21

¹ Nga lubali nibolerera ambi wa Yerusaalemi bola e Besufage khu lugulu lwa Sseyituni, Yesu katuma abeeki babiri, ² nabawoola ati, Muche khu lukoongo olubali emutwe, awene awo munawone ensukhiri nimboye, no mwana kwayo alala nayo, muchiwolole muchindetere. ³ Ne omutu nabawoola emboosi yoosi, mu muwola muuti Omwami nje ochidakha, naye anachisindikhe okhwicha khangu khangu.

⁴ Sino syaliwo emboosi yolerere Nnabbi yikalomaloma nawoola ati: ⁵ Muwolere omukhana wa Sayuuni muuti, Wona, Omwenengo wawo kecha yoli, omuloonga naninire khu nsukhiri nakhamosi, akhana khensukhiri.

⁶ Abeeki bacha bakhola nga Yesu lu kali nabalagiiye. ⁷ Baleta ensukhiri, nomwana kwayo, nibachiteyekho enguwo chawe, ne Yesu achikhalakho. ⁸ Abatu bangi abomusidiikha nibaala enguwo chawe khungira, ne abandi nibatema amasaga okhutula khu misaala nibakaala khungira. ⁹ Ebidiikha byabatu ebyamutangirira, nende ebyo ebitula enyuma, nibilomalomera amukulu nibiwoola biiti, Osaana eyiri Omwana wa Daudi! Ayeresewe enkhabi owicha mu liita lyomwami! Osaana amukulu lukali!

¹⁰ Yesu ni kengira mu Yerusaalemi, esiko syoosi nisidengaana nisiteeba siiti, Ono nje nanu?

¹¹ Ebidiikha nibikowoolamo biiti, Ono nje Yesu, nabbi otula mu Nazaleesi esye Galiraaya.

Yesu Mu Nyumba Ya Weere

¹² Yesu kengira mu nyumba ya Weere kerusya erwanyi abo boosi abali ni bakula khandi ni bakusiramo. Kafunikha emeesa echabo abali ni bafunjisa efeesa, nebisaala ebyabali nibakusa amawuusi. ¹³ Nawoola ati, Syawandikiwa siiti, Enyumba yange yirilangiwa enyumba yokhwinamiramo, ne enywe muyikhola okhuba enηungu ya’banyaka.’”

¹⁴ Awo abekafu b’emoni n’abalema nibecha yali mu nyumba ya Weere, kabawoniya.

¹⁵ Ne bakhawona abakhulutu n’abasomesa ba’malako nibawona ebya’makana bikakhola, na’baana nibakhubbira olukhero mu lwanyi lwe’nyumba ya Weere baati, Osaana eyiri Omwana wa Daudi, banyiiga.

¹⁶ Nibawoola baati, owulira abaana bano bi bawoola? Yesu kabakowolamo ati, Eee, si musomangakho muuti okhutula mu minwa chabaana bayere nabadoto okhukinisiwa khwatewakho emikhono?

¹⁷ Nabalekha natula mu siko nacha e Besaniya, yikakona.

Omutiini Kwooma

¹⁸ Awo echuli, nikali nakowolayo mu siko, enjala yamuluma. ¹⁹ Nikawona omutiini mulala khuntulo wolukuudo, kacha yikuli kawona nga khuwuma siitu okhutusakho amasaafu kerere. nakuwoola ati, Okhoya wakhaya ohwama ebyaamo khandi endaalo choosi! Wangu wene omusaala kwamala kwooma.

²⁰ Abeeki baye nibawona sino, bawuka nibawoola baati, Omutiini kwomire kutye khangu khangu?

²¹ Yesu nakowolamo ati, Mbawoolera amasima nti, nimunabenge nenfukirira atali khukanakana, simunakholeenge sino syonηene esy’omutiini, ne nimuliwoola olugulu muuti, kingukha wesukune mu nyanja, sirikholekha. ²² Ni mufukirira, mulifuna bimudakha okhubita mu khusaba.”

Okhukanakana Khu Wunyala Wa Yesu.

²³ Yesu kengira mu lwanyi lwe’nyumba ya Weere, ne nga lukali nasomesa, ba khawona na bakhulutu ba batu becha yali. Bamuteeba baati, Wunyala siina owukhukhosa bino? Khandi nanu owakhuwa owunyala wuno?

²⁴ Yesu kakowolamo ati, Sesi khambateebe esiteebo sirala, ni munasingowolemo, sesi ndabawoolere owunyala nga luwuli owunkhosa bino. ²⁵ Okhubatisa khwa Yokana__ khwatula ena? Khwatula mwikulu, nawo mu batu? Ni batebanakho abene nabeene, nibawoola baati, ne nikhuwoola khuti Mwikulu, anatuwoole ati, Siina esyabalobera okhufukiirira? ²⁶ Ne nikhuwoola khuti, Okhutula mu batu-khutya abatu, khulwokhuba boosi babaasa baati Yokana kali nabbi. ²⁷ Nibakowolamo mu Yesu, nibawoola baati, Sikhumanyire. Ne Yesu nabawoolera ati, Sesi sindabawoolere owunyala nga luwuli owunkhosa bino.

Olukaado Lwabasyaani Babiri

²⁸ Ne mubaasa mutye? Aliwo omutu owali nabasyani baye babiri, nikecha eyiri mulala namuwoola ati, Omwana, cha leero okhole emirimo mu ndalo yemisabbibbu.

²⁹ Kakowolamo ati, Nhayire, ne olunyuma nikeyolobya, nacha.

³⁰ Ni kecha eyiri owokhubiri, namuwoola atyo, kakowolamo ati, ssebo ndache, manu kakhaya ohucha. ³¹ Khu abo bombi nanu owakhola simwana syadakha? Nibawoola bati, Owatangira, Yesu kakowolamo ati, Masima mbawoola nti, abawoosa nende abacheke babatangiriye__ enywe okhwingira mu wenengo wa Weere. ³² Khulwokhuba Yokana kecha yimuli okhubekesa engira eyowolerefu, nanywe khaba simwamufukiirira, naye abawoosa nende abacheke bamufukirira. Ata nimwawona mutyo, nokhufuna khaba simweyolobya ata mwamufukiirira.

Olukaado Lwomupangisa

³³ Muwulire olukaado lundi; Aliwo omutu owali neroba lyaye, kataaka endalo yemisabbibbu. Kayisita nende olusito, naluyabamo esikoyero, nikombakha omugiigo kwokhwewunjirakho abeecha. Namala apangisa abatu balimi nacha olukendo. ³⁴ Awo omwaka nikwali nikuli ambi okwebyamo okhulaba, katuma abakhosi baye eyiri abapangisa babayerese ebyaamo byaye. ³⁵ Ne abapangisa badiira abakhosi baye; mulala ni bamukhubba, owundi ni bamwiita, owundi bamukhubba amakina. ³⁶ Khandi kabatumira abakhosi bandi, abakhirakho abatangira, bosi babakhola batyo. ³⁷ Olunyuma, nabatumira omwana waye, nawoola ati, banawulire omwana wange.

³⁸ Ne abapangisa nibawona omwana, nibawoolana abene nabene baati, ono nje omusikha. Mwiche khumwiite khulye owusikha waye. ³⁹ Nibamudiira, nibamusindikirisa bamutusa mu ndalo yemisabbibbu bamala bamwiita. ⁴⁰ Okhutula khwebyo, omwene ndalo yemisabbibbu naliicha, alibakhola atye abapangisa abo?

⁴¹ Nibamuwoola baati, Abo ababi alibasikhirisa. Naye endalo yemisabbibbu aliyidiisya abapangisa abandi, manu abanamwekesenge ebyaamo byaama mumwaka kwabyo.

⁴² Yesu kabakowolamo ati, Simusomangakho mu byawandikiwa biiti: Ekina abombakhi libakhaya niryo eryafuukha ekina lyohusonda, Omwaami atukholeye sino mu moni chefwe?

⁴³ Sakira mbawoola nti, Owenengo wa Weere wulibatusiwakho enywe, baliwuwa abatu abalyaama ebyaamo. ⁴⁴ khandi olikwa khukina lino alikhalikhakhalikha, ne oyo yiririkwakho lirimuminiyangula.

⁴⁵ Ne bakhawona bakhulutu nende Aba Falisaayo nibawulira engaado cha Yesu, bamanya baati abalomalomakho. ⁴⁶ Bachaka okhukoonya engeri cho khumudiiriramo, ne batya esidiikha syabatu abali nibamanyire Yesu, nga nnabbi.