¹ Naye Yeso niyemirirwa nende Roho okhuchia musichiimi mbwe ateemwe nende sietani. ² Ne olwayali naongere nende okona injala chinyaanga nende ebiro makhumi kane yabulira injala. ³ Ne omurekekhi namwichira namuboolera ari, nikaba mbwe oli Omwana wa Nasaye, lagira mbwe amakina kano kekalukhanie omugaati. ⁴ Naye namukalusia naboola ari, kaandikwa mbwe, omuundu khasi achia khumenya khulwo mugaati kwong'ene, arali khulwa elikhuwa elirula mumunwa kwa Nasaye. ⁵ Ne sietani nabukula namuyira akulu mulidokho litakatifu namura akulu khusisuli esie ikhekalu. ⁶ Namala namuboolera ari, nikali mbwe oli omwana wa Nasaye, wesikune omwene asi: okhuba kaandikwa mbwe, anaruma abamalaika baye khwewe: ne mukhano kabwe banakhukinga akulu, kata mbwe ebikha bioosi okhukulu khwao khasi khunegumula khulikina. ⁷ Yeso namuboolera ari, kaandikwa mbwe, ewe orateemanga Omwami Nasaye wao.

⁸ Khandi, sietani namuyira akulu wo lugulu luleyi, manu namwekesia oburuki bwoosi obwe sialo, nende oluyaali lwabwo; ⁹ Namuboolera ari, ebiindu bino bioosi ndakhuba ewe, nikaba mbwe okwa asi manu onyinamire esie. ¹⁰ Ne Yeso namuboolera, bwao, sietani: okhuba kaandikwa mbwe, ewe omwinamirenge omwami Nasaye wao, ye yeeng'ane omurumikhire. ¹¹ Manu sietani namulekha, ne, lola, abamalaika nibeecha nibamukhalabanira.

¹² Bulano olwa Yeso yali nabulire mbwe Yokhana yasukunwa mumboyero, nachia mu Galilaya; ¹³ Ne narula Nasareti, niyeecha namenya Kaperenaumu, eyiri khunyanja, khulwakho lwa Sabuloni nende Nafutalimu. ¹⁴ Mbwe kolerere akaboolwa nende Isaya omunabii, nabola ari, ¹⁷ Okhurula ebikha ebio Yeso yachaka okhuyala, nende okhuboola ari, mwekanire: okhuba obwami bwo mwikulu buli aambi.

¹⁸ Ne Yeso, nakendanga khundulo khwe inyanja ya Galilaya, yaloola abasiani babiri abomunyumba ndala, Simoni olangwa Petero, nende Anderaya omusiani waabwe, nibareka chinjero munyanja: okhuba bali abanaabi. ¹⁹ Naye nababoolera ari, munoonde ne ndabakhola mube abanaabi ba baandu. ²⁰ Ne abwene ao nibalekha echinjero chiabwe, nibamuloonda.

²¹ Ne olwa yali nasuda imberi, yaloola abasiani bandi babiri, Yakobo omwana wa Sebedayo, nende Yokhana omusiani wabwe, nibali muliaro nende Sebedayo saabwe nibakasianga echinjero chiabwe; namala nabalanga. ²² Abwene ao nibalekha eliaro nende saabwe, manu nibamulonda.

²³ Manu Yeso nachia buli abuundu mu Galilaya yoosi, niyekesia musinagogi chiabwe, nayala ifanjili yo bwami, nende okhuwonia obudekhere bwa buli ingeri nende amalwaye ka echimbia chioosi mubaandu. ²⁴ Ne ifuma yaye nichia buli abuundu mu Siiria yoosi: manu nibamurerera abaandu badekhere boosi abali nibaingirwe nende amalwaye kabuli ingeri nende amachuuni, nende balia abalimo ebikhieno, nende balia abali abalalu, nende abeindulume; ne nabaonia. ²⁵ Ne emikaanda mikhongo ekia baandu nikimuloonda okhurula Galilaya, nende okhurula Dekapolis, nende Yerusalemu, nende okhurula Ebuyaudi, nende okhurula ingerekha wa Yorodani.