¹ Erotundo Yesu watuka mo numba warika kumushi ne nyansa. ² Bhea bhingi bhamwemisa nti bhari kumushi nae, wakime mu bhwaato, warika. E bhea bhati bhabhesa nti bharika kumushi ne nyasa. ³ Warebho mu mishumo mu bhikai bhingi, washisha bho. ⁴ Muhingi uma watuka wenda keka, wakia wekange mbuto sima sakirae kumushi n'ense, mironge yiya yarisato. ⁵ Simpe sahuka mu makoi hasira oto rwa sonda bhushi nti sasheenga oto. ⁶ Arekia ematu emwishi eya sashire sakama bhushe sisira miri. ⁷ Simpe sahuka mu menke emenke y'iondonda kurito sasonda. ⁸ Simpe sahuka hari oto rwa konda, sabhuta mbuto, sima sabhuta iyana, simpe makumi mutubha, simpe makumi ashatu. ⁹ Kinsi uri na mate iyorukira werukire.

¹⁰ Esantumwa siya kumushi nae, samwire bhushanki ongo shishangebho mu mishumo?

¹¹ Yesu wasubhiebo bhushe murininkwa bhwenge bhwe sibha bhishisharo bhye bhwime bhwe kwiyo imbu nti bhwarininkwa bhampe. ¹² Bhushe ingu ukwengi waaninkwa na usebha mu bhingi, ina kuringu usira ne kiri nae wasenyakwa cho. ¹³ Ngi kisingwange nere bho mu mishumo, bhushe morikae bhatangakae na murirukira bhatangerukira. ¹⁴ Kongo ebhutahwa bwa Isaya bhwabhererera kuri bho: mukwerukirayo mo mate inu ina mutusibhiyo kikai, mukaeyo mo meso inu na mutu sungiyo.

¹⁵ Bhushe mitima y'ebhea mbi yasuma nguru, bhasumyayo emate abho na bharindikayo emeso abho, kongo kiro bhakae mu meso abho na kwerukira mu mate abho kiro bhasibha mo mitima yabho na kwesibhirira kongo naramya bho.

¹⁶ Bhakasanirwa imbi bhakaengi mu meso abho ne mate bhushe bhorukirange. ¹⁷ Nabhushisha mor'eira bhatahwa bhingi nambi bh'er'eira, bhe bhwenge bhahunanga isunga, n'iorukira bhwerukirange bhanu na nti bharorukira bhyo.

¹⁸ Bhanu, mwerukira emushumo w'emuhingi. ¹⁹ Kuti mwea worukira e bhinwa na nti wasimirabhyo mushumbu ntwiya kakuto esambuto mo mutima wae, nge sambuto sahukanga munkati n'ense. ²⁰ Ingu wasianga esambuto munkati na makoi, nge mwea worukirange ebhinwa bya Ongo n'esimira bhyo na ngoa. ²¹ Ina bhisira bhuriki. ²² Ingu esambuto siri munkati emenke, ngingu werukirange ebinwa bhya Ôngo myereko mikeke ye chuo yasingwa ekinwa cha hunyaara. ²³ Embuto sahukenga m'oto rwakonda, ngingu worukiranga ebinwa bya Ôngo n'etinge bhyo, wabhuta bhyuma, chuma kima cha bhuta iyana na kimpe makumi mutubha, na kimpe makumi ashatu.

²⁴ Wasonda ininka bho umpe mushumo webha: ebhubhake bhwa kokwiyo bwa susana na mwea wekanga mbuto sakonda morishwa rae. ²⁵ Ina akiya e bhea bharere, mushumba wiya weka binsari munkati ne mbuto wenda rae. ²⁶ Akiya ebhisu bhyameshuka ni buta bhyuma, e bhinsari nabyo bhyasaa. ²⁷ E bhakori bhiyere mine kurwabo, ukwekanga mbuto sakonda kuningi kwa kutuka e bhinsari?

²⁸ Wasubhiebho e murenda ngwakukiambo, bhamwere ongo sondange tukuraebhyo.

²⁹ Watina, bhushi mukia bhanu mukuraange ebhinsari esambuto nato satuka hima. ³⁰ Mureki bhyo bhi'ku mongo iya mor otu rwe rikao namo ntambi yerikao, nashishayo ebhakauri mukutu kasa e bhinsari mushike bhyo hima ni shikabyo ina esambuto sendi mo mutundu wani.

³¹ Wasonda ikera umpe mushumo, webha: ebhubhake bwa kokwiyo bwasusanyiwa na mbuto nkeke, mwea uma weka murishwa rae. ³² Mbuto nkeke irenga esiti, akiya yoshukange yabhesa nkiri irenga esanyenyi, yabhesa muti mukiri ne mironge y'ekwiyo yakambe mo sentabhi sango muti.

³³ Washisha bho umpe mushumo, e bhubhake bhwa kokwiyo bwasusana na ntero mumina uma watinge yo waria yo mu nsara ishatu sa nchano niya m'oero r'iaa.

³⁴ Yesu washisha e nkumanano e bhinwa bhiti mbi mu mishumo. ³⁵ Kongo bhyabhererera imbi bhyebhwanga n'emutahwa: n'obhora yo e bhunu bhwani mu bhinwa, nasheayo mbi bhyarebhiswa mo ntangiro.

³⁶ Himpo wahensa enkumanano wakime mu numba, esantumwa siya kumushinae na bhebhange, tutondori emushumo we bhinsari mo rishwa.

³⁷ Wasubhya: ingu wekanga e e mbuto sa konda nge mwana w'emwea. ³⁸ Erishwa, ng'echuo kino, e mbuto sahunda, e bhana bh'e bhubhake, e bhinsari, e bhana bha mushumbu. ³⁹ Emurenda ingu wekanga nti mushumbu; e bhakauri ngi hende chuo: e bhakauri ng'esangashani. ⁴⁰ Imbu bhukuraanga bho ebhinsari nitaa bhyo mu kasha, bhisebhesayo bhumbo hende echuo. ⁴¹ Musike wa Ongo watumayo e bhasanasana bhae bhasekutoyo mo bhubhake bhwae ebhabhisha nambi bhakiange bhubhi, ⁴² N'itaabho mo rirunga, kunko kusebhayo kiro n'eshiisha emeno. ⁴³ Bhe riira bhasanayo bhuri mwishi mo bhubhake bwa Tita, kubha ongo'ri na mate iyorukira.

⁴⁴ E bhubhake bhwa kokwiyo bhwasusanyiwa na bhehe bhyabhiswa munkati niishwa. E mwea ewasheengabyo wabhisa, na mo sangoa sae wenda wachuya bhiti bhiri nae n'echura erishwa.

⁴⁵ E bhubhake bhwa kokwiyo bhwasusanyiwa tu na mwea mwendendi wachura muringa wakonda. ⁴⁶ Washee muringa wa bhusi bhwasuma wenda wachuya ebhiti bhiri nae wachurao.

⁴⁷ E bhubhake bwa kokwiyo bhwasusanyiwa tu na bhukira bhwatawa munyansa na bhwatinge ebhiti bhya kinsi nsusanya. ⁴⁸ Bhwakia bwa marisa emurobhi wakururabo, wakia wamarika kumushi warondora esanchwi sakonda waria to mu mutundu na wataa insi sema. ⁴⁹ Ngebhusebhesayo bhyo hende chuo, bhasanasana bhasiyayo mwikia kwa hehe ebhabhi nambi bhakonda. ⁵⁰ Na bhasetawayo murumini rw'ekasha kunko kwabhesayo kiro n'eshiisha emeno.

⁵¹ Mumerukira ebhitimbi? bharisiya.

⁵² Wire tu bho: bhusha kingi mutiranyi urina bhwenge mumbi bhyakae ebhwami bhwa kokwiyo bhwasusanyiwa na mine numba wakuto mu bhehe bya bhikai bhishasha na bhyakare.

⁵³ Yesu wakiya wamaheanya emishumo. ⁵⁴ Wenda ku kwabho, wenda uhanange mo sinangoki, nambi bhabhesenga bhamwerukirengi bhashishara, na bhebhange: kuni ngi kwakutowe ebhwenge n'ebhishisharo? ⁵⁵ Ntingi musike wangu utunganyanga ebisai, nti Maria ngi nina, Yakobo, Yosefu, Simoni na Yuda ntingi bhasike bhabho? ⁵⁶ Na bhisi bhabho ntimbi bari munkati nitu? kuni ngi kwa kutowe ebhwengembu.

⁵⁷ Na r'ibhesange kuribho myereko yefundwa, yehimwa Yesu washishabho: emutahwa usira otunda kukwabho. ⁵⁸ Nti wakianga bhishisharo bhingi nko bhushe bwe mitima yabho yasuma.