16
Okhusaba Akhawonero.
1
Aba Falisaayo nende aba Sadukaayo becha eyiri Yesu okhumukhema nga bamusaba abekese akhawonero okhutula mukulu.
2
Kabakowolamo nawoola ati, Owiire niwira, muwola muuti, wunabe wuyenjefu, khulwokhuba ebiresi bitwakhaye,
3
Ne echuli, muuti anabewo embewo leero, khulwokhuba ekulu litwakhaye khandi limaliyisise. Mumanyire okhukawukhaniyawo ekulu nga lifwana, ne simunyala khukawukhaniyawo owuwonero we bikha.
4
Aboluse lubi khandi oludamba nje olukonyeresa akhawonero, ne awumawo akhawonero akhalibawewa okhutusakho akha Yona. Awo Yesu kabalekha kawawo.
Amamera ka Ba Falisaayo nende aba Sadukaayo
5
Nibali bakhambukha enyanja okhwola engerekha, abeeki bebirira okhukinga emigaati.
6
Yesu kabawolera ati. Mube wukheke“khandi mwerinde amamera kaba Falisaayo nende aba Sadukaayo.
7
Bachaka okhwetebanakho abene nabene baati, Awoola atyo khulwokhuba sikhukingire omugaati kwosi.
8
Ne Yesu kamanya sibali nibabasa mu myoyo chawe kabateba ati, Enywe abenfukirira ntono, lwasina mwetebanakho okhutaba nende omugaati?
9
Enywe mwesi musiri khumanya? Simukhewulira emigaati chitanu echalisa abatu enkhumi chitaanu, ee ebimwero binga bimwakhuηηaniya?
10
Oba emigaati musanfu echekusya abatu enkhumi chine? Ne ebimwero binga bimwawusa?
11
Mubeye mutye mwakhaya muti simbeye nomaloma ebidira khu mugaati? Mwerinde amamera k’aba Falisaayo nende aba Sadukaayo.”
12
Awo bemawo bamanya baati, sikali nalomaloma khukhwerinda amamera kakhola khu mugaati ne okhwerinda ensomesa ya ba Falisaayo naba Sadukaayo.
Petero kaatula Kurisito
13
Yesu nikola khu luwande lwe Kayisaliya eya Filipi, kateba abeeki baye ati, abatu bawola baati omwana womutu nje nanu?
14
Ne bakowolamo baati, Abandi bawoola baati Yokana omubatiisi; abandi baati Eriya; khandi abandi baati, Yeremiya oba mulala khu ba Nabbi.
15
Ne kabateba ati, Nanywe muwola mutye? Muwoola muuti nise nanu?
16
Simoni Petero kakowolamo ati, Niwe Kurisito, omwana wa Weere mulamu.
17
Yesu kakowolamo nawoola ati, Oli nende enkhabi, Simoni omwana wa Yona, khulwokhuba sino si syakhwekesewa nomutu, naye nende Bbabba oli mukulu.
18
Manu khuwolera nti, Ewe oli Petero, khandi khu lwanda luno ndyombakhakho ekanisa yange, manu ata emiryango che makombe sichiri yiyiingira.
19
Nja okhukhuwa olusimuluso lwOwene'ngo wo mukulu; manu wuli syoliwowa mu syaalo siriwowewa mukulu, khandi wuli syoliwolola mu syalo siriwololwa mukulu.
20
Manu kamala kakhutira abeeki baye okhutawolerangakho mutu yeesi baati nje Kurisito.
Yesu Alakula Khu Khufwa Khwaye.
21
Okhuchaka nesikha esyo Yesu kachaka okhwekesa abeeki baye ati simukhoyera ache e Yerusaalemi asandisiwe lukali mu makhono ka batangirisi ba batu, nende bakhawona bakhulutu nabekesa bamalako, khandi baati atekwa okhwitiwa ne khu ludaalo lwokhudatu asyukhire.
22
Ne Petero kamuwukula kamusudya khu ntulo kachaka okhumwolobya. Nawoola ati, Omwami! Sino si sirikhwekholekhakho ata nawutono!
23
Yesu kakalukhana kawolera Petero ati, Ntulireyo, sitani! Kowola enyuma wange, oli siteki yindi; khulwokhuba syubaasa ebya Weere okhutusaho ebya batu.
24
Awo Yesu kawolera abeeki baye ati, Omutu odakha okhunonda kefwirise omwene, ketwikhe omusalaba kwaye kanonde.
25
Olwokhuba omutu yesi odakha okhuwoniya owulamu waye acha okhuwukosya, ne oyo okosya owulamu waye khulwange acha okhuwufuna.
26
Sirimugasa sitye omutu okhulya esyaalo syoosi namala akosya owulamu waye wene? Oba siina syene omutu syanyala okhwofwaηηaniyamo mu wulamu waye?
27
Khulwokhuba omwana wo’mutu acha okhwicha nende ba Malayika mu luyaali lwa lataηηene, manu alikaba wuli mutu omukawo, okhwema khu byaliba nakholire.
28
Ne mbawolera amasima nti abandi khu bemire ano si balikhoomba khu khufwa nibasiri okhuwona omwana wo’mutu nikecha mu wen’engo waye.”