6

¹ Mwerinde owutakholeranga ebiitu byenywe ebyowolerefu mu moni chabaatu, mbo babawone. Olwokhuba nimunakholeenge mutyo si munaweresewenge omusaara eyiri Senywe oli mukulu. ² Manu nokabiranga abali mu wetaafu, otekhubbiranga olwika omweene nga ababachirisi lubakhola mu makhunηaniro nende khu ngira abatu babawe oluyaali. Masima mbawoola nti, bamalire okhuweewa omusaara kwawe mu wichufu. ³ Naye ewe no’kabiranga abali mu wetaafu, omukhono kwawo omukooda kukhayenge okhumanya omuluungi sikukhola, ⁴ okhukaba khwawo khubenge khwengiso. Manu Bbabbawo, owona mu ngiso, alikhuwa omukawo.

⁵ Khandi nimusabanga, mutaba nga ababachirisi, olwokhuba badakha okhusaba nibeemire mu makhuηηaniro, nokhuntulo wamakira mbo abatu babawone. Masima mbawoola nti, bamalire okhuwewa abo omukawo kwawe mu wichufu. ⁶ Naye ewe nosabanga, yingiraanga mu sisenge, wikalewo olwiiki osabe Bbabbawo, otawonekhana. Ne Bbabbawo owona mu wekisi, alikhuwa omukawo. ⁷ Ne enywe ni musabanga, mutakowocholaanga mu mboosi nga abateende nibakhola, olwokhuba babaasa mbo banawulirwe olwemboosi chawe enyingi. ⁸ Manu mutaba nga abo, olwokhuba Senywe amanyire bimudakha nimutamusaba. ⁹ Manu musabenge muuti: Bbabba wefwe owomukulu, eriita lyawo lifumisiwe, ¹⁴ Olwokhuba ni munalekherengemo abatu ababakhola owubi, Senywe oli mukulu yesi anabalekherengemo mwesi. ¹⁵ Naye ni mutaalekhereengemo ababakhola owubi, Senywe oli mukulu yesi syanabalekhereengemo ebibi byenywe.

Okhusiiba

¹⁶ Naye ni musiibanga, mutabanga nga ababachirisi abawonekha nga abali nende engisa olwokhuba bakalukhaniya embonekha yawe mbo abaatu babawone baati basiibire. Masima mbawoola nti, bamalire okhufuna omukawo kwaawe kwosi. ¹⁷ Naye ewe nosiibanga, webakheenge amafuta mu mutwe, wesabenge nende mu moni, ¹⁸ abatu bakhaye okhuwona baati osiiba, okhumalakho Bbabbaawo, otawonekha; nende Bbabbawo, owona ebiri mu wekisi, alikhuwa omukawo.

Owuyiinda Mukulu

¹⁹ Mutebikhiraanga owuyiinda wenywe khu syaalo, yimasiriyi nende enkherebeende yichakhanyasa, nabebi yibakhakhalaka beeba. ²⁰ Naye owuyiinda wenywe mu wubikheenge mukulu yiwutanyaasikhira, namasiriyi ata nende enkherebeende yichitakhanyasa ata nabeebi yi batakhalaka beeba. ²¹ Olwokhuba owuyiinda wawo yi wuba, nje omwoyo kwawo kwosi yikuba.

²² Emoni nje etaara lyo mubiri. Sakira emoni yawo niyiiba enamu, omubiri kwawo kwoosi kuba nowulafu. ²³ Naye emoni chawo nichiba embi, omubiri kwawo kwoosi kunabeenge mu sirema. Manu owulafu owuli mu mubiri kwawo ni weekhola esirema, esiirema esyo nga siba sinaabe sikali!

²⁴ Awumawo omutu onyala kakholera abakhongo babiri. Olwokhuba aba anasyulenge mulala kadakha owundi, oba anomiirire khu mulala kalekeresaanga owundi. Simunyala okhukholerera Weere nende owuyiinda.

Mutelalikhirira

²⁵ Sakira mbawoola nti mutelalikhirira owulamu wenywe, muti mulirya si oba mu linywa si; ata nomubiri kwenywe, muti mulyambala si. Owulamu siwukhira esyokhulya, nomubiri sikukhira ebyokhwambala? ²⁶ Muwone amayoni akomubbanga; sikataaka khandi sikakesa oba sikawuunga mu byaaki, ne Senywe oli mukulu akaliisa. Enywe simukakhira lukali ako? ²⁷ Nanu mwinywe nikelalikhirira onyala okhweyongerakho khu wulamu waye?

²⁸ Ne wunanu esiberalikhirisa ebyokhwambala nisi? Muwonere khu bimuli ebyo khutale ngalubikhula, sibikhola mulimo sibinaba enguwo. ²⁹ Naye mbawoola nti Sulemaani mu luyaali lwaye sikambalakho nga sirala khu bimuli bino. ³⁰ Naye Weere akambasira atyo ebimuli byomundalo, ebiriwo leero, ne muchuli babisamba syalibambasa enywe lukali okhukhiraho abo, Oo enywe abali nende okhufukirira okhutono? ³¹ Manu mutelalikhiriranga nimuwoola muti Khulirya si? oba Khulinywa si? oba Khulyambala si? ³² Olwokhuba ebyo byoosi abakafiri nje ababikoonya, ne Bbabba wenywe owomukulu amanyire nga mubidakha. ³³ Naye mutangire mukoonye Owenengo nowolerefu waye, manu ebyo byoosi mulibyongeswakho. ³⁴ Manu mutelalikhiriraanga ebyomuchuli, olwokhuba oludaalo olwomuchuli lwakhelaliikhirire ebyalwo. Oludaalo lulala esidinyu syalwo sirumala.