¹ Mana abahandichi na Bafarisayo okhurula Yerusalemi nibetsa khu Yesu nibaboola, ² mbushina abechibo nibafinaka amechesio kabakhulundu, shichira shibasabaanga amakhono kabwe nibenya okhulia ebiokhulia ta?

³ Naye Yesu nabakalusia nababoolera mbu, mbushina nenyu mukhayanga amalako kaNyasaye khulwa amechesio kenywe? ⁴ Okhuba Nyasaye yalachirisia mbu, heresia So nende Mao oluyali; ulia oufwola Samwana nomba Nyina, lekha afwe mafwa.

⁵ Nebutswa enywe muboolanga mbu, yesi yesi ouboolera Samwana nomba Nyinamwana mbu, obukhonyi bwosi bwamwanyola khwisie nobukhala khwisie. ⁶ Omundu Oyo shakhoyere okhuheresia Samwana oluyali ta, kario mukhola likhuwa liaNyasaye okhubula obunyali nimuchingula amechesio kenywe. ⁷ Inywe ababeyi, Isaya yalakula habwene naboola, ⁸ abandu bano bamberesinjia oluyali khuminwa, nibanzitsomia netsinimi tsiabwe, ne emioyo chiabwe chiri ehale ninasi. ⁹ Banzinamiranga nebutswa, bechesinjia amechesio kabwe akali butswa amalako kabandu.

¹⁰ Mana nalanga omukanda, nababoolera, wulire mana mumanye, ¹¹ Shishiri eshinjiraanga mumunwa eshikhola omundu omwononi ta, habula eshirula mumunwa nishio eshiomwononinjia omundu.

¹² Kho abechibe nibetsa nibamuboolera, omanyire mbu, abaFarisayo bauchire olwabaulire okhubolakhwo? ¹³ Yesu nakalusia naboola mbu, buli eshirache shia Papa woMwikulu alaraka ta, shiakhasulwe. ¹⁴ Baleshe babe, nabemirisi ababofu. Ne omubofu naba niyemirira omubofu washie, bosi balakwa mubuko.

¹⁵ Mana Petero nakalusia namuboolera, okhuboolere akoluchero luno.

¹⁶ Mana Yesu nakalusia, Khane kata mwesi mushilemire obumanyirisi? ¹⁷ Shimumanyire mbu eshindu shiosi eshinjira mumunwa shibira nishinjira munda nishirusibwa nishitsia erwanyi? ¹⁸ Ne akenako akarulanga mumunwa, kabetsanga nikarula mumwoyo, kano niko akamwononinjia omundu. ¹⁹ Shichira okhurula mumwoyo nimwa karulaanga amairirisio amabi, obwiri, obuheyi, nobusooti, nobwifi, nobuloli bwobubeyi, nokhwichinjimisia. ²⁰ Amakhuwa yako niko akamwononinjia omundu, nebutswa okhulia namakhono kalasaabirwe ta shikamwononia omundu ta.

²¹ Kho Yesu narula ebweneyo natsia Tiro nende Sidoni. ²² Ne lola Omukhasi omukanani yetsa okhurula mutsimbeka etsio, namulirira naboola mbera tsimbabasi Omwami Omwana wa Daudi. Omukhana wanje anyasibungwa muno nebishieno.

²³ Nebutswa shiyakalusia likhuwa ta, ne abechibe nibetsa, nibamusaya, q nibaboola mbu; murume atsie okhuba aliranga nakhulondakhwo inyuma wefwe.

²⁴ Naye nakalusia naboola mbu, "shindarumwa, halali khumakondi kakora keinzu ya Israeli."

²⁵ kho Omukhasi Oyo niyetsa namwinamira naboola Omwami ukhonye.

²⁶ Nebutswa nakalusia naboola, "shinobulayi okhubukula eshiokhulia shiabaana okhuheresia tsimbwa ta.

²⁷ Naye nakalusia naboola mbu, ni toto, Omwami, kata tsimbwa tsilitsanga obubungulusi oburula khutsimesa tsia abaami babwe.

²⁸ Mana Yesu nakalusia namuboolera," Mama, obusubiribwo nobukhongo, kekhole shinga wenya". Omukhanawe nahona okhurula eshise esho.

²⁹ Yesu narula ebweneyo niyoola khuNyanza yaGalilaya, natikulukha Khushikulu niyekhala hasi. ³⁰ Mana emikanda emikhongo nichimwitsira, nibalimwo nende abetsindieku, nababofu, nabasiru, nabalema nende abandi abanji, nibalisibwa hasi mubirenje bie, naye nabahonia. ³¹ A bomukanda bauka, olwa balola abasiru nibaboolanga, abalema nibahona, abetsindieku nibachendanga nababofu nibalola, nibamwitsomia Nyasaye wa Israeli.

³² Kho Yesu nalanga abechibe hambi, nababoolera, endi neshibera khulwo omukanda kuno, shichira bakhaba ninasi tsinyanga tsitaru ne, bashiri okhulia eshindu ta, shenyala okhubasebula nibali Inzala ta, banyala bakwa khunjira.

³³ Abechibe nibamuboolera, mushitsimi muno khwakhanyola hena emikate chehera okhubekusia omukanda omukhongo kuri? ³⁴ Yesu nabareba, nemikate chinga chiamuli ninachio? NibamubOolera, Musafu, nende orunyeni orulemu.

³⁵ Mana nalachiria abemikanda mbu, bekhale hasi mushikuri. ³⁶ Mana nabukula emikate musafu nende orunyeni, nakhupa orio, nabisonyola, nabakabira abechibe, nabo nibakabira emikanda. ³⁷ Mana nibalai boosi nibekura, nibatola ebisonye biatong'a ebikapu musafu nibitsule. ³⁸ Abandu balia bali nibahera ebikhumira bine abasatsa, nibalabalire abakhasi nende abana ta.

³⁹ Mana nasebula emikanda, nabukula Eliaro natsia Injerekha mushibala shia Magadani.