19

¹ Ne Yesu nikamala okhulomaloma ebitu bino, katula e Galiraaya kacha mu situndu sye Buyudaya engerekha w’omwaalo kwa Yoludaani. ² Ne ebidiikha byamulondakho, kabawoneserya eyo.

³ Ne aba Falisaayo bandi becha yali okhumukhema. Bamuteba baati, Siri mu malako omusaacha okhwirusya omukhasi waye khu lwemboosi yosi yoosi?

⁴ Kabakowolamo ati, Khaba simwasoma emboosi yino mu njaka yesyaalo, Omulongi ni kalonga omusaacha nomukhasi, ⁵ Ne kawoola ati, ‘Sakira omusaacha alirekha simwana nende ηηina keyiimba khu mukhasi waye, ne abo bombi baba omubiri mulala?’ ⁶ N’olwesyo sibasiiri abatu babiri, naye mulala. Nolweesyo Weere syayimbanisye akhoyire awume omutu yeesi osikawukhaniyanga.”

⁷ Abafalisaayo ba muteeba baati, lwasiina Musa katusa elako okhufukiirira omusaacha okhwirusya omukhasi waye na muwandikiiye abbaruwa atyo?

⁸ Yesu kakowolamo ati, Musa kabafukiirira okhwirusya abakhasi benywe khulwemyoyo chenywe miwangalafu. Ne sisyali siityo okhutula munjaka. ⁹ Ne mbawolera ati oyo yeesi owiirusya omukhasi waye, okhutusakho olwowudamba, namala akhwa omukhasi wundi, aliba akholire esibi syowudamba nende oyo odehya yi berusya aba akholire owudamba.

¹⁰ Abeeki baye bawoola baati, Eyo niyiba nje embera yomusaacha, no mukhasi, siba sirayi owutadehya.

¹¹ Kakowolamo ati, Abatu boosi sibanyala khufukiirira enjekesa yino, naye okhutusakho abo abekulirwawo. ¹² Abandi barade okhwokhuba bewulwa baatyo; abandi bakholewa baatyo nabatu; abandi bakhaya okhudeehya khulwo wenengo womwikulu. Onyala okhufukirira sino asifukiirire.

Abaana Bayere Nende Yesu.

¹³ Manu baleeta abaana bayere eyiri Yesu abateekho emikhono nende okhubasabira. Naye abeeki baye bakayira abo ababaleta. ¹⁴ Ne Yesu kabawoola ati, Mulekhe abaana bayere beche yiindi, khandi mutabakayira, olwokhuba abafwaana nga abo, nibo abeene owenengo womwikulu. ¹⁵ Nikamala okhubatakho emikhono, katula mu sifwo esyo.

Omusyani Omuyiinda

¹⁶ Awene awo, omusaacha wundi kecha eyiri Yesu kamuteeba ati, Omwekesa, sirayi siina sinkhoyera okhukhola, kho nfune owulamu owutakama?

¹⁷ Yesu kakowolomo ati, “lwasiina wunteeba khu bitu birayi?” “Aliwo omutu mulala yeηηene omulayi. Ne noba nodakha okhwingira mu wulamu, fukirira amalako ka Weere.”

¹⁸ Kateeba Yesu ati, “Malako siina?” Naye Yesu kakowolamo ati, “‘Otetanga, otayirananga, otebaanga, otayeresanga owujjulisi wowubacha, ¹⁹ oweresanga lataawo nende mamawo oluyaali, khandi dakhanga owasyo nga ewe luwedakha omwene.

²⁰ Omusyaani oyo kawoola Yesu ati, Ebyo byoosi nabidiira, okhutula mu wuwere wange Ne siina khandi simba mbuma?

²¹ Yesu kamuwolera ati, Nodakha okhuba omutu mwoolerefu, cha, okusemo ebintu byoli nabyo manu erubya chitulamo chikabe abaati, manu oba ocha okhufuna owuyiinda mwikulu. Nomala yicha, wunonde. ²² Ne omusyaani oyo nikawulira sino, katula awo kawawo nikewunamiye lukali, olwokhuba kali nende emyandu mingi.

²³ Manu Yesu kawoolera abeeki baye ati, “Mbawolera amasima nti, sidinyu lukali omuyiinda okhwingira mu wene’ngo wa Weere. ²⁴ Khandi mbawolera nti, syangu lukali eηηamira okhubita mu kheena khe’piso okhukhira omuyiinda okhwingira mu wenengo wa Weere.

²⁵ Naye abeeki baye nibawulira bawuka wuka, nga bawoola baati, Nanu onyala kawonesewa?

²⁶ Yesu kabakhadaasa emoni, kamala kabakowolamo ati, Eyiri abatu sino si sinyalikha, naye eyiri Weere byoosi binyalikha.

²⁷ Awene awo Petero kakowolamo nawola ati, Wona efwe khwalekha ebitu byoosi manu khwakhulonda! Ne siina si khwakhafune?

²⁸ Yesu kabakowolamo ati, Mbawolera amasima nti, khu bikha byokhwiwulwa khwokhubiri khwebitu byoosi, omwana womutu lwalikhalira khu sisala esyo’luyaali lwowene’ngo waye, enywe abanonda mwesi mulikhala khu bisaala ekhumi nabibiri, ni mukhengera emisango ebikha ekhumi na babiri abya’baana ba Yisirayiri. ²⁹ Manu wuli mutu yeesi owalekha enyumba ata bamwanaηηina oba bambochoηηene oba lataηηene oba nηηina oba abaana oba eroba khu lweriita lyange acha okhufuna amakhabi emiya ndala kebyo alala nende okhusikhira owulamu owutakama.

³⁰ Naye abangi abaliba abamberi nje abalisembayo, ne bangi abasembayo nje abaliba abasokha.