³ Fi mahal dak, Musa wa Elia zahiru wa bi wonusu ma huwo. ⁴ Butrus juwabu wa kelim le Yesua, "Rabuna, Huwo bikun kwes ashan nina nakun hina. Kan inta deir, Ana bi abinu talata rokuba wahid le inta, wa wahid le Musa, wa wahid le Elia."

⁵ Fi zaman huwo bi wonusu, sihaf lama khati umon, baad dak fii shot bi kelim fi sihaf, "De weled tai al Ana bi hibu, ashan huwo Ana moksut. Asuma le huwo."

⁶ Zaman talamiz asuma kalam de, umon waga wa wusa tomon tehet wa kan bi kafu. ⁷ Baad dak Yesua ja wa lemesu umon wa gal, "gum fok wa mata kun kafu." ⁸ Baad dak umon aiynu fok lakin mafi ai zol al umon aiynu ile Yesua.

⁹ Zema umon bi nezil tehet min jebel, Yesua wodi le umon wosia, gal, "Mata kun wodi kabara le ai zol lahadi Ibin al Insan gam min al mut."

¹⁰ Talamiz tou asalu huwo, gal, "Le bad kida mulamin ta sheria bi kelim be-inu Elia lazim bi ja awel?"

¹¹ Yesua juwabu wa gal, "Hagiga Elia bi ja wa kutu haja be nizam. ¹² Lakin Ana bi wori le intum, Elia ja kalas, lakin umon ma bi agder zekiru huwo. Lakin, umon amulu ai haja al umon deiru le huwo. Be nefsu teriga, Ibin al insan kaman bi ligo taab fi idan tomon. ¹³ Baad dak talamiz fahim be-inu huwo bi wonusu le umon an Yuhana Moamadan.

¹⁴ Zaman umon ja le nas al limu, zol ja le huwo, degir gidamu, wa gal, ¹⁵ "Rabana, Amul rahma le weled tai, Huwo ayan be marad shara wa taban shedid. Baad marat huwo bi waga fi nar wa moya. ¹⁶ Ana jibu le talamiz taki, lakin umon ma bi agder ashan bi aliju."

¹⁷ Yesua juwabu wa gal, jil al ma amin wa ta fasat, Ana bi kun ma intum lahadi miten? Ana bi istahmal ma intum lahadi mtin? Jibu takum le ana. Hina." ¹⁸ Yesua wobiku roho sherir de, wa roho sherir tala minu, wa weled de ligo ilaj min nefsu sah.

¹⁹ Baad dak talamiz ja le Yesua wa kelimu, "Lee nina ma bi turudu roho sherir bara?"

²⁰ Yesua kelimu le umon, "Le-anu ashan iman takum al saker. Ana bi kelim le intum hagiga, Izakan intum indakum iman hata kan suker ze bizra al suker, Intum bi kelim le jebel de, 'Harik min hina le hinak,' wa huwo bi harik, wa mafi ai ²¹ haja ma mustehil le intum."

²² Fi zaman umon gaidin fi Jelil, Yesua kelimu le talamiz, "Ibin al Insan bi istelimu fi idan ta nas, ²³ wa umon bi katulu huwo, wa fi yom al talit bi goumu huwo." Talamiz biga ma murtahin.

²⁴ Zaman umon ja le Capernaum, Zol al bi limu daraib ta haikal ja le Butrus wa gal, Hal mualim takum ma bi dafa deriba ta haikal?

²⁵ Huwo gal "nam," Zaman Butrus ja fi bet, Yesua kelimu le huwo gal, "Inta bi fekir sunu, Samaan? Muluk ta ard bi limu daraib min munu? Min iyal tomon au nas tanin?"

²⁶ "Min nas tanin." Butrus juwabu. Baad dak iyal hur,' Yesua gal. ²⁷ Ashan kida nina ma bi kutu nas ta daraib keli ma amulu katiya, Amsi fi bahar, jadau jabada, wa amsuku awel samak al bital fok. Baad inta kan fata kasuma tou, inta bi ligo gurus min fida. Shilu wa dafa le nas daraib tai wa taki."