17
Okhukalukhanisiwa
1
Endaalo mukaaga nichabitawo, Yesu kayira Petero, Yakobo nende Yokana mwaananηina, bacha khu lugulu luleeyi, baba eyo boηηene.
2
Eyo kakalukhanisiwa mu moni chawe ni bawona, oweni waye wamekhamekhana ngeryuba, enguwo chaye chaba ndafu ngomubasu.
3
Awene awo, Musa nende Eriya, babawonekhera nibali okhulomaloma naye.
4
Petero kawolera Yesu ati, Omwami, sirayi efwe khube ano. Noba nodakha, nja okhwombakha amakaali kadatu__ erala lyawo, erindi lya Musa nerindi lya Eriya.
5
Nikali nasiromaloma, esireesi simekhamekhana syecha syabawiikha, wona ekono lyatula mu sireesi niriwola liiti, Ono nje omwana wange, yindakha, yinkhira okhusangaliramo. Mu mutekerese!
6
Naye abeeki nibawulira sino, owuti wabadiira, bakwa assi mafumaye.
7
Ne Yesu kecha kabadirakho. Nawoola ati, Musingire mutatya.
8
Nibasingisa emoni sibawona mutu yeesi okhutusakho Yesu.
9
Nibali nibekha okhutula khu lugulu, Yesu kabakhutira ati, Mutawolerakho omutu yeesi bimuwene, okhwola ngomwana womutu lwalisyukhisiwa okhutula mu bafu.
10
Ne abeeki bamuteeba baati, Lwasina, Abekesa bamalako bawoola baati Eriya nje otekwa okhukowola mberi?”
11
Yesu kakowolamo ati, Okhukhakhasa, Eriya keecha khandi aliteresa ebitu byoosi.
12
Ne mbawolera nti, Eriya kamala okhwicha, okhutusakho abatu khaba si bamumanya, manu bamala bamusandya nga lubadakha. Manu mu ngeri nasilala nje omwana womutu lwacha okhusandisiwa mu makhono kawe.
13
Awo abeeki becha bamanya baati kali ali okhulomaloma khu Yokana omubatiisi.
Okhuwoniya Khwomusyani Olikho Dayimoni
14
Manu niboola mu sidiikha, omusaacha wundi kecha eyiri Yesu, kasigama mu moni chaye.
15
Manu kawoola ati, Kwira omwana wange esisa. Khulwokhuba akwa entulume khandi achunisiwa lukali. Endaalo nyingi akwa mu muliro, khandi olundi mu maachi.
16
Namuleta eyiri abeeki bawo ne sibanyala okhumuwoniya.
17
Yesu kakowolamo nawola ati, Enywe abo mu mirembe achitafukirira echekoda, ndiba nanywe okhwola lina? Ndi besimirisa okhwola li? Mundetere ano omusyani oyo.
18
Yesu kamala kakhamukhira dayimoni, manu yamutulamo, nokhutula esikha esyo omusyani oyo kawonerawo.
19
Ne abeeki becha eyiri Yesu mu ngiso nibateeba baati, Lwasina efwe si khwanyala okhwirusya dayimoni eyo?
20
Kabakowolamo nawola ati, Khulwokhuba muli nende enfukirira ntono. Mbawolera amasima nti, muba muli nenfukirira eyaka ngalumwo lwomuyofu, mwakhawoleye olugulu luno muuti, Tula ano oche era, Manu lwatulawo. Akhabeye awumawo esitu syoosi esyakhabakhayiye.
21
Naye esifwaana nga sino sisinyala okhutulawo ataasi okhusaba no'khusiiba.
22
Manu abeeki baye nibali nibewusise mu Galiraaya, Yesu kabawolera ati, Omwana womutu acha okhuweresewayo mu makhono kabatu.
23
Manu becha okhumwita, ne khu ludaalo lwokhudatu acha okhusyukhira. sino syaletera abeeki baye engisa lukali.
Omusolo Kwenyumba Ya Weere
24
Yesu nabeeki baye niboola e Kaperunawumu, abasolosi bomusolo kwenyumba ya Weere, becha eyiri Petero bamuteeba baati, Manu omwekesa wenywe akhubbanga omusolo kwenyumba ya Weere?
25
Petero kakowolamo ati, Eee awa. Manu Petero ni kengira mu nyumba, Yesu nje owasokha okhulomaloma. Kateeba Petero ati, Obasa otye Simoni, abenengo bo khu syaalo sino basolosa emisolo__ khu basyani bawe bene nawo khu bandi?”
26
Petero kakowolamo ati, khu bandi Yesu kakowolamo ati, “manu abasyani bali ne’dembe.”
27
Ne olwokhutabakhingakira, cha khu nyanja osukune endowo mu maachi. Winulule enηηeni yo’natangire okhudiisya; oyasamye omunwa kwayo onawonemo erubya eye’sangasa chine. Yiwukule oyibayirire okhubbe omusolo okwange nende okwawo.