¹ Naye Yesu olwa yali niyakhamala okhuboola kano, yarula Galilaya, niyetsa mumabanda kaYuda injerekha wa Yorodani, ² nakwo omukanda omukhongo nikumulondakwo, naye nabahonia bosi.

³ Nabo abaafarisayo bosi nibetsa nibamutema, nibaboola, nobulayi omusatsa okhulekhana nende omukhasiwe?

⁴ Naye nakalusia naboola,"Musa yamulaka arie mumaandiko? Ulia owabalonga okhurula mukhuchaka, yalonga omukhasi nomusatsa. ⁵ Naye naboola, khulwesho omusatsa alalekha Samwana nende Nyina, natirana nende omukhasiwe, ne babiri balaba omubiri mulala. ⁶ kho bulano shibali babiri ta, habula mulala, kho kario eshiaNyasaye elimasiye, omundu yesi shalakabukhasia ta."

⁷ Niba nimureba, mbushina Musa yalaka okhumuhandichira ibarua yokhulekhana?

⁸ Naye nabakalusia, "Musa yaboola ario khulwa obutinyu bwemioyo chienywe, yabaheresia obulakhule okhumulekha omukhasiwo, ne mukhuchaka shikali kario ta. ⁹ Nasi ebaboolera, yesi oulonda omukhasiwe, bulali khulwobuheyi ta, naye nateshia oundi, akhola obuheyi, naye outeshia ulia owalondwa, akhola obuheyi".

¹⁰ Nabo abechibe nibaboola, nikaba nikali kario, shibuli obulayi okhuteshia ta.

¹¹ Naye nababoolera, abandu shibanyala okhwinjisia kano ta, halali balia bonyene abaheresibwa ikhabi. ¹² Okhuba khuli nende ebitsiri biakholwa birio okhurula munda mwaNyina, ne khuli nende ebitsiri ebiakholwa nabandu, khandi khuli nende biekhola ebiene ebitsiri, khulwa oBwami bwoMwikulu, ounyala okhwinjisia yako lekha yenjisie.

¹³ Nibamurerera abaana abatiti, mbu, abarekhwo emikhono, nabo abechi niababalonda. ¹⁴ Naye Yesu nabahalabira,"muleshe abana abatiti betse khumubiri kwanje, okhuba obwami bwaNyasaye buli khubafwana. bario ¹⁵ Naye nabarakhwo emikhono, mana narulayo.

¹⁶ Ne lole, mulala yetsa namuboolera, omwechesia omulayi, ekhole shina mbu, enyole obulamu bwobumeri?

¹⁷ Naye nakalusia, "mbushina nimunanga omulayi, khuli nende mulala ouli omulayi, naye ni Nyasaye yenyene, noba niwenya okhunyola obulamu, linda amalako.

¹⁸ Naye namureba, akalena? Naye Yesu namukalusia,"sholera ta, sholaheya ta, sholeba ta, sholarusia obuloli bwobubeyi ta. ¹⁹ Ria So nende Mao, nawe olamenya tsinyanga tsinyinji."

²⁰ Naye omubukha namukalusia, amakhuwa kano kosi ndalinda okhurula mububukha bwanje, enemanga shina?

²¹ Naye Yesu namukalusia, "tsia okusie, biosi bia oli ninabio, okabire abatakha, nawe olaba nelibishiro Mwikulu, mana witse unondekhwo." ²² Naye olwa omubukha yaulira ario, yarula natsia nasinyishe muno, okhuba yali omuyinda po.

²³ Naye Yesu nababira abechibe," toto mwene ebaboolera, nobutinyu omuyinda okhwinjira mubwami bwoMwikulu, ²⁴ ne khandi ebaboolera, nobwangu Ingamia okhwinjira mumuluu kweisindani okhushira omundu omuyinda okhwinjira mubwami bwaNyasaye.

²⁵ Ne olwa abechibe baulira, bahuchisibwa, nibaboola, Kho wina ounyala okhuhonibwa?

²⁶ Naye Yesu nabahenga, naboola,

²⁷ "khubandu amakhuwa kano shikanyalikha ta, ne khu Nyasaye, ebindu biosi binyalikha."

²⁸ Naye Yesu nababoolera, "toto mwene ebaboolera, enywe abanondakhwo, olwa Omwana womundu alikhala khuBuruchi, bwobukhongobwe, mulikhala khubifumbi ekhumi nende bibiri muyasinjia nzinzu ekhumi natsibiri tsia Israeli. ²⁹ Yesi ouleshere inzuye, abanababwe abakhana nabasiani, papa nende mama, omukhasi nende omusatsa, abana nende emikunda, khulwe lira lianje, alanyola mulwibulo luno obulame khandi emia, ne olunyuma obulamu bweinziayo.

³⁰ Nabo abanji abali imberi baliba beinyuma, nabo beinyuma baliba beimberi.