¹ Ne 0lwa bola ahambi neshikulu shiemizeituni shia Bethifage, Yesu yaruma abechi babiri, ² nababoolera, ranjirire imberi mushitonye shiri ahambi, mulanyola Isishiri nomwna waiyo naboirwe, mubolole mana munderere. ³ Ne omundu yesu namureba, muboolere mbu, Omwami, achienya, Naye alabaheresia.

⁴ Ne kano kosi kekholekha mbu, katusie akalakulwa nende abalakusi, nibaboola, ⁵ muboolere omukhana wa Sayuni, Lola Omwamiwo yetsanga mubwitutuyi, niyekhale khu mwana weisishiri.

⁶ Nabo abechi nibatsia nibakholaa shinga olwa Yesu yababoolera. ⁷ Nibarera Isishiri nende omwana wayo, nibarakhwo tsingubo tsiabwe nibamwikhasiakhwo. ⁸ ne omukanda omukhongo nikwala tsingubo tsiabwe khunjira, abandi nibarema amasaka kemisala nibala khunjira. ⁹ Ne omukanda kwaranjirira nende okwamulondakhwo, bayochera nibaboola mbu, Hossana khuMwana wa Daudi, niweikhabi owitsa mulira lioMwami, Hossana ikulu.

¹⁰ Ne olwa yola muYerusalemi, litokho liosi liauka niliboola mbu, Uno niwina?

¹¹ Nakwo omukanda nikukalusia mbu, uno ni Yesu Omulakusi wa Galilaya.

¹² Naye Yesu niyenjirra muhekalu, nabalonda bosi abalii nibakusinjia, nibakula muhekalu. nashukhasia tsimesa nakwisia ebifumbi bia bakhala bamang'ondo nende amausi. ¹³ Nababolera mbu, kahandikwa mbu, Inzu ya Papa wanje neinzu ya masayo, nenyu muchikholire habundu wabefi!

¹⁴ Nabo ababofu nende abalema nibetsa muhekalu naye nabahonia.

¹⁵ Ne olwa abakuhani abakhongo nende abahandichi balola akokhuchenyia kayakhola, nabo Abana nibayocheranga Muhekalu mbu, Hosana khuMwana waDaudi, basinyisibwa muno.

¹⁶ Nabo nibamuboolera, oulira ka bano baboolanga? Naye Yesu nababoolera,"enywe shimwasoma mbu, okhurula muminwa chiabana nende tsindana baletsomia?"

¹⁷ Narulayo, natsia mwitokho lia Betheni nakonayo.

¹⁸ Ne hamukamba olwa yakalukha mwitokho, yaulira inzala, ¹⁹ ne olwa yalola omukhuyu, yasita ahambi nalanyolakhwo eshindu ta. Habula amasafu konyene. nakuboolera, eshiamo shiosi shilamakhwo khwiwe ta inziayo, nako nikuniala.

²⁰ Ne olwa abechi balola, bauka mbu, lolakhwo shinga kunialire lwangu.

²¹ Yesu nabakalusia nabasunjira,"Toto mwene ebaboolera mbu, nimuba nobusubiri, mulakanakania ta, shimulakhola kano kekholire khumukhuyu ta, ne mbu, kata nimubira eshikulu mbu, rula otsie osukunwe Munyanza, kalaba kario. ²² Nako kosi kamulasaba musaya, nimusubire, mulanyola.

²³ Ne olwa yali niyenjire muhekalu, abakuhani abakhongo halala nende abakhulundu, bamwitsira niyechesinjia nibaboola, nibunyali shina bwokholiranga amakhuwa kano? Ne niwina wakhuheresia obunyali?

²⁴ Naye Yesu nakalusia nababoolera mbu, "siesi ebareba lirebo ne mungalusia, siesi ndalabakalusia mbu, nobunyali shinga bwekholiranga amakhuwa kano. ²⁵ Obubatisi bwaYohana bwarula hena? Mwikulu nomba khubandu? Nabo nibapara abene, nikhuboola mbu, Mwikulu, alakhureba, mbushina mulasubira? ²⁶ khandi nikhuboola mbu, khubandu, abandu balakhaya, shichira abandu boosi basubira mbu, Yohana yali Omulakusia. ²⁷ Nabo nibakalusia Yesu mbu, shikhumanyire ta, Naye nababoolera, "siesi shembaboolera akobunyali bwekholeranga ebindu bino ta.

²⁸ Ne mupara murie? omundu yali nabana babiri, nabira Omwana wa mberi tsia lero mumukunda

²⁹ Nakalusia naboola, shenzia ta. ne olunyuma khubise bitutu yekalukhasia amaparo natsia.

³⁰ Nabira owakhabiri endio, naboola enzia omwami, ne nalatsia ta. ³¹ Noulena khubabilri yabo owakhola elienya lia Samwana?" Nibamukalusia, owamberi. Yesu nabakalusia, "Toto mwene ebaboolera mbu, abakholi betsimbi nabaheyi baliranjirira mubwami bwoMwikulu. ³² Okhuba Yohana yetsa mubwatoto, nenyu shimwamusubira ta, habula abonooni nende abaheyi bamusubilira, nenyu olunyuma lwokhulola, shimwekalukhasia mwasubira ta.

³³ Wulire oluchero lundi, khwali nende Omulima owaraka omukundakwe emitsabibu, nakusiririra olukaka kwosi, naramwo oluchina lwei divai, niyombokha omunara, nakuhana mumakhono kabalindi, naye natsia mushibala shiehale. ³⁴ Tsinyanga tsielichesa yaruma abasumbabe khubalindi mbu, anyolekhwo ebiamo. ³⁵ Nabo abalindi nibabukula abasumbabe, bakhupa mulala, nibera oundi, nibalasa oundi machina, ³⁶ khandi naruma abandi abobunyali okhushira, yabo, nibabakhola khandi bario. ³⁷ Mukhumalirikha naruma Omwanawe, naboola mbu, balaria kho Omwana wanje.

³⁸ Ne olwa abalindi balola Omwanawe, nibaboola mbu, uno niye mwene Obulame lekha khumwire mbu, khubukule omubulamebwe. ³⁹ Nibamutira nibamusukuna erwanyiwo mukunda, nibamwira. ⁴⁰ Olwa Omwami womukunda olwa yetsa, alabakholira shina?"

⁴¹ Nabamukalusia, alabononia bosi abo ababi, ne alaheresia omukunda abalindi bandi abalamuheresia ebiamo mubise.

⁴² Naye Yesu nababoolera mbu, "shimwasoma mumahandiko mbu, Lichina liomumbashi yaloba, likho! ire Lichina liomusee, buno nobukholi bwoMwami, nabwo buuchenyie mumoni tsiefwe.

⁴³ kho ebaboolera mbu, Obwami bularusibwa khwinywe, nibuheresibwa lihanga libula ebiamo. ⁴⁴ Naye Yesi owisichirasia khwichina lino, alafunikha. Naye owalikwira, alasiebwa shinga obusie."

⁴⁵ Nabo abakuhani abakhongo nabafarisayo bauka kano, bamanya mbu, abaloonga khubo. ⁴⁶ Ne olwabekomba okhumutira, baria omukanda shichaira bamubukula shinga Omulakusi.