15

¹ Awo aba Falisaayo bandi nende abasomesa ba malako batula e Yerusalemi becha eyiri Yesu bamuteeba baati, ² Lwasi abeeki bawo banyasa ensambo cha bakuka yefwe? Hulwokhuba sibesaaba amakhono kawe nibacha okhulya!

³ Yesu kabakowolamo ati, Ne lwasi enywe mukhalaka ebiragiro bya Weere khulwokhuba mudakha okhukhola ebye’sambo cha bakuka yenywe?” ⁴ Khulwokhuba Weere kawoola ati, ‘Latawo nende makowo batengemo oluyaali, ne omutu yeesi okholimira simwana oba nηηina atekwa okhwitiwa.’

⁵ Ne enywe muwola muuti omutu yeesi owoola khu simwana oba khu ηηina, ‘Syoosi sinakhali nikhuwa okhukhugasa siweresise Weere,’ ⁶ alirekha okhuweresa simwana oluyaali. Manu sakira mukhayanga okhulonda emboosi ya Weere khulwokhudakha okhulonda emisiro chenywe chi mwaweresewa. ⁷ Enywe abebachirisi! Nabbi Yisaya kali mutufu nikali nabalakulakho: ⁸ Abatu bano bamberesa oluyaali lwokhumunwa, ne emyoyo chawe chiri aleyi nange. ⁹ Banyinamira werere; nga bekesa amalako kabatu nga esyokhudiira.’

¹⁰ Yesu kalanga esidiikha syabatu kabawolera ati, Muwulire khandi mutegere. ¹¹ Esingira mu khanwa khomutu sinje esimukhola kakhaya okhulaba, okhutusakho esitula mu khanwa nje esimuletera kakhaya okhulaba.

¹² Manu abeeki baye becha yaali bamuteeba baati, Omanyire oti byowoye ebyo bichunire aba Falisaayo ni babiwuliye? ¹³ Kakowolamo ati, Wuli simera syoosi si lata oli mukulu syatataaka sicha okhukhuliwa nemisi chasyo. ¹⁴ Enywe mubalekhe wusa; nje abemeresi bawofu. Ne omuwofu natangisamo omuwofu wasye, bombi balikwa mu wina.

¹⁵ Ne Petero kamukowolamo ati, Tutumbulire amakhulutu kolukado luno.

¹⁶ Ne kabateeba ati, Enywe mwesi musiri abafuwu? ¹⁷ Simumanyire muuti nawuli singira mu khanwa sicha munda syamala syatula erwanyi? ¹⁸ Ne ebintu bitula mu khanwa bitula mu mwoyo, ne ebyo nje ebikira omutu natalaba. ¹⁹ Khulwokhuba mu mwoyo njomutula ebibaso bibi, owiti, owudamba, owibi, owubacha, nende okhunyeka. ²⁰ Bino nje ebikira omutu natalaba; ne okhulya notesabire amakhono sinje ebikira omutu natalaba.

Enfukirira Yomukhasi Omu Kanani

²¹ Nikamala okhutula musyalo esyo, Yesu kakowola kacha mu Tino nende Sidoni. ²² Aliwo omukhasi mu Kanani okhutula mu situndu esyo, kecha eyiri Yesu kamulirira ati, Omukhongo, omwana wa Daudi, ngwire esisa! Omukhana wange mulwaye lukali khu lwa dayimooni.”

²³ Ne Yesu khaba sikamukowolamo ata emboosi yoosi. Ne abeeki baye becha bamwekweda baati, “Musewule awewo, khulwokhuba ali okhutulonderesa naalira.”

²⁴ Kakowolamo ati, “Natumiwa eyiri amakoondi kakota ake’nyumba ya Yisirayiri koηηene.”

²⁵ Ne omukhasi oyo kecha kasigama mu makulu ka Yesu. kawoola ati, Omwami, njede!

²⁶ Ne Yesu kakowolamo ati, sisikhoyera okhuwukula emere yabaana wasukunira embwa.

²⁷ Omukhasi kakowolamo ati, Eee, Omwami, esyo situfu. Ata nembwa chosi chiryanga owukhukhumukha okhutula khumesa yomutuki wacho.

²⁸ Yesu kamala kamukowolamo ati, mukhasi ewe, oli nenfukirira yamaani! Okhusaba khwawo khufukiriywe. manu nesikha syene esyo omukkhana waye kawonerawo.

Yesu Aliisa Abatu Enkhumi Chine

²⁹ Yesu katulayo kacha khuluwande lwenyanja ye Galiraya. Kaniina khundaalira cho lugulu kekhala assi. ³⁰ Esidiikha sikali nisyecha yaali, nga baleta abalema, abawofu, abewotola emibiri, abakwa esiru nabandi, babaleeta babaata mu makulu kaye; kabawoniya. ³¹ Manu abatu bawuka lukali nibawona abatu bali nibakwa esiru nibalomaloma, abewotola emibiri nibawonire, abalema ni bakenda nende abawofwu nibawona. Bakiniya Weere wa Yisirayiri.

³² Yesu kalanga abeeki baye becha yali manu kabawoola ati, Abatu bano bamambya esisa; khulwokhuba bakhamala nange endaalo chidatu nga sibali nesyokhulya. Sindakha okhubasiwula nibali njala, banyala okhufwira khungira nibakowolayo.

³³ Ne abeeki baye bamuwolera baati, Embesule eno khunatuse yena emigaati chinalise abatu bano boosi? ³⁴ Yesu kabateeba ati, “Muli nende emigaati chinga?” Bakowolamo baati, “Musanfu nende otuηeni tutono tuyeraanu.”

³⁵ Ne kawoolera esidiikha okhwikhala assi khwiroba. ³⁶ Manu kawukula emigaati musanfu nende eηηeni ntono echo, nikamala okhwebasa, kabimekulamekulamo kabiweresa abeeki baye, ne abeeki bosi batyo bakawula abatu. ³⁷ Manu boosi balya bekuta. Ebyo ni biweye abeeki bawusa owukhukhumukha wadoηηawo bechusa ebimwero musanfu. ³⁸ Abalya bali abasaacha enkhumi chine, no’tabaliyekho abakhasi na’baana.

³⁹ Ne Yesu nikamala okhubasewula, kecha kengira mulyato kawawo kacha mu situndu sibalanga baati Magadani.