1
Ihuma riŋa hijio hotobiaŋa itai ehuma hirro innahatai inno olibo to hosiere ho hiyyo hijio anyar egonyu isia. Lehuma itai ania obe iso Monye hatai lia te ido oduma itai.
2
Lesio itai iluahiti to lociaŋak ibaŋa esio iyya tuŋani lo ohut ikakan hijio anyar egonyu inyia. Ehuma henyiabak iyya nia ta hajik ino imojiti ojio hidofe te ikota hijio anyar etihabuo hiyyo isia. Elimak naŋ itai hijio amoju isia hisiorita innohosie.
3
Ati lesio itai iluahiti, anyar esio itai ne eŋofo hijio hotobiaŋa hani ne ihorroŋ oyyen nyo nia ehuma hani inyiet, anyar itai esio hisiorita innahatai to hiŋofo
4
Atta iso Monye hatai lia lorriŋa hirro inne eŋofohini duma itai.
16 Ati lefer itai, hejiriŋa iyya henyiabak hullo ejiriŋa to homomite innohosie hijio anyar hiyyo oyyen hijio oferu isia. Dede, elimak naŋ ita hijio, owuon isia he hisiori nohosie. 17 Ati laferu itai, iyalak hossi innahatai ejio hidofe ellilla homomite innahatai. 18 Hijio anyar hiyyo obe oyyen hijio aferu itai, ati egonyu Monye hatai lobe oliew. Hidofe Monye lia egonyu rori hunna obe oliew, oduma iso itai.
19 Hettunak ibariti innahatai ta fau inna nyo esok iso hiyyu iko ohitido isia, kuyya ojiŋak iso hahalak ahahalari isia. 20 Ati itittunak ibariti innahatai te ido no obe iso hiyyu iko ohitido oremik hitihar isia ojo hidofe no obe hahalak oremik huwur atta ŋahahalari isia. 21 Nyo ta mai no owuanari ibariti innohoi, owuon iso taji nohoi dia.
22 Ara honyek iyya cialai no wan. Tonia, locialai inyia na anyar atta wan daŋ hifut iko cialai. 23 Ati lorrun honyek oriok iso wan daŋ, tonia kuyya lorru cialai, hobolo iso idumele iyya nyo.
24 Obe tuŋani oremik higiama te ettaha lohorik, nyo oliwari iso inyia lobotie atta hidofe mune lobotie, kuyya lawak iso inyia lobotie, anyar omiana inyia lobotie. Obe itai eremik higiama to Hollum iko te ibariti.
25 Tonia, elimak naŋ itai hijio, hehawua to manya nahatai, to hirro hunna edaha itai, hidofe hunna emata itai ara ta hido to rori hunna eciefita itai. Obe iso wuaran agalik daha? Ojio wati innahati obe agalik boŋojin? 26 Ituwolo cieŋ innia efiritato hide. Obe isia oyek ojio obe hidofe odieŋu, hidofe ottubak hirro te ibatiha, ati etidaha Monye hatai lia te ido isia. Obe itai egalik isia? 27 Ŋai lia tohiji hatai loremik hitibolo wan nohonyie to hihauwa nohonyie?
28 Nyo ehauwa itai to boŋojin? Itiwolo to turiana inno owuon ta mana, obe isia egiama, obe hidofe isia ecio. 29 Ati ajio naŋ ta hatai hijio, obe ifa boŋojin inno Solomone elahaman iyya turiana hunna, ati elahaman isia binno. 30 Kuyya leticiofo Hollum turiana hunna esur ta fau ena, ojio motie atta ebirori to hima, obe iso inyia eticiofok itai no olibo agalik, aai, itai hiyyo hullo odicio hiruk? 31 Tonia, ibaŋa ehauwa ejio hidofe egigilo hijio, ‘Hedaha iso mahu iyyohoi nyo?’ kuyya, ‘emata iso iyyohoi nyo?’ kuyya ‘Eciofok iyyohoi nyo?’ 32 Nyo osiaha paganohien rori hunna daŋ, ati oyyen Monye hohoi te ido hijio ewak itai hirro innia. 33 Ati isiahai to hosiere obie nohonye iko hitiyenita innohonye ojio iso hirro inne atta afonihini ta hatai. 34 Ati, ibaŋa ehauwa to rori hunna afanu motie, nyo motie afanu iso rori inak huna ewak itai. Oremik iruti inno holoŋ nobotie to holoŋ nia.