¹ Inyanga eyo, Yesu yarula munzu niyekhala khulukuku lweinyanza. ² Emikanda emikhongo chiakhung'ana ewa yali okhula niyenjira muliaro niyekhalamwo nabo bomukanda nibekhala khulukuku. ³ Nababolera amakhuwa amanji mutsinjero, naboola mbu, "omumitsi yarula natsia okhumitsa. ⁴ Olwa yali namitsanga, imwo yindi, yakwa khunjira, amayoni niketsa nikachibotsa, ⁵ eyindi niyikwa abandu wamachina, niyilaba neliloba lihera ta, niyimera bwangu, shichira liloba shiliatsia hasi ta. ⁶ Nolwa omubasu kwakha, niyifululukha, niyiniala, shichira yabula emisi. ⁷ Eyindi nikwa mumaua, amauwa nikakhula nikachifinya. ⁸ Eyindi nikwa mwiloba lilayi, niyama ebiamo, eyindi imia, eyindi amakhumi kasasaba, eyindi amakhumi kataru. ⁹ Ouli namarwi kokhuhulira, ahulire.

¹⁰ Abeechibe nibeetsa, nibamureeba mbu, eshichiranga nobaboolera mutsinjero nishina?

¹¹ Nakalusia nababoolera mbu "inywe mwahebwa okhumanya amabiso koBwami bwo Mwikulu nabo shibahebwa bario ta, ¹² shichira yesi oulikhwo ninabio alahebwa ebindi, abe ninabo ebinji, ne ouma kata ebia ali ninabio bilabukulwa. ¹³ Niko akachiranga nebaboolera mutsinjero, shichira, bahenganga ne shibalola ta, barecheresinjia ne shibaulira kata okhumanyirisia ta. ¹⁴ Ne obulakusi bwa Isaya butusibungwa obwaboola mbu, okhuulira balauliranga ne shibalamanyirisia ta, okhuhenga balalenga ne shibalola ta.

¹⁵ Okhuba emioyo chiabwe chiasitoha, ne amarwi kabwe shikanyala okhuulira tawe, ne tsimoni tsiabwe tsiatimba, balanyala okhulola khubise biosi netsimoni tsiabwe ta, mana nibaulira namarwi kabwe, nibamanyirisia mumioyo chiabwe betsa bakalukhasibwa mana bahona.

¹⁶ Habula netsieikhabi tsimoni tsienywe etsilolanga, nende amarwi kenywe kauliranga. ¹⁷ Toto mwene ebaboolera mbu,"abalakusi abanji nende abalunjishi abanji bekombanga ebindu bino ebia mulola, ne shibanyalirwa okhulola ebindu bino ebia muhulira, ne shibabilola ta.

¹⁸ Hulire oluchero lwo omumitsi, ¹⁹ olwa Omundu yesi aulira likhuwa lioBwami, ne shalimanyirisia ta, habwene yaho omusuku yetsa narusiaho likhuwa ero liamitswa mumwoyo kwe, uno niye oufwana shinga imwo yakwa khunjira. ²⁰ Nayo imwo yamitswakhulwanda niye ouliranga nalinjisia nobusangali obunji muno, ²¹ naye abulanga emisii, alinjisia khubise ebititi, ne olwa amatemo neminyakhano chirulira, khulwe likhuwa tsana, naye achonya mumwoyo. ²² Nayo imwo yamitswa mumaua, niye ouliranga likhuwa, ne amarunda keshialo shino, nende obubeyi bwobuinda bufinya likhuwa, naye nalanyala okhwibula ebiamo ta, ²³ nayo imwo yakwa mwiloba lilayi, niye ulia oulira likhuwa, nalimanyirisia, naye khandi yama ebiamo ebinji okhuula Imia, amakhumi kasasaba, nende amakhumi kataru.

²⁴ Nachera oluchero lundi khandi, naboola mbu, "Obwami bwoMwikulu bucherasibwa khu Mundu wamitsa mumukundakwe, ²⁵ ne olwa abandu bali nibakona, omusuku yetsa namitsamwo libanze hakari mungano naye natsiya ²⁶ ne olwa yamera mana niitsomkha kho libanze nalio nililolekha. ²⁷ kho abasumba bamwene inzu olwa betsa nibamuboolera, Omwami shiwamitsa imwo indayi mumukundakwo? ne libanze liino lirulile hena?

²⁸ naye nakalusia mbu," Omusuku nowakhola yako. Abasumba nibamureba mbu kho wenya khutsie khulisule?

²⁹ Naye nakana mbu," tawe shichira olwa muba nimwiya libanze, mwakhetsukhana nimwiyiramwo ingano halala ninalio. ³⁰ Leshe bikhule biosi halala, okhuula mwichesa, mana khundukho yelichesa ndakhabolere abokhuchesa mbu, ranjiriree mukhung'asie mberio libanze, muliboye tsing'anda musambe, ne Ingano muchikhung'asie muree mushiachi.

³¹ Nababoolera oluchero lundi, naboola mbu, Obwami bwoMwikulu bufwana shinga inyuma ndala yo lufwa lwe Lisatsi, lwomundu yabukula naraka mukundakwe, ³² Nayo toto neindutu khu bufwa bwoosi, neikhulire iyomba emisala chiosi chiomukunda nako amayoni. kekhala nikeikama mumasaka.

³³ Nababoolera oluchelo lundi mbu,"Obwami bwoMwikulu bufwana shinga amamela akoMukhasi yabukula nasasia mubimwero bitaru biobusie, okhula olwa bwosi bwafimba."

³⁴ kano koosi Yesu yaboolanga mutsinjero; nebutswa halali oluchero, shiyaboola eshindu ta. ³⁵ Mbu mana akaboolwa mumunwa kwomulakusi kosibwe mbu, "ndalaboola ninenyu mutsinjero, ndalarumbula amakhuwa akabiswa okhurula okhuchaka khweshialo."

³⁶ Mana Yesu yasebulana nabemikanda niyenjira munzu, abechibe nibetsa ewa yali nibaboola, mbu, okhwinosie eshifune shioluchero olwo, lwelibanze mumukunda.

³⁷ Naye nakalusia naboola mbu, "owamitsa imwo indayi, niye Omwana woMundu; ³⁸ omukunda nishio Eshialo shiosi, Imwo indayi nibo abaana boMwami, Libanze, nilio abana bobumayanu. ³⁹ Ne omusuku walimitsa, niye Setani, lichesa niyo Indukho yeShialo, nabo abachesa, nibo abamalaika. ⁴⁰ Kho shinga olwa Libanze lilikhung'asibwa nilisukunwa mumuliro, nolwa kaliba kario khundukho yeshialo shino. ⁴¹ Omwana woMundu alaruma abamalaika, nabo balakhung'asia okhurula mubwamibwe biosi ebisichirasia, nende yabo abakholanga kobumayanu. ⁴² Nibasukunwa mumuliro omululu; ebweneyo khulibayo okhulira, nokhulumasia ameno. ⁴³ Nabo abalunjishi, baliakha shinga Eluuba, muBwami bwa Sabwe, ouli namarwi kokhuulira aulire.

⁴⁴ Khandi Obwami bwoMwikulu bufwana shinga libikho liabiswa mumukunda, elia Omundu yanyola, mana nabisa, ne khulwa okhwikhoya, natsia nakusia biosi ebia yali ninabio nakula omukunda tsana.

⁴⁵ khandi Obwami bwoMwikulu bufwana shinga Omundu weinganga oukhabanga tsilulu tsindayi. ⁴⁶ Ne olwa yanyoola ilulu ndala, yakusia biosi biayali ninabio nachikula.

⁴⁷ khandi Obwami bwo Mwikulu bufwana shinga olukhanda lwafubwa muNyanza, nilukhung'asia tsimbia tsiosi. ⁴⁸ Ne olwa lwali nilwitsule, bakhwesa nibara khulukuku nibekhala nibakhung'asia tsindayi mubikapo, natsio tsimbi nibatsisukuna. ⁴⁹ Nolwa kaliba kario khundukho yeshialo shino mbu abamalaika balitsa okhwaukhasia abanji nende abalunjishi ⁵⁰ khandi. bakhasukunwe mumuliro omululu, ebweneyo khulibayo okhulira nokhulumasia ameno.

⁵¹ Yesu nababoolela, "muulire kano kosi?" nibamukalusia mbu, Ee! Omwami.

⁵² Olunyuma nababoolera mbu, niko akachira buli omuhandichi owechesibwe amakhuwa koBwami bwo Mwikulu afwana shinga Omundu omwene inzu ourusia mwibishiro lie ebindu ebiiyia nebikofu.

⁵³ Ne olwa Yesu yali namalire tsinjelo etsio, yarula natsia. ⁵⁴ Ne olwa yali niyolire mushialo shiabwe, yabechesia musinagogi yabwe, okhula nibauka nibaboola mbu, Omundu uno anyolanga hena obuchesi buno? nende ebikhole biamakana? ⁵⁵ Uno shali niye Omwana womubatsi Oyo? Nyinamwana shali niye Mariamu? abo abasiani babwe mbu, Yakobo, Yusufu, Simioni nende Yuda? ⁵⁶ kata abakhana babwe shikhubetsanga ninabo bosi? kho Omundu uno anyolanga hena kano koosi?

⁵⁷ Nibasinyisibwa ninaye, naye Yesu nababolera mbu, "Omulakusi shali noluyali Mushialo shiabwe, kata munzu yabwe ta. ⁵⁸ Naye shiyakholayo amakhuwa amakhongo ta, khulwa okhubula obusubili wabwe.