ŋati 14
1
Toholoŋ nafa nya, Erode etiru hiram no Yesu.
2
Atta inyia elimak to hegiamak illohonyie hijo,” Yoani Hebatisoni; ebuhu inya to ye. Iya nia egiama iduariti inia to honyie.”
3
Nyo eniefu ifa Erode Yoani, ata etifitak inya, ata itijiŋa to kijan, to hiram no oŋoruwo halasi honye Pillipo.
4
To hiro no Yoani te Erode hijo, “Oduwa to hoi hawuanari iko inyia oŋoruwo hoi”
5
Ejo Erode awak attohe Yoani, ati abaŋ ifa inyia hiyyo, nyo eruk ifa hiyyo hijo ara inyia hekilani.
6
To holoŋ nafa ehuhumari hiyo mune ta haŋ ho Erode holoŋ nafa esioni hiyo inya, acia ŋanini Erodia ata Erode mune bino,
7
to he tiraŋi, elima to hodwoti nia to hilifo hijo esio iso naya iye hiro daŋ ino ewak iye.
8
Atta hodwoti nia eno hifia hotonye honyie hijo, “Hawu iso naŋ hifia inyia hesiera nayya nyo? Atta hotonye hijo, “Tojo isiara nayya hoo no Yoani Hebatisoni to hiduti ina” Ata hodwoti nia hijo iyya ojo hotonye honyie.
9
Ejiriŋa habu lia, atta inyia baŋi hirro innafa elimu inyia ojo hodwoti iko hatamonok etira. Ejo inyia, isiara hirro innia awak inyia.
10
Atta inyia efahak lobo hegiamani lohonyie heno akijan hotoŋutuni hoo no Yoani.
11
Eyyani tuŋani lia hoo nia atta hisio to huduti no hiito nia, ojo hiito nia atta eyari to honye honyie.
12
Ojo hejufutak illo Yoani atta afanu akafari wan no Yoani onuhari. Tia ofuyye elimahini to Yesu.
13
Nafa etiru Yesu hirro innia, atta inyia etuhutu wan tara to togoli anabo mai hamai. Nafa etiru iluluŋ nia, atta atifori Yesu to bore gala amai nyia.
14
Nafa awoŋ Yesu ahosiere hosie egonyu inya iluluŋ nia edoŋ atta inya amehini to hosia, ata hitilibo haŋwak ino hosie.
15
Nafa era iŋalio, afanu hejufutak hijo to honyie, “Ara mai inna amur, ojo holoŋ eliaha aswori, itatturok iluluŋ nia hefie amisihi hosie anyar ofuo arrumu daha nohosie.”
16
Ati, ojo Yesu tohosie, “Hotobiaŋa isia ofuo adde. Isiara to hosie innak hirro hatadahai isia.”
17
Atta isia hijo to honyie hijo, “Ewuon iyyohoi iko imuniaha miet ojo ham ohorik.”
18
Ata Yesu hijo, “Iyani ta hanaŋ.”
19
Ojo Yesu atta etihunyik hiyyo ta fau to hide ho miyaŋ. Atta inya adumu imuniaha miyet iko ham ohorik, ata hibono ahide ido ata inya hijok ata hibubun imuniaha atta hisio to hejufutak hesiara to hiyo.
20
Adaha isia daŋ man oruma. Ati eduduhu heyiyanak ofitot inno imuniaha lur to gufat tomon harik.
21
Ara ifa iluluŋ no liawa hame alif miet, ojo ŋorwo iko durre.
22
Kokwak atta inyia etuhunyik hejufutak ilohonyie ahotwai ho togoli nafa owuon to otifor hahari, ojo inya ta wan nohonyie atta efuhak iluluŋ no hiyyo adde.
23
Ta halu no hetaturok no honye iluluŋ, atta inyia hire a doŋe inya hamai omojori. Ifa iŋalio odule inyia dia daŋ.
24
Ati eba ifa togoli to hiji ha hari nettok, nyo ohut ifa oyami bino ojo hidofe ebo hitiho nyo efiriwa ifa oyami bino.
25
Ifa era harie, atta Yesu awoŋ aŋati hosie, lolot to hide ho hifioŋ.
26
Nafa egonyu isia Yesu olot ho hide ho hifioŋ, atta hejufuta baŋi ata hijo, “jok nia,” oyio ifa isia ta baŋi.
27
Atti ero Yesu to hosie teyya hijo, “Itigolo! Nayya lia! Ibaŋa abaŋ.”
28
Etirraŋ Peturu to honyie hijo, “Habu, lara iye lia, ililoŋo naya hawoŋ to hoi to hide ho hifioŋ.”
29
Ojo Yesu, “Woŋ.” Ata Peturu alu to togoli ata eno to Yesu to hide ho hifioŋ.
30
Ati nafa ewolo Peturu oyyami, atta inyia baŋi; atta inya adiori ahotwai hari, atta inyia yio hijo, “Habu, itiluwahu naya.”
31
Ifa teya ata Yesu ehalamak hani no honyie, ata hinief Peturu, ata Yesu hijo, “Iye ille odicio hiruk, nyo ekuya iye?”
32
Ifa arrek Yesu iko Peturu a togoli, ojo oyyami atta aduehini.
33
Atta hejufutak ilafa etole to togoli hitihabuo Yesu hijo, “Era iyye dede Lonyi Hollum.”
34
Nafa ellaŋ isia tololo, atta isia allu to Genesaret.
35
Nafa aheru hiyo illo mai nya Yesu, atta isia efahak sayye to masik niyya ta mai to nyia, heyani haŋwak innohosie daŋ to Yesu.
36
Attana isia inyia hedek haŋwak inno hosie hototir ŋolon no boŋo nohonyie, iluluŋ no haŋuak illafa otir inyia olibe.