¹ Abafarisayo halala nende Amasadukayo, bamwitsira nibamutema mbu, anyale okhukhola eshilolero okhurula Mwikulu.

² Naye nabakalusia nababoolera, hamukoloba muboolanga mbu, "eshibala shilaba obulayi shichira Likulu liakhanye. ³ Nibwakhashia mumabwibwi muboola mbu, imbumbuyeka yitsa okhubaho shichira Likulu liakhanye, Inywe abekati, mumanyire okhwaukhasia obukondo bweLikulu, ne shimunyala okhwaukhasia ebilolero bietsinyanga tsiobumalirishi ta. ⁴ Olwibulo olubii lwobuheyi lukhaba ebilolero, ne shilula heresibwa eshilolero shiosi ta, habula eshilolero shia Yona, nabalekha, natsia.

⁵ Ne olwa abechibe betsa injerekha, bebilira okhuchinga emikate. ⁶ Naye Yesu nababoolera, mwihenjeresie khulwa amamera kabaFarisayo nende aBasadukayo.

⁷ Nabo bali nibarebanenge abene khu bene, shikhuchinjire emikate ta.

⁸ Naye Yesu olwa yamanyirisia amaparo kabwe, nababoolera, "enywe abobusubiri obutiti, mbushina nimuboolanga mwenyene mbu, shimuchinjire emikate?" ⁹ Shimumanyire, kata shimwitsuliranga emikate chirano khubandu efikhumira firano, nende ebimwero shinga olwa mwakhung'asia? ¹⁰ Kata emikate musafu khubandu efikhumira bine, nende ebimwero shinga mwakhung'asia? ¹¹ Mbushina mulamanyirisia mbu, shemboolanga khumikate ta, ne mbu, mwihenjeresie khumamera kabaFarisayo nende aBasadukayo? ¹² Mana nibamanyirisia mbu, shiyaboolanga khumamera kemikate ta, ne mbu, khumechesio kabaFarisayo nende amasadukayo.

¹³ Ne olwa yesu yola mumbali tsia Kaisaria Filipi, yareba abechibe mbu, "abandu baboolanga mbu, nisie wina?"

¹⁴ Nabo nibakalusia, abandi, baboolanga mbu, Yohana omubatisi, abandi mbu, Eliya, khandi abandi mbu, Yeremia, noho mulala khubalakusi.

¹⁵ Naye nabareba, nenyu muboolanga mbu, nisie wina?

¹⁶ Naye Simioni Petero nakalusia mbu, niwe kristo Omwana wa Nyasaye umenyanga.

¹⁷ Mana Yesu nakalusia namuboolera, oli oweikhabi Simioni Omwana wa Yonah, shichira shiiri inyama namabanga bikhufunulire kano ta, habula Papa wanje ouli Mwikulu, ¹⁸ Nasi ekhuboolera mbu,"niwe Petero, ne khulwanda luno, ndalombakha Ikanisa yanje, ne amani kemakombe shikalalishira ta. ¹⁹ Nasi ndalakhuheresia tsifungwo tsioburuchi bwoMwikulu, Nashio shiosi eshia olaboha Mushialo, shilabohwa Mwikulu, Nasho shiosi eshia olabolola Mushialo, shilabohololwa Mwikulu." ²⁰ Mana nalachirisia abechibe mbu, shibalabolerakhwo omundu ta.

²¹ Okhurula inyanga iyo, Yesu yachaka okhumanyia abechibe shinga olwa khatimba atsie Yerusalemi mana aburire muminyakhano eminji khubakofu nende abakuhani abakhongo, nende abahandichi, mana yerwe, olunyuma alamushe, khunyanga yakhataru. ²² Naye Petero namusutia halubeka namuhalabira, namuboolera, yako shikanyalikha khwiwe ta, shiketsa okhwikholekha khwiwe ta.

²³ Naye namushukhanira Petero namuhalabira,"tsia inyuma wanje Setani. oli eshisichirasio khwisie, okhuba shiwenyanga ebindu biri ebiaNyasye ta, habula ebia Abandu.

²⁴ Mana Yesu naboolera abechibe mbu, omundu yesi niyenya okhunondakhwo, khatimba yekane omwene, abukule omusalabakwe mana yanondekhwo. ²⁵ Okhuba yesi ouhonia obulamu bwe, alabukosia. naye yesi oukosia obulamubwe khulwa isie, alabuhonokosia. ²⁶ Okhuba nobukhala shina omundu okhunyola eshibala shiosi na akosie obulamubwe? nomba nishina eshia omundu anyala okhucherasia nende obulamubwe? ²⁷ Okhuba Omwana womundu alitsa muluyali lwaSamwana, nende abamalaikabe, naye alahana ebihanwa khubuli mundu okhurondokhana nende emirimo chie. ²⁸ Toto mwene ebaboolera mbu, khuli nende abandi abasinjire hano abalibula okhufwa ta, okhula olwa balilola omwana womundu niyetsa muburuchibwe.