¹ Yesua nadi itnasar talamiz tou sawa wa wodi le umon sulta fok aruwah al nijis, ashan bi turudu umon bara, wa ashan aliju kulu anua ta amrad wa kulu anua ta ayanat. ² Hasa asma ta talamiz al itnasar yau del. Al awel, Samaan (al bi nadi Butrus), wa Andraus wa aku tou Yakub ibin Zebedayo, wa Yuhana aku tou; ³ Philipus, wa Bartolmeyos; Thomas, wa Matta al bi limu daraib; Yakub ibin Alpheyos, wa Thadeyos; ⁴ Samaan al Gayur, wa Yahuza al Iskarioti, al bi ja biyu Yesua.

⁵ Del al itnasar Yesua rasulu bara. Huwo wori le umon wa gal, "Matakum ruwa le ai mahal al yahudiyin gi aishin fogo, wa mata dakalu fi ai medina ta Samariyin. ⁶ Ruwa le Korufan al woduru ta bet ta Israiliyin, wa zema intum bi ruwa, beshiru wa gul, ⁷ 'Molokut ta samawat biga ja gerib.' ⁸ Aliju ayanin, goumu al meitin, tahiru nas al indu marad juzam, wa atrudu aruwah sherir. Intum ligo majani, wodi majani. ⁹ Mata shilu ai dahab, fida, nihas fi santa takum. ¹⁰ Mata shilu santa kan inta bi safir, wele Gemiz idafi, wele gizam, wele hasaya, zol al sakal bi istehik Akil. ¹¹ Fi ai medina wele beled al intum bi dakalu fogo, fetisu zol al bi istehik, wa geni takum hinak lahadi intum bi tala. ¹² Zema intum bi dakalu fi bet, selimu umon. ¹³ Kan bet de bi istehik, Keli salam takum ja le umon. Lakin kan ma bi istehik, keli salam takum raja le intum. ¹⁴ Le del al mabi rahibu intum wele bi asuma le kalam takum, wa kan intum bi rahalu bara min bet dak wele medina, nofudu gubar al fi kurein takum. ¹⁵ Hagiga Ana bi kelim le intum, taab de bi kun besit kalis le ardi ta Sodoma wa Gomorah fi yom ta gediya min medina dak.

¹⁶ Shuf, Ana bi rasulu intum zema korufan fi nus merfeinat, ashan kida keli intum kun negitin ze debiba wa ze hamama al ma bi awugu. ¹⁷ Keli intum kun harisin min nas! Umon bi selimu intum le majalis, wa umon bi jeledu intum fi mahalat ta sallah. ¹⁸ Basd dak bi jibu intum gidam hukam wa muluk ashan ana, ze shuhuda le umon wa le nas al geir Yahudiyin. ¹⁹ Kan umon selimu intum, Mata fekir kef wele intum be wonusu sunu, kalam al intum bi gulu bi wodi le intum fi zaman dak. ²⁰ Fa intum yau mabi wonusu, lakin Roho ta Abu takum bi wonusu fi intum. ²¹ Aku bi selimu aku to le mutu, wa abu bi selimu jena tou. Iyal bi gum did abuhat tomon wa bi kun sabab le umon ashan bi mutu. ²² Ai zol bi karahu intum ashan isim tai. Lakin le kulu zol al bi istahmal le akir, zol dak bi kalisu. ²³ Izakan umon bi amulu le intum itahadad fi medina de, jere le medina tani, hagiga ana bi kelim le intum, Intum ma bi ruwa le mudun ta Israel gubal Ibin al insan bi ja.

²⁴ Telmiz ma kebir min ustaz tou, wele kadam fok seid tou. ²⁵ Huwo kifaya le telmiz ashan bikun ze ustaz tou, wa kadam ze seid tou. Kan umon nadi sidi al bet Beelzebul, asma al umon bi nadi be nas ta bet tou bikun batal kalis! ²⁶ Ashan kida mata kafu umon, mafi haja mokful al ma bi zahir, wa mafi haja dusu al ma bi arufu. ²⁷ Kalam al Ana wori le inta fi duluma, wori be nahar, wa kalam al inta asuma be sot tehet be adana taki, wori be sot fok le nas ashan bi asuma. ²⁸ Mata kafu del al bi katulu jisim lakin ma bi katulu roho. Lakin, kafu huwo al bi agder demiru roho wa jisim fi johanam. ²⁹ Itnin tiyur suhar ma bi isteru be shiling? Lisa mafi wahid min umon waga tehet bidun ilim min Abu takum. ³⁰ Lakin hata shar ta ras taki adad tou arufu. ³¹ Mata kafu. Inta mohim shedid min tiyur ketir al suhar. ³² Ashan kida ai wahid al be sahidu ana gidam nas, Ana bi sahidu gidam Abui al fi samah. ³³ Lakin Zol al ankuru ana gidam nas, Ana kaman bi ankuru huwo gidam abui al fi samah.

³⁴ Mata fekir be-inu Ana ja ashan jibu salam le ard. Ana ma ja ashan jibu salam, lakin shef. ³⁵ Ana ja ashan kalik weled did abu tou. Wa biniya did umu, wa mara did nesiba tou al mara.

³⁶ Adu ta zol rajil bikun min nas ta bet tou. ³⁷ Zol al bi hibu abu wele umu aktar min ana ma bi istehik ashan bikun telmiz tai: wa zol al bi hibu weled wele biniya tou aktar min ana ma bi istehik ashan bikun telmiz tai. ³⁸ Zol al ma bi arfa selib tou wa ja wara tai ma bi istehik ashan bikun tai. ³⁹ Zol al ligo haya tou bi woduru haya de. Lakin zol al bi woduru haya tou ashan ana bi ligo haya al hagiga.

⁴⁰ Ai zol al rahibu intum rahibu ana, ai zol al rahibu ana kaman rahibu huwo al rasulu ana. ⁴¹ Ai zol al rahibu nebi leanu huwo nebi bi akudu makafa ta nebi, wa ai zol al rahibu rojul al saleh leanu huwo rojul saleh bi akudu makafa ta rojul saleh. ⁴² Ai zol al wodi le wahid min suhar del, hata kan kubaya ta moya barid asham bi asurub, leanu huwo telmiz, hagiga Ana bi kelim le intum, Huwo be ai teriga ma bi agder fagit makafa tou."