¹ Mukhumalirikha khweisabato, nibushietsanga inyanga yamberi yelijuma, Maria Magadaline nende, Maria undi betsa khushirindwa. ² Ne lole, khwali nokhurenga okhukhongo khweshialo, okhuba Malaika wa Nyasaye yekha okhurla Mwikulu, nakongomia lichina okhurula khumuliango, niyekhalakhwo. ³ Omufwano kwe kwali shinga olweni, tsingubo tsie shinga ibarafu. ⁴ Oburii nibutira abalindi mana nibatechera muno, bafwana shinga abandu abafu.

⁵ Naye Malaika naboolera abakhasi yabo mbu, mularia ta, okhuba emanyire mbu, mukhabanga Yesu, owabambwa. ⁶ Shali hano ta, alamushe, shinga olwa yaboola, yitse mulole wayakona.

⁷ Mana mutsie lwangu muboolire abechibe mbu, alamushe okhurula mubafu, ne lole atsia imberi wenyu eGalilaya, ebweneyo mulamulola, lole, embaboolere.

⁸ Mana nibarula lwangu hashirindwa noburi nende obusangafu obunji. Niberukha bwangu nibaira likhuwa khubechi. ⁹ Ne olwa batsia okhubiira abechi, lole Yesu yabakanira naboola mbu,"mulembe,"nibatsia ahambi nibamutira khubirenje nibamwinamira. ¹⁰ Mana Yesu nababoolera, "mularie ta, tsie muboolere abashienywe mbu, batsie eGalilaya, ebweneyo niyo ewa balandolera."

¹¹ Ne olwa bali nibatsitsanga, abandi khubalindi yabo niboola mwitokho nibababoolera abakhulundu babakuhani amakhuwa kali nikekholeshe. ¹² Ne olunyuma lwokhwikhung'asia nende abakhulundu, bamala nibaheresia abalindi amang'ondo amanji. ¹³ Nibaba boolera, muboole mbu, abechibe betsere eshiro nikhukonanga nibamwiba. ¹⁴ Ne olwa kolera Omuruchi, kalamukhola asubire mbu, nindio kali. ¹⁵ Kho bamala babukula amang'ondo, nibakhola shinga olwa babirwa. Likhuwa lino liasalaana muno mubaYaudi, khandi lishibolungwa okhula lero.

¹⁶ Kho abechi ekhumi nende mulala nibatsia khushikulu shia Galilaya ewa Yesu yali nababoolere. ¹⁷ Ne olwa bamulola, bamwinamira. Nabo abandi nibala subira ta. ¹⁸ Yesu naboola ninabo mbu "obunyali bwosi Mwikulu nende Mushibala eheresibwe. ¹⁹ Kho bulano tsie mwechesie amahanga kosi, mukabatisie mulira lia Papa, lio Mwana nende lia Roho mulafu AMINA. ²⁰ Bechesie kosi akandabalachirisia, ne lole ndalaba ninenyu okhula khunduukho yeshialo.