14

¹ Mu ndaalo echo Herode owesasa kecha kawulira enfuma ya Yesu, ² manu kawola abakhosi baye ati, Oyo nje Yokana omubatiisi; asyukhiye okhutula mu bafu! sakira amaani kano kali okhumukholeramo.

³ Hulwokhuba Herode omwene nje owadiira Yokana kamuta mu jeera khulwa Kerodiya, omukhasi wa Firipo mwanaηηina. ⁴ Hulwokhuba Yokana kamuwola ati: “Sya musiro ewe okhuba naye.” ⁵ Kerode kali adakhire keete Yokana ne katya abatu, olwokhuba bamubasirisa okhuba nabbi.

⁶ Oludaalo nilwola olwokhukhewulirakho okhwiwulwa khwa Herode, omukhana wa Herodiya kabakhinira kasangasa Herode. ⁷ Manu kechuuba okhumuwa esitu syoosi omukhana oyo syanabe nasabire. ⁸ Ne omukhaana kachira khu makesi ka ηηina nga ngawoola ati, “Mberese omutwe kwa Yokana omubatiisi hu luderu wunanu wuno.” ⁹ Sino syecha syamala mu omwenengo amaani, ne okhwema khu khwechuuba khwaye abakeni khu bali nibawuliye, katya manu kecha katusa omunwa ati bakumuwerese ¹⁰ manu katuma bacha mu jeera bakhenga khu Yokana omutwe. ¹¹ Baleta omutwe kwa Yokana hu luderu manu bakuwa omukhaana oyo, kamala kakuletera ηηinna. ¹² Ne abeeki ba Yokana becha bawukula omulambo kwaye bacha bakusiikha. Nibamala nibacha bawolera Yesu.

Yesu Aliisa Abatu Enkhumi Chitaanu:

¹³ Wunanu Yesu nikawulira bino, katulawo kengira mu lyato kacha ayeηηene musifwo siwumamo batu. Nibawulira baatyo, bamulondakho namakulu okhutula mu biko bitasi nasirala. ¹⁴ Nikatula mu lyato kawona esidiikha esya’batu esikhongo, sino syamudisya esiisa kawoniya abalwaye bawe.

¹⁵ Ne owire niwola esye’ngolobe abeeki baye becha yali bamuwoolera baati, Owire mbuno wirire khandi khuli mu syaalo esyembesuule, sewula esidiiha bache mu biko bekulire emere.

¹⁶ Ne Yesu kakowolamo ati, Abatu bano khaba sibakhoyera khutula ano. Enywe mubawe ebyokhulya.

¹⁷ Nabo bamuwolera baati, “Efwe khuli wusa nende emigaati chitanu nende eηηeni chibiri.

¹⁸ Ne Yesu amala awoola ati, “mubindetere ano.” ¹⁹ Manu kamala kalagira abatu okhwikhala asi khu wunyasi. Nawukula emigaati chitanu nende eηηeni chibiri natingala amukulu mukulu, kebasa Weere, manu kakhalakamo emigaati echo kachiwa abeeki baye, ne abeeki bachaka okhuchikabira abatu. ²⁰ Manu abatu boosi balya bekuta, wunanu abeeki ba Yesu bawusa owukhukhumukha w’emigaati echo owadonηηakho bechusa ebimwero ekhumi na bibiri. ²¹ Ne abalya bali abasaacha ambi enkhumi chitaanu, notabaliyekho abakhasi nende abaana.

Yesu Akendera Khu Maachi

²² Wangu wene, Yesu kabikirisa abeeki baye okhwingira mu lyato batangiremo bambukhe bache engerekha, omwene kasikala nasewula esidiikha syabatu. ²³ Ne nikamala okhubasewula, kaniina yeηηene khu lugulu okhusaba. Manu engolobe niyoola, mu khesisye kali eyo yeηηene, ²⁴ ne esikha esyo eryato lyali lyolereye ewusiba, enfwinda cha maachi chali chirikhubba olwokhuba oluwucha lwali lubatulira mu moni, yiibacha. ²⁵ Owiire niwakhoola musaawa chine echesiro, Yesu kacha yibali, nakenda khu nyanja. ²⁶ Ne abeeki baye ni bamuwona nakendera khu nyanja batya lukali bawoola baati, nga kuno musambwa nikwo, manu besindukha khandi batya. ²⁷ Awo nje Yesu akakowoleramo kawoola ati: Mugume emyoyo, nise mutatya khaba.

²⁸ Ne Petero kakowolamo nawoola ati, Omwami, noli niwe, mbolere niche yoli sesi ningendera khu maachi.

²⁹ Yesu kamuwolera ati, yicha manu Petero katula mulyato kachaka okhukendera khu maachi nacha eyiri Yesu. ³⁰ Ne Petero nikawona enfwinda, katya, kachaka okhwibira, ngakhumula ati, Omwami, mboniye!

³¹ Mangu awo Yesu kakolola omukhono kamudiira nawola ati, Ewe omusaacha wenfukirira ntono,” Lwasi okanakanire? ³² Ne nibamala okhwingira mu lyato bati noluwucha lwakama,

³³ Manu abali mu lyato bamukiniya nibawoola baati, Masima kene oli mwana wa Weere.

³⁴ Ne nibamala okhwambukha enyanja, bola engerekha bakobera e Genesaleti. ³⁵ Ne abatu beyo nibamanya baati nje Yesu, bacha bawolera abatu bomu situndu esyo syosi syoosi. Abatu baleta abalwaye bawe boosi yali

³⁶ manu bamusaba baati afukirire abalwaye badirekho wusa khu kemo lyesyambalo syaye, ne abo bosi boosi abamudirakho bawonera erala.