¹ Mana Yesu narula muhekalu natsia erwanyi, abechi nabo nibetsa ewayali okhumumanyia emumbakho chie Ihekalu. ² Mana Yesu nababoolera, "Inywe shimulutsi ebindu bino biosi? Emuboolera toto mbu, Lichina shiliritong'a khulindi kata elala elilasukunwa hasi ta."

³ Ne olwa yali niyekhale khushikulu shiemizeituni, abechi nibetsa mebiswi, nibareba mbu, okhuboolerekhwo amakhuwa yako kalikholekha lina? khandi neshilolero shina eshilimanyisia okhwitsakhwo nende eshiesi shieshialo shino?

⁴ Naye Yesu nakalusia naboola mbu,"mwirecheshe, Omundu Yesu aleshe okhubakatia. ⁵ Okhuba abanji bakhetse Mulira lianje, nibaboola mbu, nisie Kristo, nibabakosia abanji. ⁶ Ne mulaulira kobusolo nende amahe, mulenje muleshe okhuhenda, okhuba amakhuwa kano kosi kakhoyere okhubira, nebutswa indukho ishiri okhula. ⁷ Okhuba Lihanga Lila bushira Lihanga Lindi, khandi oburuchi khuburuchi bundi, khandi Inzala nende okhurenga khweshialo bilabaho eyi nende eyi. ⁸ Ne yako kosi nokhuchaka butswa khweinumwa.

⁹ Mana balamusakania khandi nibamwira, Ne mulakiywa mumahanga kosi khulwa Elira lianje. ¹⁰ Mana abanji balesichirala nibakhobana abene khubene nende okhukiyana, ¹¹ khandi abalakusi bobubeyi balabukha nibashiamia abanji. ¹² Ne khulwa okhumetekha khwobumayanu, obuheri bwabanji bwakhanyire. ¹³ Nebutswa Oyo owifira okhula khushiesi, Omwenoya alahonibwa. ¹⁴ Ne oburume buno obulayi bulerwatswa mushialo shiosi, kho mana eshiesi shule.

¹⁵ Kho olwa mulola eshisinyo shiobwononeshi, owa Daniel omulakusi yaboolakhwo nasinjire habundu hatsienukhu, (ousoma ayiririsie obulayi) ¹⁶ mana leshi abali ebuYaudi berushire mushikulu, ¹⁷ naye ouba nali hekulu, khushilama shieinzu, aleshe okhwikha mbu, ainie shiosi eshiba nishiri munzuye ta. ¹⁸ kata ouba nali mushikuri, alakalukha Ingo okhubukula ingubo ta. ¹⁹ Woowe, khuyabo abaliba nibali nabana, nende khubaliba nibabereshe mutsinyanga yitso. ²⁰ Nebutswa musayenje mbu, okhwirukha khhwenywe khulaba murootso, kata khusabato ta, ²¹ okhuba habwenaho kalabaho amasira amakali, akashiri okhubaho kata okhurula okhuchaka khweshialo okhula bulano tawe, kata shikalibakhwoho ta. ²² Mana tsinyanga etso tsilabula okhututuibwa, shikhwakhabere nende kata mulala owakhahonire ta, Ne butswa khulwa abalobole, tsinyanga yitso tsilembichitibwa.

²³ kho, Omundu Yesi naba nababoolera mbu, lole Yesu Kristo ali hano, nomba alia, mulamuulira ta. ²⁴ Okhuba balibukha abakristo bobubeyi, nende abalakusi bobubeyi, nibalolesia ebilolero ebikhongo nende amangalimwa khulwa okhukosia kata abalobole nikaba nikanyalikha. ²⁵ Lole emuboolere khale. ²⁶ Kho nibaba nibamuboolera mbu, lole ali mushitsimi, mularula mwatsia tawe, noho lole yefisire mukari, mulasubira ta, ²⁷ okhuba shinga Olweni lurulanga ebukwe, nilulolekha okhula Mumbo, nolwa okhwitsa khwoMwana woMundu khuliba. ²⁸ Okhuba ewa omulambo kuli, newa Tsingosia tsikhung'aniranga.

²⁹ Habwenaho lunyuma lwamasira komutsinyanga tsiene etsio, Eliuba lilikwa eshirima, kata Omwesi shikuliakha ta, tsing'ining'ini natsio tsililakakha okhurula Mwikulu, ebiobunyali ebioMwikulu nibitechesibwa. ³⁰ Mana eshilolero shioMwana woMundu shilalolekha okhurula Mwikulu. Mana tsimbia tsiosi tsia bomushialo tsilikhuula, ne balilola Omwana woMundu niyetsa mumalesi koMwikulu nende Obunyali noluyali olunji. ³¹ Ne aliruma abamalaika nende omwoyo omukhogo kwoLwika, nabo balikhung'asia abalobole okhurula tsimbeka tsiosi tsine okhurula khundulo khwelikulu okhula eundi.

³² Kho bulano mweche khuluchero lwomusala kwoMukhuyu; mbu, olwa Lisaka lialwo libetsanga liakhakalukhana libisi, nilisebukha, habwene yaho mumanyanga mbu, tsinyanga tsiomubasu omunji tsiri ahambi. ³³ Nenyu mwesi olwa mulola amakhuwa kano kosi, mumanye murio mbu, Ali ahambi kata hamuliango bwene. ³⁴ Emuboolera toto mbu, olwibulo luno shilulirulaho ta, okhula olwa kano kosi kaliba nikamalire okhuusibwa. ³⁵ Likulu nende Eshialo bilarulaho, ne amakhuwa kanje shikalarulaho ta.

³⁶ Ne inyanga kata ebise abulaho omundu yesi oumanyire ta, kata abamalaika boMwikulu, habula Papa wanje yenyene. ³⁷ Nebutswa shinga lwakali mutsinyanga tsia Nuwa, nendio okhwitsa khwoMwana woMundu khuliba khurio. ³⁸ Okhuba shinga olwa tsiali tsinyanga tsiomuyembo, Bali nibalitsanga nokhunywa, bateshia nende okhuteshibwa, nokhulekhana, okhula olwa Nuwa yenjira Musafina. ³⁹ Nibalamanya ta, okhula olwa omuyembo kwabakholomosia bosi, nilwo olwa okhwitsa khwoMwana woMundu khuliba khurio. ⁴⁰ Babiri baliba mushikuri, mulala alibukulwa oundi aliton'ga. ⁴¹ Babiri balibetsanga Muluchina, oundi alibukulwa oundi alitong'a. ⁴² kho mubetsenje meso shichira shimumanyire neinyangashi eya Omwami wenywe anyala okhwitsirakhwo ta. ⁴³ Ne mumanye kano mbu, Omusatsa omulayi weinzu niyakhamanyire eshise shiomwifi okhwitsiramwo, yakhabere meso mbu, Inzuye ileshe okhufunakwa ta. ⁴⁴ Mana nenyu mwesi murio, okhuba khusa eya mulaparakhwo ta, Omwana woMundu aletsa.

⁴⁵ kho yakhabawina omukhalabani omwisikwa, omuchesi owa Omwami yamwemeshe Munzu hekulu khubakholibe mbu, abakabirenje ebiokhulia khushise eshikhoyere? ⁴⁶ Noweikhabi Oyo omukhalabani olwa Omwamiwe aletsa nanyola nakholanga ario. ⁴⁷ Emubolera Toto, mbu alimwemekha hekulu khubindubie ebilayi biosi ⁴⁸ Nebutswa omukhalabani omubii Oyo Naba naboola mumwoyokwe mbu, Omwami wanje ashindire okhwitsa, ⁴⁹ mana nachaka okhulpa abasumba bashie, nalia nanywa halala nende abamesi, ⁵⁰ Omwami womukhalabani Oyo aletsa khunyanga eya alamanyakhwo ta, khandi khusa eya alamanya ta. ⁵¹ namukhalaka hakari ebitonye bibiri namukabira halala nende abekati, yaho khuliba nende okhwikhuula nokhusia ameno.