13

¹ Khu ludaalo lwene olwo Yesu katula mu nyumba kacha kekhala assi khu ntulo wenyanja. ² Ne esidikha sya’batu syecha syamwewodokhaniya manu kengira mu lyato kekhalamo, ne abatu boosi badonηηa khu sigenya. ³ Manu kachaka okhubawolera ebitu bingi nga akhosesa engado ati: “Olwola omulimi kacha okhuwaanya emwo yaye. ⁴ Manu nikali nawaanya, emwo chindi chakwa khu ngira, ni amayoni kecha kachiwocha. ⁵ Emwo chindi chakwa khu lwanda, atali eroba lingi. Manu chamera wangu, olwokhuba eroba lyali tono. ⁶ Ne omubasu ni kwecha, ebimera byaniyala, khandi byoma, olwokhuba sibyali nemisi. ⁷ Emwo chindi chakwa mu mawa, checha chakhula ne amawa kecha kakhula kachimira. ⁸ Emwo chindi chakwa mu roba layi, manu chama ebyamo-echindi ebyamo emiya ndala echindi nkaaga, echindi asatu. ⁹ Oyo oli namatwi, awulire.

¹⁰ Musikha esyo abeeki ba Yesu becha yali bamuteeba baati, Sina esikira nolomaloma na batu mu ngaado?

¹¹ Ne Yesu kabakowolomo ati, Enywe ninywe abaweresewa enkhabi okhumanya esyama esyowenengo wo mukulu, ne abo khaba bawuma nkhabi eyo. ¹² Khulwokhuba wuli mutu oli nende esitu acha akhwongerwakho esindi, manu abe nende bingi ebikhirakho. Ne owumakho nende syoosi, ata nende khatono khali naho acha okhutusiwakho. ¹³ Sino nje sikira ni nomaloma nabo mu ngaado: Abakhaba nibatingaala nikhaba sibawona; batekeresa nikhaba sibawulira ata sibamanya nokhumanya. ¹⁴ Mu bo emboosi ya nnabbi Yisaya yolerera: Muliwuliranga ne simulitegeera amakhulutu kene; khandi mwakhewunje ne mwakhaya okhuwona.

¹⁵ Khulwokhuba emyoyo chabatu bano miwangalafu; khandi badimbe, khandi bamala okhulimbya emoni chawe khulwokhuba bibakhawene nende emoni chawe bakhawuliiye nende amatwi kawe, khandi bategera nemyoyo chawe nokhuchukha nakhabawonisye.

¹⁶ Ne emoni chenywe chiri nenkhabi khulwokhuba chiwona, ata namatwi kenywe khulwokhuba kawulira. ¹⁷ Mbawolera amasima nti, ba nabbi bangi nende abatu bolerefu bangi abekomba okhuwona bimuwona ni khaba sibabiwona, okhuwulira bimuwulira ni khaba sibabiwulira.

¹⁸ Wunanu muwulire amakhulutu kolukado lwomuwaanyi: ¹⁹ Omutu yeesi nawulira emboosi yidira khu wenengo wo mukulu manu kakhaya okhumanya amakhulutu kalwo, sitani kecha kamunyula esyali syatakiwa khu mwoyo kwaye. Yino nje emwo yakwa khungira. ²⁰ Ola owawukula emwo yakwa khu lwanda, oyo nje owulira emboosi ya Weere manu kayifukirira mangu nesangalo. ²¹ Khulwokhuwuma emisi, aguma khu lwendaalo ntono. Ne owudinyu ni wicha oba okhusandisiwa khu lwemboosi, akowola enyuma wangu. ²² Ola owafuna emwo yakwa mu mawa oyo nje omusaacha owulira embosi ya Weere, ne khulwokhwelarikhirira okhwowulamu wesyaalo nende owekombi nowubacha we byowuyiinda yikhudenganiya, yakira embosi eyo yakhaya okhwama ebyamo. ²³ Ne ola owukula emboosi nga emwo yakwa khu loba layi, oyo nje owulira embosi ya Weere, khandi kamanya amakhulutu kayo, manu kamala kama ebyamo, manu kafuna emiya ndala, echindi nkaaga echindi asatu okhubita amakhabi khu bi kataaka.

Olukaado Lwe Baye

²⁴ Yesu khandi kecha kabakaadira olukaado lundi ati: Owenengo wo mukulu wufananyirisiwa khu mutu wundi owawaanya emwo endayi mu ndalo yaye. ²⁵ Ne abatu nibali nibakona, omusiku waye kecha kawaanya ebaye mu ηηano eyo, namala kewerawo. ²⁶ Ne eηηano niyamala yola okhusaamula, ebaye lyosi lyecha lya wonekha. ²⁷ Manu abakhosi bo mwene ndalo becha bawoola baati, “Mukhongo wefwe, siwataka emwo ndayi mu ndalo yawo? Ne ebaye lyatula ena?’

²⁸ Kabawola ati, “‘Omusiku nje owakhola atyo. Abakhosi baye bamuteeba baati, manu odakha khuche khu yikhulemo?’

²⁹ Ne kabakowolamo ati, “‘Khaba bbe,’ khulwokhuba nimunabe nimukhulamo ebaye eryo, eηηano yosi yicha okhwekhuliramo. ³⁰ Mulekhe byosi bikhulire alala okhwola mukesa. Mu bikha ebyo ndiwolera abakesi nti: musokhe muwuse alala ebaye manu muliwowe alala ebinywa lisambiwe; ne muwuuse eηηano mu yiwunge mu syaki syange.’”

Olukaado Lw’omuyofu N’amamera

³¹ Yesu khandi kecha kabakadira olukaado lundi ati: Owenengo wo mukulu wufwana nende olumwo lwo muyofu, lumutu kawukula kataaka mu ndalo yaye. ³² Alwakhaba ni nje olukhiramo owutono mu mwo choosi, ne nilumala lwakhula, lukaliya lwakhira emisala choosi owukhongo mu ndalo, lwekhola omusaala, namayoni khu kecha kombakha ebiswi mu masaga kakwo.

³³ Kabawolera olukaado lundi ati: Owenengo wo mukulu wufaana na mamera omukhasi ka kawukula kaduba mu bideru bikhongo ebyowusye, amamera kecha kamala kabisimbulukusa byosi byoosi byechula.

³⁴ Embosi echo chosi choosi Yesu kachiwolera ebidiikha byabatu mu ngaado; ne awatali lukaado awuma mbosi yikabawoleranga. ³⁵ Kadakha syolerere nabbi sikawoola ati: Ndyasama omunwa kwange mu ngaado, nakhalete emboosi chakisiwa okhutula khu khulongwa khwesyaalo.

Amakhulutu Kolukaado Olwebaye.

³⁶ Kecha kalekha esidiikha kengira mu nyumba. Abeeki baye bacha yali bawoola baati, Tuwolere amakhulutu olukado lwebaye eryali mu ndalo ye’ηηano.”

³⁷ Kakowolamu nawola ati, “Owataka emwo ndayi nje Omwana w’omutu. ³⁸ Endalo nj’esyalo, emwo ndayi nje abaana bo’wene’ngo. Ne ebaye nje abaana bo’musiku, ³⁹ Omusiku wayitaka nje sitani. Ekesa nje ekhomerero ye’syaalo, ne abakesa nje ba Malayika. ⁴⁰ “Kale nga lubakhula bakhuηηaniya ebaye balisamba n’omuliro, sityo nje lusiriba khu njakamo ye’ndaalo. ⁴¹ Omwana w’omutu alituma ba malayika baye, nabo balitusa mu wene’ngo waye ebitu byoosi ebibi ebikhingakira nende ebikira abaatu ni bakhola ebibi. ⁴² Balibasukuna mu muliro kutasima, eyo nje yibalirira ni beluma luma ameeno. ⁴³ Ne abalorefu becha okhumekhamekhana ngeryuba mu wenengo wa saawe. Oyo oli namatwi, akhoya awulire.

Engaado Chidiira Khu Wunyali Owekisa Nebyebbeyi

⁴⁴ Owenengo wo mukulu wufwana nende owunyali owekisa mu ndalo. Omutu naweduyakho, asokha kawukisa mberi, khulwesangalo lyaba nalyo eringi akowolayo kacha kakusa nawuli syali nasyo manu kamala kecha kakula endalo eyo.

⁴⁵ Ne, Khandi owenengo womukulu wufwana nende omusuwusi okonya amakina kowukusi wukali. ⁴⁶ Manu ni kakaana ekina lyebeyi, kakowolayo kacha kakusa ebiitu byaye byosi byosi byali nabyo manu kacha kakula ekina eryo.

Olukaado OLudira Khu Lwero

⁴⁷ Khandi, owenengo womukulu wufwana nende olwero omutu lwawukula kesa mu Nyanja kaddira eηηeni echebikha bingi. ⁴⁸ Nilwechula, abanaabi balukhwesa baluleta khulukerekha. Becha bekhala asi manu bachaka okhukawulamo enηηeni endayi bachita mu sikalala n’embi bachisukuna. ⁴⁹ Siityo nje lusiriba khu ndaalo chenjakamo. Ba malayika baliicha bakawulamo abatu babi babatusa mu bolerefu. ⁵⁰ Khu bamale babasukune mu muliro okutasima, eyiriba okhulira nokhusya ameeno.

⁵¹ Yesu kateeba abatu ati, Manu mutegeye amakhulutu kebitu bino byosi byosi? Bamukowolamu baati, Yee.

⁵² Kamala kabawolera ati, Nje esikira omwekesa wamalako yesi owamala okhwekeswa ebiddira khu owenengo womukulu afwanana nende omwene nyumba yaye otusamo owuyiinda wuyakha nowukhale.

Nabbi Otasi Noluyaali.

⁵³ Manu Yesu nikamala okhukada engaado chino chosi choosi, katulawo. ⁵⁴ Kakowola mu siko sye wawe syene, kachaka okhubekesanga mu mikhuηano chaawe, ni abo bosi boosi abawulira enjekesa yaye bawuka lukali. Bateba baati, “naye ono kafuna ena amakesi kano nende amaani akokhukhola ebyamangalima bino?” ⁵⁵ Ono sinje omwana w’omubaachi? Nende ηηina sinje Malyamu, khandi bamwanaηηina sinibo Yakobo, Yusufu, Simoni nende Yuda? ⁵⁶ Nende bambochoηηene boosi sikhuli nabo ano? Ne bino byosi kabitusa yena?”

⁵⁷ Manu becha bamukhayira erala. Ne Yesu kabakowolamo ati, Nabbi syakhaywanga luyaali okhutusakho mu syaalo syewawe nende mu nyumba yaawe. ⁵⁸ Manu sikakholayo ebyamangalima bingi hulwokhutafukirira khwawe.